SUAHLANNAK 12

Lantak Puai

1Izipt ram thotho ah Bawipa in Moses le Aaron hnenah cun, 2“Tuih thla hi nan hrangah kum khat sungih thla hmaisabik #12.2 Thla hmaisabik: an timi cu Nisan thla an ti ih March thla hrek ihsin April thla hrek tiang a si. a si. 3Cuhrangah Israel miburpi hnenah: Tuih thla a ni hranak ah mipa hmuahhmuah in an innsang hrang ciarah, innsang pakhat ah tuu note asilole me note pakhat ciar hril hai seh. 4Innsang pakhat in an ṭilva thahmi an ei thluh thei lo ding asile an minung zat zoh in an innhnen te thawn ṭilva pakhat ṭawm aw hai seh. Minung ziangzat an um ti le ziangzat ciar an ei thei ding ti zoh in a man khal zuul hai seh. 5A ṭilva cu a him raitluan a si pei ih, a pa kum khat ti a si pei. Tuu asilole me an hril pei. 6A cuih thla ni hleili ni tiang an ret pei ih a ni hleili zanlam ah Israel mi zatein ṭilva cu an that pei. 7Cun a thisen hrekkhat cu an lak pei ih, acuih sa an einak ding inn sangka tunrel le sangka tlunah an hnih pei. 8Zan ah acuih sa cu meisa-ah an em pei ih thilnu tel lo sang le anfangkha thawn an ei pei. 9A hel in nan ei lo pei. A suan khalin nan ei lo pei. A pum in a lu le a ke le a sungril thawn nan em pei ih cutiin ei ding a si. 10A sa malte hman zinglam tiang nan hlah lo pei. Nan hlahmi a um pang le meisa-ah nan ur ral pei. 11Nan ei ding daan cu hiti in a si pei: Nan hnipuan nan taai ah nan ṭem pei, nan kedam nan hruk pei ih nan kianghrol nan kai fekfek pei ih zamrangte in nan ei pei. Ziangahtile Bawipa ih Lantak puai a si.

12Cuih zanah Izipt ram pumpi sungah ka feh ding ih minung siseh ṭilva siseh an fatir cu ka that ṭheh ding. Keimah cu Bawipa ka si ih Izipt ramih an khawzing hmuahhmuah tlunah thu ka ṭhen ding. 13Sangka ih thisen hnihmi cu nan umnak inn a si ti hminsinnak a si ding. Thisen ka hmuh tikah ka lo lanta ding. Izipt ram ka hrem tikah nannih cu siatsuahnak nan tong lo ding. 14Cuih ni cu nan hrangah nan ciin ringring dingmi ni a si ding ih, Bawipa hnenah biaknak puai tiah nan tuah ringring pei. Sankhat hnu sankhat, kumkhua cat loin puai ni a si tiah nan tuah ringring pei,” tiah a ti.

Thilnu Tel Lo Sang Puai

15 Bawipa in, “Ni sarih sung thilnu tel lomi sang nan ei pei. Nikhat ni-ah nan inn ihsin thilnu hmuahhmuah cu nan hlon thluh pei; ziangahtile mi pakhatkhat in ni khat ni in ni sarih ni tiang thilnu telmi sang a ei ahcun Israel miphun sungin nan suah pei. 16Ni khat ni le ni sarih ni-ah biakkhawmnak nan tuah pei. Hi ni hnih sungah ziang hna hman ṭuan ding a si lo. Senpi hrangah rawl lawngte nan suang thei. 17Hi thilnu tel lo puai hi ṭhatein nan ul pei, ziangahtile a hi ni-ah Izipt ram ihsin nan zatein ka lo hruaisuak a si. Sankhat hnu sankhat hi ni cu a kumkhua in puai ni-ah nan hmang pei. 18Thla hmaisa bikih ni hleili ni zanlam in ni kul hluan khat ni zanlam tiang thilnu tel lo sang nan ei pei. 19Ni sarih sung cu nan innsung pohpoh ah thilnu nan ret lo pei; ziangahtile mi pakhatkhat, ram dangmi siseh, nan phunpi siseh, thilnu rawimi a ei a si ahcun Israel miphun sung ihsin dawi a si ding. 20Thilnu telmi nan ei hrimhrim lo pei. Nan innsung pohpoh ah thilnu tel lo sang lawnglawng nan ei pei, tiin thu than aw,” tiah a ti.

A Hmaisa Bik Lantak Puai

21Cutikah Moses in Israel hruaitu upa pawl a ko ih an hnenah, “Feh uh la nan innsang hrangah tuu note a si lole me note va hril uhla Lantak aihnak puai hrangah that uh. 22Cun hissop#12.22 hissop: timi hi pi hnih le hrek hrawng a saangmi zanthing fate a si ih a ṭeek zimah a par a rang, a bormi a um. thingṭeek pakhat in lak uhla kheng sungih a ummi thisen sungah hnim in sangka tunrel le sangka tlunlam tlang ah hnih uh. A thaizing khua a van hlan lo zohman nan inn ihsin nan suak lo pei. 23Izipt mi pawl that dingah Izipt ram sungih Bawipa a feh tikah nan sangka tunrel le a tlunlam tlang ih thisen hnihmi a hmu pei ih siatsuahtu vanmi cu mi that dingah nan innsungah a lutter lo ding. 24Cuih tlunah hi daan pawl cu nanmah le nan tesinfa pawl hrangah kumkhua hrangih thupekmi a si ih nan thlun tengteng ding. 25Bawipa ih a lo kam cia bangtuk in a lo pek dingmi ramih nan thlen tik khalah hi daan hi nan thlun pei. 26Nan faate pawl in, ‘Hitiih kan hman daan hi ziang tican so a si?’ tiah an lo sut asile, 27nannih in, ‘Bawipa hnenih pekmi Lantak raithawinak a si; ziangahtile Izipt mi pawl a thah hai tikah Israel mi pawl ih inn tla cu a lanta ih kan inn cu a zuah a si,’ nan ti pei,” tiah a ti.

Cutikah Israel mi pawl cun an khuk an bil ih an biak. 28Israel mi pawl cu an feh ih cuih thu cu an thlun. Moses le Aaron hnenih Bawipa ih thupekmi vekin Israel mi cun an tuah ṭheh.

Fatir Thihnak

29Cun zanṭim ah Bawipa in Izipt ram sungih fatir hmuahhmuah, Faro ih fapatir, siangpahrang rocotu ding a si mi ihsin thokin leilung hnuai thawnginn ih thawngtla mi ih fapatir tiangin a that ṭheh; ramsa hmuahhmuahih fatir khal an thi ṭheh relrel. 30Cuih zan cu Faro le a kuthnuai bawi pawl le Izipt mi pawl cu an tho ih Izipt ram cu ṭah le raaknak hlir in a khat; ziangahtile fapa thih lonak inn pakhat hman a um lo. 31Cuih zan thotho ahcun Faro in Moses le Aaron cu zamrang in a ko ih, “Pok uh! Nanmah le Israel mi pawl zamrangte in tlan uh. Ka minung pawl cu taanta uhla feh uh. Nan dil vekin nan Bawipa cu va biak uh. 32Nan tuu le nan me le nan caw pawl khal nan dil vekin hruai uhla feh uh. Keimah hrang khalah thluasuah in dil sak uh,” tiah a ti.

33Izipt mi pawl khal in zamrangte ih an ramsung ihsin suak hlohhlo dingah an fial hai; ziangahtile, “An feh lo asile kan thi thluh ngaingai ding,” an ti. 34Curuangah Israel mi pawl cun thilnu tel lo sangvut cu an lak ih an sang tuahnak beel sungah an hnipuan in an tuam ih an liang in an phur ciamco. 35Moses ih thucah bangtuk in Izipt mi pawl ih hlawnthil sui le ngun le hnipuan pawl cu Israel mi in an dil. 36Bawipa in hna a ṭuan ruangah Israel mi cu Izipt mi pawl in an hmaizah hngin ih an dilmi hmuahhmuah an ngah. Cuticun Israel mi pawl in Izipt mi pawl ih thilri cu an laksak ṭheh.

Izipt Ram Ihsin Israel Mi An Suak

37Israel mi pawl cu Rameses in an pok ih Sukkoth lamah an feh. Nunau le nauhak siar loin mipa patling hlir thawng zaruk an ke in an feh. 38Israel mi a si lomi midang tampi le tuu, me le caw tampi tla an hnenah an feh. 39Izipt ram ihsin an kenmi sangvut cu thilnu tel loin sangah an tuah. Thilnu tel lomi sang a si, ziangahtile rinlopi-ah Izipt ram in dawimi an si. Anmah hrangih rawl suannak caan khal an nei lo.

40Israel mi pawl cu kum zali le sawmthum Izipt ram ah an um. 41Kum zali le sawmthum a kim ni-ah Bawipa ih miburpi cu Izipt ram in an suak a si. 42Cuih zan cu Izipt ram sung ihsin suak dingah Bawipa in a kilven zan a si. Curuangah cuih zan cu Israel mi pawl Bawipa ih a kilven zan tiah nehhnu san tiangin ulta dingah Bawipa ih hnenah an pek.

Lantak Puai Ih Thlun Ding Daan

43 Bawipa in Moses le Aaron hnenah, “Lantak puai ih thlun ding daan cu hiti in a si ding: Ramdang mi in Lantak puai rawl an ei lo pei. 44Asinain nan leimi sal cun a serh nan tan hnu lawngah a ei thei pei. 45A laangte ih a ummi le nan saancopmi kuli pawl cun an ei lo pei. 46Inn pakhat sungah nan ei pei ih a lengah zianghman nan suahpi lo pei. Cun nan thahmi ṭilva cu a ruh nan khiak lo pei. 47Israel mi zatein puai cu nan tuah pei. 48Ramdangmi nan hnenah an um ih Lantak puai Bawipa upatnak ih tuah an duh a si ahcun hmaisabik ah mipa hmuahhmuah an serh nan tan ṭheh pei; cuihnu lawngah puai ah an tel thei ding; nan sungsuak Israel mi bangtuk ah rel an si thlang ding. Sikhalsehla serh tan lomi pa cun a ei lo pei. 49Hi daan pawl in Israel hrin a si mi le nan lakih a ummi ramdangmi khal a huap a si,” tiah a ti. 50Cuticun Israel mi pohpoh in an thlun ih Bawipa in Moses le Aaron hnenih thu a pekmi vekin an tuah. 51A cuih ni-ah Izipt ram ihsin Israel mi pawl cu Bawipa in a burpipi in a suahter hai a si.

Currently Selected:

SUAHLANNAK 12: FCL

Highlight

Copy

Compare