DAAN PEKSALNAK 18

Puithiam Pawlih Covo

1“Israel ram sungah cun puithiam phun a si mi Levi hrin pawl cun leiram covo an nei lo pei. Bawipa hnenih pekmi thawinak le a dangdang an pekmi pawl in an cawm-aw ding. 2Hrin dang pawl vekin leiram comi an nei lo pei. Bawipa ih a tiam hai vekin an covo cu puithiam hnaṭuan a si.

3“Zokhal in cawcang, a si lole tuu thawinakih a pek tikah a liang, a kha le a pumpi pawl cu puithiam hnenah a pek pei. 4Cuih tlunah puithiam pawl in hmaisa bikih lakmi rawl, sabitti, olif siti le tuuhmul pawl an co pei. 5Nan hrin hmuahhmuah lakah Levi hrin pawl cu Pathian in kumkhua, Bawipa hmin in, a hna ṭuantu dingah a hrilmi an si.

6“Levi mi in a duh a si ahcun Israel ram khuitawk khua khal in Pathian biaknak hmunah a ra pei ih, 7cutawkih Levi mi pawl vekin Bawipa Pathian ih puithiam hna cu a ṭuan pei. 8Puithiam dang pawl ih ngahzat in rawl cu a ngah ding ih a innsang pawl ih an kuatmi khal a mahte a co thotho pei.

Khawvel Daan Ralrinnak

9“Bawipa nan Pathian ih a lo pek dingmi ram nan thlen tikah cutawkih a rak um ciami miphun pawl ih fihnungza umtlandan pawl cu thlun hlah uh. 10Biakṭheng parih meisa ah nan faale pawl cu thawinakah pe ve hlah uh; nan minung pawl lakah tinzohthiam siseh, dawithiam siseh, aizingthiam siseh, pol siseh, 11miham thiam siseh, mitkher thiam siseh, mithi kawh thiam siseh, cupawl a tuahtu zohman um hlah hai seh. 12Cubangtuk fihnungza thil a tuahtu pawl cu Bawipa nan Pathian huatmi an si; curuangah a si hmaiih nan nor deuhdeuh tikah hi miphun pawl a dawisuahnak cu! 13Bawipa nan Pathian ih rintlak taktak si dingin um uh.”

Pathian In Profet A Thlah Ding

14“Nan luah dingmi ram minung pawl cun dawithiam pawl le aizingthiam pawl ih thu an ngai; asinain Bawipa nan Pathian cun cubangtuk a tuahtu cu a zoh men lo ding. 15Bawipa nan Pathian cun nanmah ih unau sungin keimah vek profet nanmah ih hrangah a suahter ding ih cuih thu cu nan ngai sawn pei. 16Sinai Tlang parih nan tonkhawm-awk laiah khan Bawipa ih ṭong cu nan hna ih theihsaal nawn lo dingin nan dil; nan hnenih a langnak meisa tleu tla nan zoh ngam lo, ziangahtile kan thi thluh ding nan ti.

17“Curuangah Bawipa in ka hnenah, ‘Thil dikzet an dil a si. 18Anmah lakin nangmah vek profet #18.18 Profet: timi hi ‘profet pawl’ ti tla a si thei. ka suahter ding. Cuih profet cu a ṭong dingmi ka sim ding ih ka thupekmi hmuahhmuah cu misenpi hnenah a sim ṭheh ding. 19Profet pakhatkhat in keimah ih hminin thu a sim tikah a thu a ngai lotu cu keimah in ka hrem ding. 20Sikhalsehla ka fial lomi thu ka hminih thu a sim a si ahcun a thi ding. Khawzing dangdang pawl hmin in a sim khalle a thi thotho ding,’ i ti.

21“Profet ih thusimmi cu Bawipa ih hnenin a rami a si maw si lo, tiih nan mang a bang caan a um ding. 22Profet pakhat cu Bawipa ih hminin thu a sim ih a thusimmi vekih a can suak lo a si ahcun Pathian hnenin a rami thu a si lo ding. Cuih profet cu amah ih palungin thu a sim ruangah nan ṭih lo pei.”

Currently Selected:

DAAN PEKSALNAK 18: FCL

Highlight

Copy

Compare