DAAN PEKSALNAK 20

Raldo Tikih Thlun Ding Daan

1“Raldo dingin nan feh ih nan ral pawl cu minung in siseh, rang le rangleng in siseh, nanmah hnakin an tam deuh ngaingai a si, ti nan hmuh tikah va ṭih hlah uh. Bawipa nan Pathian, Izipt ram in a lo runsuaktu cu nan hnenah a um ding. 2Nan do-awk hlanah puithiam cu nan ralkap pawl ih hmaiah a ra suak ding ih anih in, 3‘Maw Israel mi pawl, ngai uh! Tuih sunah hin nan ral pawl nan do ding. Nan ral ziangzat an si khalle nan thin nau hlah uh, ziang khal ṭih hlah uh, phang thlohthlo khalin um hlah uh. 4Bawipa nan Pathian cu nan hnenah a um ding ih nehnak a lo pe ding a si,’ tiah a au ding.

5“Cule ralbawi pawl in an ralkap pawl hnenah, ‘Nan lakah inn thar a sak ih a lut hrih lomi nan um maw? Nan um asile nan inn ah va kir uh. Nan thih pang ahcun midang in nan inn an lut ding. 6Nan lakah sabit hmuan thar a tuah ih sabit rah a lo hrih lomi nan um maw? Nan um a si ahcun nan inn ah kir uh. Nan thih pang ahcun midang in nan sabit hmuan an co ding. 7Nan lakah nupi ṭhi dingah fala a hamtu nan um maw? Nan um asile nan inn ah kir uh. Nan thih pang ahcun nan hammi fala cu mi dangin an ṭhi ding,’ tiah an ti ding.

8“Cuih tlunah ralbawi pawl in an ralkap pawl hnenah, ‘Nan lakah thin a naumi le ṭihphang ih a ummi nan um maw? Nan um asile nan inn ah kir uh. Cuti a si lo ahcun nan rualpi dang pawl ih thinlung nan nauter thluh ding,’ an ti ding. 9Ralbawi pawl in ralkap pawl hnenih thusimnak an ṭheh tikah a bur a burih ralkap pawl hruaitu dingah hotu hril an si pei.

10“Khua pakhat nan do tikah hmaisabik ah remnak thu ngaihtuah uh. 11An kotka an ong ih remnak kan duh, an ti ahcun an zatein nan salah kai ṭheh uhla nan hna ṭuanter uh. 12Asinain khawsungmi pawl in remnak tuah an duh lo ih raldo an duh sawn a si ahcun cuih khua cu kulh ṭheh uh. 13Bawipa in nehnak a lo pek tikah khawsungih mipa hmuahhmuah pakhat hman zuah loin that ṭheh uh. 14Cule nanmah ih hrangah nunau, nauhak, ṭilva le thildang hmuahhmuah cu nan lak thei. Nan ral pawl thilri hmuahhmuah cu nan duh vekin hmang uh. Bawipa in nan hnenah a lo pek a si. 15Nan umnak ding ramsung si loin lamhlapi ih a ummi khawpi pawl khal cubangtuk thotho in nan tuah pei.

16“Sikhalsehla Bawipa nan Pathian ih a lo pek dingmi ram sungih khawpi pawl nan lak tikah cun khawsungmi an zatein that ṭheh uh. Thaw a neimi pakhat hman nan zuah lo pei. 17Bawipa ih thupeknak bangtuk in Hit mi, Amor mi, Kanaan mi, Periz mi, Hiv mi le Jebus mi pawl cu an ci hmit ṭheh uh. 18Cuti nan ti lo ahcun an khuazing an biak tikih an thil tidaan fihnungza pawl tuah ve dingah an lo zirh hai ding ih Bawipa nan Pathian ih parih nan sual pang ding.

19“Khawpi pawl laak nan tum ih caan reipi nan kulh hmanah rah a neimi thingkung pawl cu hreitlung thawn hau hlah uh. A rah pawl cu ei uhla a kung pawl cu siatsuah hlah uh; nan ral an si lo. 20Thingkung dang rah nei lo pawl cu nan duh ahcun hau uhla cuih khawpi nan lak lai hlan lo nan kulh ih nan ṭannak donhleisang tla-ah hmang uh.”

Currently Selected:

DAAN PEKSALNAK 20: FCL

Highlight

Copy

Compare