SUAHLANNAK 13

Pathian Hnenih Fatir Peknak

1 Bawipa in Moses hnenah, 2“Fapatir hmuahhmuah cu keimah hnenah nan pek ding. Israel mi lakih fapatir pohpoh cu ka ta an si; ṭilva lak khalah a pa fatir cu ka ta an si,” tiah a ti.

Thilnu Tel Lo Sang Puai

3Moses in Israel mi hnenah, “Izipt ram, salih nan tannak ram ihsin nan suah ni, tuihsun hi ciing ringring uh; ziangahtile Bawipa in a baan thacak in a lo suah ni a si. Thilnu telmi sang nan ei hrimhrim lo pei. 4Abib #13.4 Abib thla: hi Nisan tiih an kawh hlanih an rak hmanmi hmin hlun a si. thla, tuihsun ah Izipt ram in nan suak a si hi! 5Bawipa in Kanaan mi, Hit mi, Amor mi, Hiv mi le Jebus mi tla-ih umnak ram cu nan hnenih pe dingin nan pu le nan pa hnenah Amah ih hmin saal in thu a rak kam zo. Cuih ram cu cawhnawi le khuaitizu a luannak ram a si. Curuangah cuih ram nan thlen tikah Abib thla tengteng ah thilnu tel lo sang puai tuah cu nan hngilh lo pei. 6Ni sarih sung cu thilnu tel lo sang nan ei pei ih a ni sarihnak ah Bawipa hrangah puai nan tuah pei. 7Ni sarih sung cu thilnu tel lo sang nan ei pei. Thilnu telmi sang siseh, thilnu siseh nan ramsung hrimhrim ah nan umter lo pei. 8‘Hi hmuahhmuah kan tuahnak cu Izipt ram ihsin kan suah tikah kanmah hrangah Bawipa ih thil tuahmi hngilh lonak a si,’ tiah cuih ni-ah nan faale pawl hnenah nan sim pei. 9Hiti nan tuahnak cu dunglam thu a lo theih tertu, nan kutah siseh, nan cal ah siseh hminsinnak bangtuk a si ding ih, cuti lawngin Bawipa ih daan cu a sim le a rel nan dai lo ding; ziangahtile a cahnak huham thawn Bawipa in Izipt ram ihsin a lo suah hai a si. 10Kum khat hnu kum khat a camah feltein nan tuah ringring pei.

Fatir Hlannak

11“Bawipa in Kanaan mi pawl ih ramah a lo thlenter hai ding; ziangahtile Amah ih hmin saal in nan pu le nan pa hnenah thu a rak kam zo. Cuih ram cu nan hnenih a lo pek tikah, 12nan fapatir hmuahhmuah cu Bawipa hnenah nan hlan ding. Nan ṭilva-ih hrin hmaisa bik fatir a pa tla Bawipa ih ta an si. 13Asinain laak fatir a pa cu tuu faate in nan tlen pei; nan tlen duh lo asile a hngawng nan khiak pei. Nan fapatir pohpoh cu nan tlen sal pei. 14Nehhnu ah nan fapa in, ‘Hitiih nan tuah mi hi a tican ziangso a si?’ tiih a lo sut asile, ‘Bawipa in kan saltaannak Izipt ram ihsin a cahnak huham thawn in rak suah a si. 15Faro a thinlung a hak ih Izipt ram ihsin in suah duh lo tikah, Izipt ramih fapatir hmuahhmuah, milai fapa siseh, ramsa fa siseh Bawipa in a rak that ṭheh. Curuangah fapatir pohpoh cu Bawipa hnenih hlan an sinak a si; asinain ka fapatir cu ka tlen sal a si,’ tiah nan ti pei. 16Hitiih nan tuahnak cu dunglamih thu a lo theihtertu, nan kutah siseh, nan cal ah siseh hminsinnak bangtuk a si ding; ziangahtile Izipt ramsung ihsin Bawipa in a cahnak huham thawn in suah a si,” tiah a ti.

Mero Zual Le Meisa Zual

17Faro in Israel mi pawl a fehter tikah, Filistia tipikap ih a fehmi lamzin cu a tawi bik asinain Bawipa in hi lamzin cun a hruai hai lo. Ziangahtile Pathian in, “Ral an do dingmi pawl an hmuh tikah an thinlung thleng aw in Izipt ramih an kirsal ding cu ka duh lo,” tiah a ti. 18Cuih lamzin ai-ah, nelrawn ramṭhing zin ihsin Tipi Sen #13.18 Tipi Sen: timi hi Hebru ṭong cun Phaikung Tifinriat tiin a um. lamah Bawipa in a heelpi a si. Israel mi pawl cu ral do dingah timtuah cia in Izipt ihsin an suak.

19Moses in Josef ih ruh khal a keng; ziangahtile amah Josef in Israel mi pawl cu siatcam in thu a kamter ciami an si. An hnenah, “Pathian in a lo runsuak hai ding a si. Cutikah hitawk ihsin nan suah tikah ka ruh nan keng pei,” tiah Josef in a rak ti.

20Sukkoth ihsin Israel mi pawl cu an pok ih nelrawn kiangte Etham ah an riak. 21Sun ah an lamzin hmuhtu dingah mero zual in Bawipa cu an hmaiah a feh. Zan a si tikah tleunak pe dingah le a sun a zanih an feh theinak dingah meisa zual in Bawipa cu an hmaiah a feh. 22Israel mi hmaiah cat loin sunah mero zual a um ih zanah meisa zual a um.

Currently Selected:

SUAHLANNAK 13: FCL

Highlight

Copy

Compare