DAAN PEKSALNAK 17

1“Bawipa nan Pathian hnenah raitluang lomi cawcang a si lole tuu cu thawinakah nan pe lo pei; ziangahtile Bawipa nan Pathian ih huatmi a si.

2“Thuṭhimnak ah nan khawsungah nunau siseh, mipa siseh, 3Bawipa ih thupekmi bal tahrat in khawzing dang, a si lole ni maw, thlapi maw, arsi pawl maw a biak ih cu pawl cu a rian. Cuticun Bawipa ih parah a sual ih a thukamnak a balsiat a si, 4ti nan theih a si ahcun felzet le kimzet in nan zingzoi pei. Cuvek thil ṭha lo cu Israel mi lakah a um ngaingai a si ahcun, 5a tuahtu cu hnarleng ah nan suah pei ih lungto in nan deng that pei. 6Theihpitu pahnih a si lole pathum an um ahcun amah cu thah a si pei; asinain theihpitu pakhat lawng a um ahcun thah a si lo pei. 7A thu theihpitu pawl cun lungto in an deng hmaisa bik pei ih cuih hnuah a dang pawl in an deng ve pei; cuticun hi thil borhhlawh cu nan rehter pei.

8“Cun thah awknak thu ah maw, leiram le thilri cuh-awk thu-ah maw, taksa tuahmawhnak, lukuai hnacat thu-ah maw, voikhat khat cu hi thuṭhentu pawl ih an rel thei lomi thu a um ding. Cutikah Pathian ih a hril dingmi biaknak hmunah feh uhla, 9cuih thu cu Levi mi puithiam le cutawkih an retmi thuṭhentu pawl hnenah va thlen uh; anmah in rel hai seh. 10Anmah in an relcat pei ih an relcat vek rori in nan tuah pei. 11An thurel catmi cu nan pom pei ih an thusimmi vek rori in nan thlun pei. An relcatmi ihsin vorhlam ah siseh, kehlam ah siseh, nan pial hrimhrim lo pei. 12Cuih thurel cattu - puithiam siseh, a si lole thuṭhentu siseh, an thu nan ngai lo a si ahcun a ngai lotu cu thah a si pei. Cuticun Israel miphun sungih thil ṭha lo cu nan cemter pei. 13Cumi cu misenpi in an theih tikah ralrinnak an nei pei ih cuvek cu an tuah ngam nawn lo ding.”

Siangpahrang ih Thlun Dingmi

14“Bawipa nan Pathian ih a lo pek dingmi ram nan luah ih umhmun nan khuar ṭheh tikah nan kiangkapih a ummi miphun pawl vekin siangpahrang neih ve nan duh leh ding. 15Cutiih nan hun duh ngaingai tikah Bawipa ih a hrilmi kha nan hril thei ve nak dingah ralring uh. Cuih siangpahrang cu nanmah ih miphun sungin a si ding; ramdangmi cu siangpahrang ah nan tuah lo pei. 16Siangpahrang cun a ralkap hrangah rang tampi nei hlah seh; rang lei dingah Izipt ramah mi thlah hlah seh, ziangahtile Bawipa in amah ih minung pawl cu Izipt ramih vung thlengsal lo dingin thu a pek zo a si. 17Siangpahrang cu nupi tampi nei ding a si lo, ziangahtile Bawipa ih lamzin in a pialter ding. Sui le ngun khawl tahrat in milian si duh hlah seh. 18Siangpahrang a can tikah Levi mi puithiam pawl in felteih an nganmi Pathian ih thukham le daan pawl khumnak cabu pakhat cu nei seh. 19Cuih cabu sungih a ummi daan pawl cu feltein a thlunnak dingah le Bawipa ṭihzah a thiamnak dingah cabu cu a kiangah re in a nunsung hmuahhmuah siar ringring seh. 20Cutiih a tuah asile a unau dang Israel mi pawl hnakin ka ṭha deuh a si, tiah a ruat-aw lo ding ih Bawipa ih thupekmi ihsin a peeng lo ding. Cule amah le a tefa pawl in Israel ram cu san tampi an uk ding.”

Currently Selected:

DAAN PEKSALNAK 17: FCL

Highlight

Copy

Compare