ESTHER 4

Mordekai In Esther Bomnak A Dil

1Cule cutiih thil tawlrelnak a um cu Mordekai in a theih tikah a thinpit in a hnipuan a thlek ṭheh. Cule buri hnipuan in a thuam aw ih a lu ah vutcam phulh aw in ṭap phah le ai phah in khawpi sungah a feh. 2Siangpahrang inn kotka a va thleng; asinain a sungah cun a lut lo, ziangahtile thilthuam ṭhateih thuam awk locun zohman luh daan a si lo. 3Persia ramsung khuazakipah, siangpahrang ih thupekmi an thannak kipah cun Judah mi pawl cu ṭap le ai in an um ṭheh. Rawl an ul, an ṭap, an raak; buri hnipuan an sin ih vutcam lakah an it.

4Mordekai cutiih a um cu Esther ih nunau hnen-um pawl le amah kiltu tilpermi pawl in Esther cu an sim tikah a thin a nuam lo ngaingai. Mordekai hnenah hnipuan thlengnak ding Esther in a kuat naón Mordekai cun a la duh fawn lo. 5Cutikah siangpahrang bawipa in amah kiltu dingih a retmi tilper mipa Hathak cu Esther in a ko ih Mordekai cutiih a umnak thuhla va sut dingah a hei thlah. 6Hathak cu Mordekai hnenah, siangpahrang inn kotka hmai ih tualrawn ahcun a va feh. 7Cutikah Mordekai in thuhla hmuahhmuah cu a rak sim ih Judah mi hmuahhmuah thah ṭheh an si ahcun siangpahrang tangka inn ah Haman in tangka pek dingih a kammi zat tla a sim ṭheh. 8Judah mi siatsuah thluh dingah thupeknak Susa Khawpi ih an suah mi tla cu Hathak hnenah pakhat a pek. Mordekai in cuih ca cu Esther pe tahratih thu um daan khal simfiang dingin le siangpahrang hnenah Esther cu feh in a phunpi pawl hrangih zaangfahnak dil dingah Esther cu thu a cah. 9Mordekai thucahmi vek cun Hathak in a tuah ṭheh. 10Cutikah Esther in Hathak cu Mordekai hnenah a thlah sal ih, 11“Mi pakhatkhat, nunau siseh, mipa siseh, siangpahrang bawipa ih kawh loin siangpahrang umnak khaan sungih a luh a si ahcun thah a si pei, ti cu daan a si. Siangpahrang ruahnak petu pawl thokin ramṭhen sungih mi hmuahhmuah in cuih daan cu an thei ṭheh. Hi daan ihsin luat theinak lamzin ziangti hman in a um lo; Siangpahrang bawipa in a sui kianghrol a thlir lawngah cupa, a si lole cunu cu thihnak ihsin a luat thei. Keimah khal siangpahrang bawipa in i kawh lonak thla khat a si zo,” tiih sim dingah a fial.

12Mordekai in Esther ih thucahmi cu a theih tikah, 13Esther hnenah cun hiti in ralrinnak a pek: “Siangpahrang inn ih na um ruangah Judah midang pawl hnakin ka him deuh ding, tiah ruat duh hlah. 14Hi bangtuk tikcu ahhin daiziar ih na um a si ahcun, van ihsin Judah mi bomnak cu a ra ding ih in run ding; asinain nang cu na thi ding ih na pa ih innsang cu a cem ding a si. Hi bangtuk tikcu hrangah siangpahrang bawinu ih na cannak khal hi a rak si lo ding maw si? Zoso a thei?” tiah a ti.

15Cutikah Esther in Mordekai hnenah thu a cah sal ih, 16“Feh awla Susa Khawpi ih Judah mi hmuahhmuah kokhawm aw; rawl ul uhla ka hrangah thlacam uh. Ni thum le zan thum sung ziang hman ei lo le in loin rak um uh. Kei le ka hnen-um nunau pawl tla cuticun kan rak um ve ding. Cuih hnuah, daan a si lo naón, Siangpahrang hnenah ka feh ding. Curuangih ka thih ahcun ka thi ko pei,” tiah a ti.

17Cule Mordekai cu a feh ih Esther ih thucahmi vekin a tuah thluh.

Currently Selected:

ESTHER 4: FCL

Highlight

Copy

Compare