DAAN PEKSALNAK 16

Lantak Puai

(Suah 12.1-20)

1“Bawipa nan Pathian cawimawinak ah Lantak puai cu Abib thla #16.1 Abib thla: timi hi Nisan thla thawn a bang-aw; Hebru mi ih thla hmaisa bik a si ih March thlahrek le April thlahrek a ceem. ah nan tuah pei; ziangahtile cuih thla sung zankhat zanah Izipt ram ihsin a lo suah hai a si. 2Pathian biaknak hmunah feh uhla nan tuu a si lole nan caw pakhatkhat Bawipa nan Pathian sunloihnak ah le Lantak Puai rawl hrawmnak hrangah that uh. 3Hi rawl hrawmnak nan ei tikah thilnu telmi sang nan ei lo pei. Izipt ram ihsin zamrangzet ih suak nan si bangin ni sarih sung thilnu rawi lo sang ei ding nan si. Nan harsatnak a lo theih saaltertu ah hi sang cu nan ei pei ih nan nunsung hmuahhmuah ah Izipt ram in nan suah ni cu nan hngilh lo pei. 4Nan ram sungah zohman in a inn sungah thilnu cu ni sarih sung a ret lo pei. Cule nan puai tuah ni hmaisa bik zanlam ih thahmi sa cu a thaizing a thlen hlanah nan ei ṭheh pei.

5“Lantak Puai nan tuahnak tikih thawinak sa cu Bawipa nan Pathian ih a lo pek dingmi khawsung nan duhnak poh ah that hlah uh. 6Hmun pakhat, Pathian in a hmin umnak dingih a hrilmi nan biaknak hmun lawngah nan that pei; cule Izipt ram in nan suah tikcu, nitlak zawngte-ah nan that pei. 7Tidai in suang uhla biaknak hmunah cun ei uh; cule a thaizing ah nan inn ciarah tlung uh. 8Ni ruk sung thilnu rawi lo sang nan ei pei ih a ni sarihnak ah Bawipa nan Pathian bia dingah pumkhawm uhla cuih ni ahcun zianghman ṭuan hlah uh.”

Rawl Laak Puai

(Suah 34.22; Pui 23.15-21)

9“Rawl laak nan thawh ni in siar uhla zarh sarih a kim tikah, 10rawl laak puai cu tuah uh. Bawipa nan Pathian thangṭhatnak ah hi puai cu tuah uhla amah ih thlawsuah nan donmi cu nan sianzat - tam a dongtu in tam deuh, mal a dongtu in mal deuh, lungthote in a hnenah nan pek pei. 11Bawipa ih hmaiah nan fanu nan fapa pawl, nan hnen-um nunau mipa pawl, nan khawsungih a ummi Levi mi pawl le ramdangmi pawl, nupa nei lo farah ngakṭah le nuhmei pawl thawn lungawiin umtlang uh. Bawipa nan biaknak hmunah cun lungawite in um uh. 12Izipt ramih sal nan rak taan lai kha vun ruat uhla hi thupekmi pawl cu feltein thlun uh.”

Puanthlam Puai

(Pui 23.33-43)

13“Nan rawl nan ciil thluh hnu le nan sabit nan rial ṭheh hnuah Puanthlam Puai#16.13 Puanthlam Puai: timi hi Izipt ram ihsin Israel mi an suak ih Sinai Nelrawn ramṭhing ih an khualtlawn theih saalnak ah khawlengah an suak ih deu sungah an um ṭheu. Kum Thar Puai tiah tla an ko. Hebru nithla siarnak thla sarih thla, Tishri an timi ah an tuah ih October thlahrek le September thlahrek a ceem. cu ni sarih sung nan tuah pei. 14Nan khawsungih a ummi nan fanu nan fapa pawl, nan hnen-um nunau mipa pawl, Levi mi pawl le ramdangmi pawl, nupa nei lo farah ngakṭah pawl le nuhmei pawl thawn lungawi zetin puai cu nan tuah pei. 15Pathian nan biaknak hmunah hi puai cu ni sarih sung tuah tahrat in Bawipa nan Pathian cu thangṭhat uh. Bawipa in nan lo rawl le nan hnaṭuannak ah thlawsuah a lo pek ruangah nan lungawi uh.

16“Nan hrin zate sungih mipa hmuahhmuah cu Bawipa biaknak hmunah kum khatah voithum nan ra pei. Lantak Puai, Rawl Laak Puai le Puanthlam Puai ah nan ra pei. Zozo khal laksawng nan keng ciar ding ih, 17Bawipa ih thlawsuah tam a dongtu in tam deuh, mal a dongtu in mal deuh, Bawipa nan Pathian hnenah laksawng nan keng ciar pei.”

Dingte Ih Thuṭhennak

18“Bawipa nan Pathian ih a lo pek dingmi khawpi sungah nan hrin ciar in thuṭhentu le a dang upa pawl nan hril ciar pei. Hi thuṭhentu pawl in misenpi pawl ih thu cu namnuai cuangmi nei loin an ṭhen pei. 19Dik lozet le ṭanbul nei in thu an ṭhen lo pei; cule nawhthuh tla an lak lo pei, ziangahtile nawhthuh cun mifim le mifel pawl ih mit tiangin a cawtter ih an thuṭhenmi cu a sualter ṭheu. 20Thudik le thuding lawnglawng nan hawl pei; cutiin nan nung asile Bawipa nan Pathian ih a lo pek dingmi ram cu nan luah ding ih caan reipi nan nung ding.

21“Bawipa nan Pathian hrangih biakṭheng nan dawl tikah ziangbangtuk thing hman a kiangkapah biak dingah nan phun lo pei. 22Cule ziangvek lungto hman biak dingah nan phun lo pei; cu pawl cu Bawipa ih huat zawng an si.”

Currently Selected:

DAAN PEKSALNAK 16: FCL

Highlight

Copy

Compare