DAAN PEKSALNAK 19

Rolnak Khawpi Pawl

(Mipum 35.9-28; Jos 20.1-9)

1“Bawipa nan Pathian ih a lo pek dingmi ramih a ummi miphun pawl Bawipa in a siatsuah thluh hnu, an khawpi pawl nan lak ṭheh ih cuih ramih nan um tikah, 2cuih khawpi pawl lakin khawpi pathum cu rolnak ah tuah uh. 3Bawipa ih a lo pek dingmi ram cu, lamzin a hlat a nai zoh in, ṭhen thumah ṭhen uhla mithat an rolnak dingah le an himnak dingah ṭhen khatah rolnak khawpi pakhat fingfing a um pei. 4Mi pakhat in a ral a si lomi pakhat, tihrimnak zianghman um lotein a that pang a si ahcun hi khawpi pakhatkhatah a tlan pei ih a him ding. 5Thuṭhimnak ah mi pahnih cu thing hau dingah tupi sungah an feh; zanthing an hau laiah pakhat pa-ih hreitlung fang cu a ha in a tlong ih a rualpa a ngah pang ih a thih a si ahcun thil tisualtu pa cu a tlan pei ih hi khua pakhatkhatah a rol pei ih a him ding. 6Khawpi pathum si loin pakhat lawng a um ahcun mi thattu hrekkhat hrangah cun a hlat tuk ding ih phuhlam a duhtu pa in a man ding ih a thin a sat laiah cuih a mawh lo pa cu a that ding. Thungai-ih ti ahcun a ral a si lo mipa cu tihrimnak um loin a rak that pang a si. 7Curuangah rolnak khawpi pathum ret dingin thu ka lo peknak cu a si.

8“Cun Bawipa nan Pathian in nan pipu hnenih thu a rak tiam bangin nan ram cu a kauhter vivo ih ram a zatein nan luah tikah, 9khawpi dang pathum nan hril lala pei. Ka thupekmi bangtuk in ziang hmuahhmuah nan tuah ih Bawipa nan Pathian cu nan duhdawt ih a thuzirhmi vekih nan nun a si ahcun hi ram cu a lo pe thluh ding. 10Curuangah ka lo fialmi vekin tuah uhla Bawipa ih a lo pek dingmi ram sungah a sual lomi ih thisen a luang lo ding ih mawhphurhnak sungin nan luat ding a si.

11‘Cule thuṭhimnak ah mi pahnih an ral-aw ih pakhat in a ral cu a bawh ih a that hrim ih hi khawpi pakhatkhatah tlan sehla, 12cuvek ih thil a um a si ahcun amah ih khua ih hotu pawl in cupa cu an va kai pei ih phulak a duhtu pa hnenah an pek pei ih cupa cun a that pei. 13Laithat parah zianghman zaangfahnak nan nei lo pei. Israel ram sungin laithat pawl ih thisen suahternak cu cem thluh seh; cuticun nan lamzin a tluang ding.”

Ramri Lungphun

14“Bawipa nan Pathian in a lo pek dingmi ram sungah hlanlaipi ihsin an rak phun ciami lungphun, na innhnen pa-ih ramri lungphun cu va ṭhawn sak hlah.

Theihpitu Hrangah Daan

15“Mi pakhat a mawh a si, tiih sualpuh theinak dingah cun theihpitu pakhat lawng cu a tawk lo; a mal bikah pahnih an um a ṭul a si. 16Mi pakhat in a dang pakhat kha siatsuahter duh ih sual a puh hrim tikah, 17an pahnih in Pathian biaknak hmunah puithiam pawl le cutawkih a ṭuantu thuṭhentu pawl hmaiah an ding ding ih an thu cu rel a si ding. 18Thuṭhentu pawl in an thu cu felzet le kimzetin an zingzoi ding; a dik lo thutheitu, a dik loin sual a puh ih thuphan a si, ti an theih fiang a si ahcun, 19sualpuh a tuartu pa cun tuarter a duhnak zat in a dik lo thutheitu pa cu a tuarter pei. Cutiin sualpuh hrimnak thil ṭha lo cu nan rehter pei. 20Mi hmuahhmuah in acuih thu cu an theih tikah ralrinnak ah an hmang ding ih cuvek thil ṭha lo cu zohman in an tuah nawn lo ding. 21Zohman zaangfah hlah uh; nunnak ai ah nunnak, mit ai ah mit, ha ai ah ha, kut ai ah kut, ke ai ah ke a si pei.”

Currently Selected:

DAAN PEKSALNAK 19: FCL

Highlight

Copy

Compare