DAAN PEKSALNAK 3

Siangpahrang Og An Nehnak Thu

(Mipum 21.31-35)

1“Cuih hnuah saklam, Bashan ram lamah kan hung ih siangpahrang Og le a ralkap pawl cu kanmah do dingah Edrei khua an thleng. 2Asinain Bawipa in, ‘ṭih hlah! Amah Og siseh, a ralkap pawl le a ram siseh, na kut sungah ka lo pe ding. Heshbon uktu Amor siangpahrang Sihon na tuah vek thotho in a par khalah na tuah ding a si,’ i ti.

3“Bawipa in siangpahrang Og le a minung pawl cu kan kut sungih in pek ruangah pakhatte hman zuah loin kan that ṭheh. 4Cuih tlunah an khawpi hmuahhmuah kan lak; kan lak lomi pakhat hman a um lo. A zatein khawpi sawmruk kan lak. Bashan siangpahrang Og ukmi Argob ram khal a zatein a tel a si. 5Hi khawpi pawl cu ralhruang sang zetzet in an kulh ih kotkhar le kotkalh pawl an nei ṭhepṭhep. Cule kulh lomi khawte pawl tla an rak um ve. 6An khua pawl cu kan siatsuah ṭheh ih Heshbon siangpahrang Sihon ukmi khawsungih kan tuah vek thotho in mipa siseh, nunau le nauhak siseh, kan that ṭheh a si. 7An ṭilva pawl kan lak ih an khawpi pawl cu kan ram ṭheh.

8“Cuih ṭumah Jordan tiva in nisuahnak lam ram pawl Amor siangpahrang pahnih kut in Arnon tiva ihsin Hermon tlang tiang kan lak. 9Hermon tlang cu Sidon mi pawl in Sirion an ti ih Amor mi pawl cun Senir an ti. 10Cuticun Bashan ram siangpahrang Og ih ram hmuahhmuah - hmunrawn khawpi pawl, Gilead le Bashan ram hmuahhmuah le nisuahnak lamah Salekah le Edrei khawpi pawl tiangin kan lak ṭheh a si.”

11Siangpahrang Og cu Refaim mi pawl sung ihsin a neta bikih a rung taangmi a si. A ihkhun cu thir ihkhun a si ih, pi hleili a sau ih pi ruk a kau. Cuih a ihkhun cu Ammon khawpi Rabbah ah atu tiang a um lai.

Jordan In Nisuahnak Lam Ummi Pawl

(Mipum 32.1-42)

12“Cun hi ram hi kan lak tikah Arnon tiva kiangih ummi Aroer khawpi le a kimvel ram pawl le Gilead tlangpar ram le a khawpi pawl cu Reuben le Gad hrin pawl hnenah ka pek. 13A taangmi Gilead ram le Bashan ram zate, Og ukmi Argob ram pumpi in Manasseh hrin a hrek pawl hnenah ka pek a si.”

Bashan ram a zate hin Refaim mi pawl ram an timi a si. 14Cuih Bashan ram, Argob ram pumpi cu Manasseh fapa Jair in Geshur le Maakath ramri tiang a lak. Cuih ramih khua pawl cu amah ih hmin suangin hmin a sak ih atu tiangin Jair khawte pawl tiah an ti lai.

15“Manasseh hrin Makhir hnenah Gilead ram cu ka pek. 16Cule Reuben le Gad hrin pawl hnenah Gilead le Arnon tiva karlak ram cu ka pek. Tivapi laifang cu thlanglam an ramri a si ih Ammon pawl ramih ramri a si mi Jabbok tiva cu saklam an ramri a si. 17Nitlaknak lamah an ram cu Jordan tiva tiang a si. Saklam ah Galilee Tili in thlanglam ah Tipi Thi tiang, cule nisuahnak lamah cun Pisgah Tlang hram tiang an ramri cu a feh.

18“Cuih tlunah hiti in thu ka pek hai a si: ‘Bawipa kan Pathian in hi Jordan tiva in nisuahnak lam ram hi nan luah dingah a lo pek. Atu-ah nan ralkap pawl cu ralthuam thawn thuamter uhla Israel nan unau dang pawl an ram an luah thei venak dingah an hmaiah Jordan tiva ralah fehter uh. 19Nan nupi pawl, nan faate pawl le nan ṭilva pawl, (ṭilva tampi nan nei ti cu ka theihmi a si) cu pawl lawng ka lo pekmi khawpi sungah an um pei. 20Bawipa in Jordan tiva in nitlaknak lamih ram a pekmi an luah hlan le nanmah bangin Bawipa in daihnak thawn cutawk ramih a umter hai hlan lo nan unau dang Israel mi pawl cu nan ṭanpi pei. Cuih hnu lawngah ka lo pekmi ramah nan kir thei ding,’ ka ti.

21“Cule Joshua hnen khalah, ‘Bawipa nan Pathian in siangpahrang pahnihte parih thil a tuahmi na mit rori in na hmu thluh zo. Na do dingmi ram sungih minung pawl par khalah cuvek thotho in a tuah ding. 22Cuti a si ruangah zohman ṭih hlah; Bawipa nan Pathian in nan ai-ah a do ding,’ ka ti.

Kanaan Ram Ah Moses A Luhter Lo

23“Culai ah khan, Bawipa ih hnenah, 24‘Maw Bawipa Pathian, thil mangbangza le thilmak zetzet na tuah dingmi pawl i hmuhmi hi a thawhnak lawng an si lai, tihi ka thei. Van ah siseh, leilung ah siseh, nangmah vekin thilmak zetzet tuah theitu pathian zohman an um lo. 25Maw Bawipa, Jordan tiva cu i tanter awla khatlam ralih ram ṭhazet le tlangpar ram mawizet le Lebanon Tlang cu i zohterta hram aw,’ tiah ka dil ciamco.

26“Sikhalsehla nanmah ih ruangah Bawipa cu ka parah a thin a heng ih ka dilnak cu a ngai lo. ‘Tawk thlang seh! Hi thu cu rel nawn hlah! 27Pisgah tlang parah hung feh awla saklam, thlanglam, nisuahnak lam le nitlaknak lam hung thlir aw. Jordan tiva ral na kai lo ding ruangah na hmuhmi pawl cu ṭhatein zohta aw. 28Joshua khal ṭhatein thu sim aw. Amah cu thazaang pe awla cakter aw, ziangahtile na hmuhmi ram cu luah dingah misenpi pawl amah in a hruai ding a si,’ i ti riangri.

29“Curuangah Bethpeor khua ih khatlam ral phairawn ah kan um a si,” a ti.

Currently Selected:

DAAN PEKSALNAK 3: FCL

Highlight

Copy

Compare