DAAN PEKSALNAK 4

Pathian Thu Ngai Ding

1Cule Moses in misenpi hnenah cun, “Ka lo zirhmi daan pawl cu thlun uhla nan nung ding ih Bawipa, nan pupa ih Pathian in a lo pekmi ram cu nan luah ding. 2Ka thupekmi tlunah zianghman beet hlah uh, a suup khal suup hlah uh. Bawipa nan Pathian ih thupekmi ka lo simmi cu thlun thluh uh. 3Peor Tlang parih Bawipa ih thil tuahmi kha nan mit rori in nan hmu zo. Baal a betu hmuahhmuah cu pakhat hman taang loin a siatsuah ṭheh; 4asinain Bawipa nan Pathian a rinsantu nannih cu tuihsun tiang nan nung lai a si.

5“Bawipa ka Pathian ih i fial bangtuk in daan hmuahhmuah ka lo zirh zo. Cuih daan pawl cu nan do dingmi le nan luah dingmi ram sung nan luh tik khalah thlun ringring uh. 6Felte in thlun uhla cuticun miphun dangdang hmaiah mifim le thil theitu nan sinak kha a lang ding. Hi daan pawl hi miphun dangdang in an theih tikah, ‘Hi miphun hi, miphun makzet an si ih fimnak le thil theihnak a nei ngaingai mi an si,’ an ti ding.

7“Ziangbangtuk ih miphun tum an si khalle Bawipa kan Pathian vekih kan kawh tinte in in naihtu Pathian cu an nei cuang lo ding. Bom dingih kan kawh tinte in in thei a si. 8Ziangbangtuk a tummi miphun a si khalle tuihsun ih ka lo zirhmi daan vekih a dingmi daan cu zohman in an nei zik lo. 9Curuangah ralring uh! Nan nunsung hmuahhmuah ah nan mit rori in nan hmuh zomi thil pawl cu hngilh hrimhrim hlah uh; ciing ringring uh. Nan faate pawl le nan tesinfa pawl zirh ṭheh uh. 10Sinai Tlangah Bawipa nan Pathian hmaiah nan ding ih Bawipa in ka hnenah, ‘Miseenpi pawl kokhawm hai aw. Keimah upat ṭihzah dingin an faate pawl an zirhnak dingah le an nunsung hmuahhmuahah keimah upat le ṭihzah an thiamnak dingah ka hmurka hrimhrim ih ka ṭongmi an theih kha ka duh a si,’ a ti tla kha nan fanau hnenah sim uh.

11“Meikhu dumzet vek khawdur duppi ih a khuhmi van tawngin meisa tleu a kap zukzo awmi tlang hramih nan ra din zia pawl kha nan faale pawl tla sim hai uh. 12Cuih meisa sung ihsin Bawipa cu nan hnenah a ṭong ih a ṭongmi khal nan hna in nan thei naón Bawipa ih pianhmang cu ziangti hmanin nan hmu lo. 13Nanmah thawn thukamnak a tuah ih cuih thukam nan thlun theinak ding lamzin khal a lo sim a si. Cuih lamzin cu lungpheng pahnih parih a nganmi nan thlun dingmi Thukham Pahra kha a si. 14Nan do dingmi le nan luah dingmi ramah nan thlun dingmi daan hmuahhmuah cu zirh dingah Bawipa in in fial a si.”

Milem Biak Lo Ding

15“Bawipa in Sinai Tlang meisa sungin nan hnenih a ṭong tikah ziang hmuihmel hman nan hmu lo. Curuangah fimkhur zetin um uhla, 16-18mipa a si lole nunau hmuihmel in maw, leivak ramsa a si lole vanzuang vate hmuihmel in maw, a bokvakmi ramsa a si lole tisung ih a tlangmi nga vekin maw, milem tuah tahrat in nan sual lonak ding ralring in um uh. 19Van ih nan hmuhmi ni le thlapi le arsi pawl cu vanrang hnuai minung hmuahhmuah hrangah a si ih nannih cun nan bia lo pei ih nan rian pang lo pei. 20Atuih nan dinhmun amah ih minung nan si theinak dingah nan hrangah thir er-titnak vek a si mi Izipt ram ihsin a lo suahmi nan si. 21Nanmah ruangah Bawipa kan Pathian cu ka parah a thin a heng ih a lo pek dingmi ram ṭha sungih lut lo dingah, ‘Jordan tiva na tan lo pei,’ i ti; cumi cu siatcam in a phuang zo. 22Curuangah kei cu hi ramah hin ka thi ding ih Jordan tiva cu ka tan thei lo ding; asinain nannih cun nan tan ding ih cuih ram ṭha cu nan luah ding. 23Bawipa nan Pathian in nanmah thawn thukamnak a tuahmi cu nan hngilh lonak dingah ralring uh. Amah ih thupekmi thlun uhla nanmah ih hrangah ziangvek milem khal tuah hlah uh; 24Ziangahtile Bawipa nan Pathian cu thiik neimi Pathian a si ih ziang hmuahhmuah a kangraltu meisa vek a si.

25“Nan luah dingmi ramah kum reipi nan um ih tu le fa nan neih hnu hmanah ziangbangtuk milem hman tuah tahrat in nan sual lo pei. Milem rian cu Bawipa ih hmaiah thil ṭha lozet a si ih a thin nan hengter ding. 26Cutiin nan tuah ngaingai a si ahcun lei le van saal in tuihsun ah ka lo sim: hi ramah rei nan leeng lo ding, tuanah nan hloral ding. Nan luah dingmi Jordan tiva ralah cun rei nan nung lo ding; siatsuah ṭheh nan si ding. 27Bawipa amah hrimhrim in leitlun miphun pawl lakah a lo ṭhekdarh ṭheh hai ding. Mi malte titham lo lawng nan taang ding. 28Cule minung kutih tuahcopmi khawzing dangdang thing le lungih tuahmi khawzing, khua a hmu thei lomi le a thei thei lomi, rawl a ei thiam lomi le rim a hnim thiam lomi khawzing nan biak ding. 29Cutawkah cun Bawipa nan Pathian cu nan hawl ding ih nan thin le nan lung taktein nan hawl ahcun Amah cu nan tong ding. 30Asinain vansannak nan ton tikah le hi thil hmuahhmuah nan parih a thlen tikah a netnak talah Bawipa ih hnenah nan hoikir sal ding ih a thu cu nan ngai ding. 31Bawipa cu mi zaangfahtu Pathian a si. A lo thlahthlam in a lo siatsuah lo ding; nan pupa hnenah amah rori in thukamnak a tuah mi tla a hngilh lo ding.

32“A liam zomi tikcu, nan seem hlan caan le leilung parih Pathian in minung a tuah caan tiang, dunglam caan thlir in zohhnik uh. Vanhram deng tiang, leilung pumpi hi thlir hnik uh. Hi bangtuk thil nasa hi khui talah a um dah maw? Hi bangtuk thil mangbangza hi zotal in an thei dah maw? 33Meisa sungin Pathian ṭongkam a thei ih a nungmi nanmah vek minung an um dah keel maw? 34Bawipa nan Pathian in Izipt ramih a tuah bangtuk in miphun phunkhat cu ram pakhat sungin suahpi tahrat in amah ih miphun ah a tuah ngamtu pathian dang khui talah an um dah maw? Nan mithmuh rori ah a cahnak le a huham cu a langter ih, natsia le raldonak a thlenter, mangbangza le khawruahhar tampi a tuah ih rapthlakza thil tampi a suahter a si. 35Amah lawng Pathian a si ih a dang pathian a um lo, ti nan theihnak dingah hi thil pawl cu Bawipa in a lo hmuh a si. 36A lo zirh theinak dingah van ihsin a aw a lo theihter ih lei parah meisa a lo hmuhter hai ih cuih sungin nan hnenah a ṭong. 37Nan pupa pawl cu a duhdawt ruangah an tesinfa pawl a hril ih amah rori in a cahnak huham thawn Izipt ram ihsin a lo suah. 38Hi ram hi nan rak nor deuhdeuh tikah nanmah ih ram a si theinak dingah nanmah hnakih a tum deuh le a cak deuh mi miphun pawl cu amah in a dawisuak. 39Curuangah Bawipa cu vancung le leitlun ah Pathian a si, ti kha ciing ringring uhla hngilh hrimhrim hlah uh. Pathian dang a um hrimhrim lo a si. 40Tuihsun ih ka lo pekmi amah ih daan hmuahhmuah hi thlun uhla nanmah le nan tefa pawl ih lamzin cu a tluang ding. Bawipa nan Pathian in sanikhuk tiang nan ta si dingah a lo pek dingmi ramah cun nan um ringring ding a si,” tiah a ti.

Rolnak Khawpi Pawl

41Cule Moses cun, 42mi pakhatkhat in a ral a si lomi pakhat a that pang asile a rol ih a himnak dingah Jordan tiva in nisuahnak lamah khawpi pathum a ret. Hi khawpi pakhatkhatih a rol a si ahcun thah lo ding a si. 43Reuben hrin pawl hrangah tlangpar ramih a ummi Bezer khawpi, Gad hrin pawl hrangah cun Gilead ramih a ummi Ramoth khawpi le Manasseh hrin pawl hrangah cun Bashan ramih a ummi Golan khawpi an si.

Moses In Daan A Pek

44 Bawipa ih daan le thuzirhnak pawl cu Moses in Israel mi pawl hnenah a pek. 45Hi daan pawl cu Izipt ram ihsin an suah hnu, 46Bethpeor khua ihsin khatlam ral, Jordan tiva in nisuahnak lam phairawn ih an um laiah a pek a si. Cuih hmun cu Heshbon khua ih bawi a ṭuantu Amor siangpahrang Sihon ih ram sungah a um. Izipt ram in an suah hnuah Moses le Israel mi pawl in siangpahrang Sihon cu an do ih an neh. 47A ram cu an luah ih Bashan siangpahrang Og ram tla an luah ṭheh. Hi siangpahrang pahnih cu Amor mi pawl siangpahrang an si ih Jordan in nisuahnak lamih a ummi an si. 48Ram an lakmi cu Arnon tiva kapih a ummi Aroer khawpi ihsin Sirion Tlang (Hermon Tlang) tiang a sau ih, 49cuih sungah cun Jordan tiva in nisuahnak saklam Arabah ram hmuahhmuah a tel ih Tipi Thi tla a tel; cule Pisgah tlang hram tiang a tel a si.

Currently Selected:

DAAN PEKSALNAK 4: FCL

Highlight

Copy

Compare