SUAHLANNAK 14

Tipi Sen An Tan

1 Bawipa in Moses hnenah, 2“Israel mi pawl cu dungah siip dingin le Pi-hahiroth hmai, Migdol le Tifinriat karlak ah Baalzefon lam hoih in riak dingah sim aw. Cuih hmun Tipi Sen kapah riak hai seh. 3Cutikah Faro in, ‘Israel mi pawl cu vansaangin an vakvai ih nelrawn ah an taang a si,’ tiah a ruat ding. 4Cun Faro ih thinlung cu ka hakter ding ih Israel mi pawl cu an dung in a dawi sal ding. Cutikah Faro le a ralkap pawl ka neh ding ih cumi cun ka hmin i thangter ding. Cutik lawngah Izipt mi pawl in Bawipa ka si kha an thei ding a si,” tiah a ti. A sim vek cun Israel mi pawl in an tuah.

5Israel mi pawl an luat zo tiin Izipt ram siangpahrang an sim tikah, amah le a kuthnuai bawi pawl cu an thinlung a thleng aw sal ih, “Kan thil tuahmi hi ziangso a si? Ziangah so kan sal an sinak ihsin Israel mi pawl kan suahter?” tiah an ti ciamco. 6Cutikah Faro in a raldonak rangleng pawl cu tim a tuahter ih a ralkap pawl cu a fehpi. 7An rangleng lakih a ṭha bikmi rangleng zaruk, le a parah ralbawi pakhat ciar to in a dang Izipt pawl ih rangleng tla in an dawi. 8Bawipa in Faro ih thinlung a hahter ruangah, ralṭhazet ih #14.8 ralṭhazet ih: timi hi Bawipa ih kilvennak sungih ti tla a si thei. a fehsuakmi Israel pawl cu a dawi a si. 9Izipt mi pawl cun an rang hmuahhmuah thawn Faro ih rangleng le a mawngtu pawl le a ralkap tla thawn Israel mi pawl cu an dawi ih Baalzefon hmai, Pi-hahiroth kiang Tipi Sen kapih an riahnak ah an man.

10Faro in a hei naih vivo tikah Israel mi pawl cun anmah dawi ih Izipt mi an rat kha an hmu tikah an ṭih ngaingai ih Bawipa hnenah an ṭap an ai. 11Cule Moses hnenah, “Izipt ramih thlaan a um lo ruangah maw hitawk nelrawn ramṭhing ahhin thi dingih in rak hruai? Izipt ram ihsin in suah ih na thil tuahmi hi zohhnik! 12Izipt ramih kan um lai ihsin hitivek a si ding ti cu kan lo sim cia tho lo maw? ‘In hnaihnok duh hlah; Izipt mi hnenah sal kan si ko pei,’ kan lo ti tho lo maw? Hi nelrawn ramṭhing sungih thih hnakin sal si cu kan hrangah a ṭha sawn a si,” tiah an ti. 13Cutikah Moses in Israel mi hnenah, “Phang hlah uh; hnget zetin ding uhla, tuihsun ah nanmah run dingah Bawipa ih tuah dingmi rak zoh uh. Tuihsun ih nan hmuhmi Izipt mi pawl hi nan hmu nawn lo ding. 14Nanmah ih ai-ah Bawipa in a lo do sak ding. Nannih tuah ding zianghman a um lo. Thlangamtein um uh,” tiah a ti.

15 Bawipa in Moses hnenah, “Ziangah so ka hnenah na au rero? Israel mi kha hmailamih nor dingin sim aw. 16Na kianghrol khai awla, tifinriat tlunah na baan phar aw. Cule tidai cu a ṭhen-aw ding ih Israel mi pawl cu leicaar parin an feh lan thei ding a si. 17Izipt mi pawl ih thinlung cu hakzet in ka tuah pei ih khuitawk khalah an lo dawi ding. Cutikah Faro le a ralkap pawl le a rangleng le a rangleng mawngtu pawl ka neh ding ih cumi in ka hmin a sunglawiter ding. 18Cutiin Faro le a rangleng le a rangleng mawngtu pawl tlunih nehtu ka si ih ka hmin sunloih a si tik lawngah Izipt mi pawl in Bawipa ka si hi an thei ding a si,” tiah a ti.

19Israel ralkap burpi hmaiih a feh ṭheutu Pathian ih vancungmi cu a ṭhawn ih dunglamin a khor hai. An hmaiih a um ṭheumi mero zual khal cu dunglamah a ṭhawn aw. 20Izipt ralkap pawl le Israel mi burpi karlakah a ceer. Mero a um ih Izipt ralkap hrangah khua a thim; asinain Israel mi hrangah a vaang. Curuangah zanvaar naih aw thei veve loin Izipt ralkap pawl le Israel mi cu an um.

21Moses in tifinriat tlunih a baan a phar tikah, Bawipa in nisuahnak lam thli cu napi in a hranter ih zanvaar a hran hnuah tifinriat tawphah-ih leiro a hung lang. Tidai cu a ṭhen aw ih, 22tifinriat sungih leiro par in Israel mi pawl cu an feh. An sir le sirah tidai cu phar bangtuk in a tiang aw. 23Cule Izipt mi pawl cun Faro ih rang hmuahhmuah le a rangleng pawl le a mawngtu pawl tla thawn tifinriat sungah cun an hei dawi thotho. 24Zinglam khawfingcat ah Bawipa in meisa zual le mero zual parin Izipt ralkap pawl cu a vun zoh ih vansaanglamin a tuah hai. 25An rangleng ke pawl cu a tarhakter ruangah harsa zetin an ṭhawn-aw thei ceu. Cutikah Izipt ralkap pawl in, “Bawipa in Israel mi a ṭan ih kannih cu in do a si, kan tlan pei,” tiah an ti.

26Culaifang ah Bawipa in Moses hnenah, “Tifinriat tlunah na baan phar awla Izipt mi pawl le an rangleng pawl le an rangleng mawngtu pawl ih parah tidai a ra kirsal ding ih a phim ṭheh hai ding,” tiah a ti. 27Cule Moses in a baan cu tifinriat tlunah a phar ih khua a van tikah cun tidai cu a ra kirsal ih amah keelah a cang sal. Izipt mi pawl cu tlansuah an tumnak ah tidai cu an pah ih Bawipa in tidai sungah a hlon ṭheh hai. 28Tidai cu a ra kirsal ih tifinriat sung tiangin Israel mi a dawitu, Faro ih ralkap hmuahhmuah le an rangleng le a mawngtu pawl tla cu a khuh ṭheh hai a si. Pakhat hman an luat lo. 29Asinain Israel mi pawl cu an sir le sirah tidai cu phar bangin a tiang aw ih tifinriat sungih leiro parin an fehsuak.

30Cuih ni-ah Izipt mi pawl kut sung ihsin Israel mi pawl cu Bawipa in a runsuak ih Izipt mi pawl ih ruak cu Israel mi pawl in tikap ah an hmu. 31Ziangtluk huham cak thawn Bawipa in Izipt mi pawl a do ti cu Israel mi pawl in fiangtein an hmuh ruangah Bawipa cu an ṭih; curuangah Bawipa le a salpa Moses parah rinsannak an nei.

Currently Selected:

SUAHLANNAK 14: FCL

Highlight

Copy

Compare