SUAHLANNAK 31

Puanthlam ih Hnaṭuantu Pawl

(Suah 35.30—36.1)

1 Bawipa in Moses hnenah, 2“Judah phun sung ihsin Hur ih tupa Bezalel, Uri-ih fapa, cu ka hril zo. 3Amah cu ka thlarau#31.3 thlarau: timi hi Hebru ṭong in ruach an ti ih cahnak tikhal a si thei. Thlarau Thianghlim tinak a si lo. in ka khahter zo ih, thiltitheinak, fimthiamnak le kutzung thiamnak a phunphun a nei a si. 4Innruang pungsan a phunphun suai theinak le a cupawl cu sui, ngun le dar in suai theinak a nei a si. 5Lungmankhung taat theinak, zanthing in thilri a phunphun tuah theinak le kutzung thiamzet ih thil phundang dang tuahtheinak tla a nei. 6Amah thawn hnaṭuan tlang dingah Dan phun sung ihsin Ahisamak ih fapa Oholiab cu ka hril zo. Tuah dingih ka lo fialmi hmuahhmuah an tuah theinak dingah a dang zungthiam pawl hnen khalah thiltitheinak tamzet ka pe zo. 7Tuah dingmi pawl cu: Keimah umnak Puanthlam, Thukamnak Kuang le a sin, Puanthlam sungih thilri hmuahhmuah, 8cabuai le sui ih tuahmi meivannak fung le a thilri, zihmui rimthaw urnak hrangih biakṭheng, 9mei-ur thawinak hrangih biakṭheng le a thilri pawl, kut kholhnak kheng le a tawdam, 10Aaron le a fapa pawl in puithiam hna an ṭuan ah an hruk dingmi puan mankhung pawl, 11hriak culhnak dingih hmanmi siti le hmun thianghlim hrangih hman dingmi zihmui rimthaw pawl tla an si. Hi thil pawl an tuah tikah na hnenih thu ka lo pekmi vek cekci in an tuah thluh pei,” tiah a ti.

Colh Ni

12 Bawipa in Moses hnenah, 13“Israel mi pawl hnenah, ‘Ka sabbath ni cu nan ul pei, zianghrangah tile cuih ni cu keimah le nanmah le nan tesinfa karlakah Bawipa keimah in nanmah cu ka minung ngaingai ah ka lo tuah zo a si, ti langternak ih hminsinnak a si. 14Sabbath ni cu nan ul pei, ziangahtile nan hrangah thiantermi ni a si zo. Zokhal sabbath ni a buartu cu thah a si pei; zokhal sabbath ni ul loin hna a ṭuan asile a minung sung ihsin dawihlo a si pei. 15Niruk sung hna ṭuannak caan nan nei; sikhalsehla ni sarih ni cu a thianghlimmi sabbath ni a si ih Bawipa hrangah ni thianghlim a si. Zokhal cuih ni-ah hna a ṭuantu cu thah tengteng a si pei. 16Kumkhua daih thukam hminsinnak a si bangtuk in Israel mi pawl in sabbath ni cu an ul pei ih an tesinfa san khalah an ul ringring pei. 17Hi ni cu keimah le Israel mi karlakih kumkhua hminsinnak a si, ziangahtile Bawipa keimah in van le leilung cu ni ruk sungah ka tuah ṭheh ih ni sarih ni-ah hnaṭuan loin ka colh ruangah a si,’ tiin sim aw,” tiah a ti.

18Sinai Tlang parah Bawipa in Moses hnenih thu a simmi a ṭheh tikah Pathian amah ih kut rori in thukham a ngannak lungpheng pahnih cu Bawipa in Moses hnenah a pek.

Currently Selected:

SUAHLANNAK 31: FCL

Highlight

Copy

Compare