SUAHLANNAK 29

Aaron Le a Fapa Pawlih Pumpeknak

(Pui 8.1-36)

1“Aaron le a fapa pawl cu ka hrangih puithiam ṭuan dingih an pum an pek tikah hi bangtuk in nan tuah pei. Raitluan cawcang no pakhat le tuucang pahnih nan lak pei. 2Cule thilnu tel lomi sang, thilnu tel lo le siti ih tuahmi sangfun le thilnu tel lo le siti ih tuahmi sangpheng khal nan lak pei. Hi sang pawl cu a ṭha zetmi sangvut in nan tuah pei. 3Kho sungah nan ret pei ih cawcang le tuucang pahnih nan thah tikah kho sungih sang cu ka hnenah in pek pei.

4“Keimah ka umnak Puanthlam sangka-ah Aaron le a fapa pawl kha rak hruai uhla kholh aw hai seh. 5Cun sunghruk angki, a tlunih hrukmi angki fualpi, ṭaangthlaih, ṭaangben le taikhap pawl kha Aaron hrukter uhla taikhap khal khapter uh. 6Lupawng khal a lu-ah pawngter uhla, cuih parah calben khal ben uh. Calben parah cun ‘Bawipa hnenih pekmi,’ tiah khen uh. 7Cule hriak la uhla a lu-ah nan toih pei ih cuticun hriak nan culh pei.

8“A fapa pawl rak hruai uhla angki hrukter uh. 9An taai ah taaiṭem ṭem uhla an lu-ah lukhuh khumter uh. Cuti vekin a si Aaron le a fapa pawl puithiamah nan canter ding daan cu! Amah le a tesinfa pawl in Keimah in rian ringring ding.

10“Keimah ka umnak Puanthlam hmaiah cawcang kha rak keng uhla Aaron le a fapa pawl in a lu parah an kut an suang pei. 11Pumkhawmnak Puanthlam ih luhnak sangka, Bawipa ih hmaika ahcun cawcang cu nan that pei. 12Cawcang ih thisen kha nan mehtok in tok uhla, biakṭheng parih thingzum nan bunmi parah nan maan pei. A taanglaimi a thisen cu biakṭheng hramah nan bur thluh pei. 13Cu ṭheh in a sungril tuamtu a thau le a thin bawr le a kaileng pahnih le a tuamtu a thau pawl cu nan lak pei ih biakṭheng parah Keimah in biaknak ah nan ur pei. 14Sikhalsehla a tit, a vun le a sungril hmuahhmuah cu bukthlam lenglamah nan ur ṭheh pei. Himi cu puithiam pawl an sualthianfai thawinak dingih pekmi a si.

15“Tuucang pakhat kha la uhla, Aaron le a fapa pawl in a lu parah an kut an suang pei. 16Nan that pei ih a thisen nan suah pei ih biakṭheng ih kimvelah nan thle pei. 17Tuucang sa cu nan can ṭheh pei ih a sungril le a ke pawl nan kholhfai pei. Cu ṭheh in a lu le a sa dang pawl ih tlunah nan ret pei. 18Biakṭheng parah tuucang sa hmuahhmuah cu Keimah in biaknak ah nan ur pei. Himi cu Bawipa hrangih mei-ur thawinak a si; meisa thawn thawinak a si ih Bawipa ih hrangah rimthaw a si.

19“Cun tuucang dang pakhat kha lak uhla, Aaron le a fapa pawl in a lu parah an kut an suang pei. 20Nan that pei ih a thisen hrekkhat nan lak pei ih, Aaron le a fapa pawl ih vorhlam hna-rah par le an vorhlam kutzungpi par le an vorhlam kezungpi parah nan maan pei. A taanglaimi thisen cu biakṭheng kimvelah nan bur ṭheh pei. 21Biakṭheng parih thisen kha nan lak pei ih culhmi hriak thawn nan rawi hnuah Aaron le a fapa pawl ih hnipuan parah nan theh pei. Aaron, a fapa pawl le an hnipuan tla cu a thianghlimmi ah an cang ding.

22“Tuucang ih thau, a meifi thau, a sungril tuamtu thau, a thin bawr, a kaileng pahnih parih thau pawl le a vorhlam cawn nan lak pei; (zianghrangah tile hi tuucang cu puithiam an cannak kutsuannak hrangih hmanmi a si.) 23Bawipa hmaika ih retmi sangkho sung ihsin thilnu tel lo sang pakhat, siti thawn tuahmi sangfun pakhat le sangpheng pakhat nan lak pei. 24Hi sang pawl cu Aaron le a fapa pawl ih kut sungah nan ret pei ih thlir tahratin Bawipa ih hnenah an pek pei. 25Cu ṭheh in an kut parih sang pawl cu nan lak pei ih biakṭheng parih mei-ur thawinak parah nan ret pei ih Bawipa ih hrangih rimthaw si dingin nan ur pei. Himi cu Bawipa ih hnenah meisa thawn biaknak a si.

26“Aaron pumpeknak tuucang ih ir kha nan lak pei ih, Bawipa hnenah thlir tahratin biaknak ah nan hmang pei. Himi tuucang sa cu nanmah ih covo a si ding.

27“Aaron le a fapa pawl pumpeknak ih hmanmi tuucang sa ihsin a ir kha kut in thlir tahratin biaknak ah nan hmang pei ih a cawn cu puithiam pawl hrangah a si pei. 28A thleng-aw dah lomi ka thu pekmi bangtuk in a hi sa pawl cu Aaron le a fapa pawl hrangih Israel mi pawl ih pekmi sa a si ding. Israel mi pawl ih pawlkhawm biaknak sa sung ihsin hi sa - a ir le a cawn pawl cu - puithiam pawl hrangih a dangte ih retmi sa a si. Bawipa hnenih an laksawng a si.

29“Aaron ih fapa pawl kha puithiam an si ve theinak dingin Aaron a thih tikah a hnipuan thianghlim pawl cu a fapa pawl hnenah nan pek thluh pei ih kutsuannak an ngah tikah cuih hnipuan ah an hruk ding. 30Aaron ih puithiam hnaṭuan a sawngtu a fapa in hmun thianghlim ih puithiam hnaṭuan dingih tonkhawmnak thlam sung a luh tikah acuih hnipuan cu ni sarih sung a hruk ding.

31“Pumpeknak hrangih hmanmi tuucang cu nan lak pei ih hmun thianghlim ah a sa cu nan suang pei. 32Keimah umnak Puanthlam luhnak sangka ah Aaron le a fapa pawl in tuucang ih sa le kho sungih sang pawl cu an ei pei. 33Anmah pumpeknak le hriakculh caanah an hnenih ngaidamnak a thlentertu cu anmah in an ei pei. Hi rawl cu a thiangmi a si hrangah puithiam pawl lawngin an ei pei. 34Sa siseh, sang siseh zinglam tiang a taangmi a um a si ahcun ur-kang thluh ding an si. Ei sal ding a si nawn lo; ziangahtile a thiangmi an si.

35“Aaron le a fapa pawl hrangah ka thupekmi vek cekci in nan tuah pei. An pumpeknak cu ni sarih sung nan tuah pei. 36Nitinte in sualthianfai thawinakah cawcang nan that pei ih sual ngaidamnak a um ding. Sual ngaidamnak hrangih cawcang nan thah ruangah biakṭheng ihsin sualnak cu a hlo ding a si. Cun biakṭheng cu sahriak nan culh pei ih Pathian hnenah nan pek pei. 37Ni sarih sung biakṭheng hrangah sualthianfai thawinak nan tuah pei ih Pathian hnenah nan pek pei. Cuticun biakṭheng cu a thianghlimzet ding ih thil zarh ah a cang ding; curuangah biakṭheng a daitu hmuahhmuah in a zarhmi ah#29.37 a zarhmi ah: timi hi, a thianghlimmi nan tham ahcun siatsuahnak a um thei, tiah an rak zum. an cang ve ding a si.

Nitin Thawinak

(Mipum 28.1-8)

38“Biakṭheng parih thawinak nan pek dingmi cu hihi a si ding: Nitinte in cat loin kum khat a timi tuu note pahnih nan that ringring pei. 39Zinglam ah tuu note pakhat nan that pei ih zanlam ah a dang tuu note pakhat nan that pei. 40Siti ṭhazet khuat thum rawimi sangvut ṭhazet cuai li thawn a hmaisaih tuu note nan thahmi cu thawinakah nan pek pei. Cule inmi thawinak hrangah sabitti khuat thum khal nan toih pei. 41Tuu note pahnihnak cu zanlam ah, zinglam ih nan tuah vek thotho in, eimi thawinak le inmi thawinak thawn nan pek cih pei. Cuticun Bawipa ih hrangih meisa thawn ur-in thawinak rimthaw a si pei. 42A hi mei-ur thawinak cu Bawipa keimah ih hmaiah Keimah umnak Puanthlam sung luhnak sangka ah sankhat hnu sankhat cat loin nan tuah ringring pei. Cutawkah cun ka minung pawl ka lo tong ding ih nan hnenah thu ka sim ding. 43Cutawkah Israel mi pawl cu ka tong pei ih keimah ih sunlawinak tleu in acuih hmun cu hmun thianghlim ah a cangter ding. 44Puanthlam le biakṭheng cu ka thianghlimter ding; Aaron le a fapa pawl tla cu keimah ih puithiam hna an ṭuannak dingah a hrante in ka ret ding ih ka thianghlimter hai ding a si. 45Israel mi lakah ka um pei ih an Pathian ka si ding. 46Keimah cu anmah lakih ka um theinak dingah Izipt ram ihsin a suaktertu an Bawipa Pathian ka si kha in thei ding. Keimah cu Bawipa an Pathian ka si.

Currently Selected:

SUAHLANNAK 29: FCL

Highlight

Copy

Compare