2 SIANGPAHRANG 5

Naaman A Damter

1Naaman cu Siria ralkap hotu ralbawipa pakhat a si ih amah thawngin Siria ralkap pawl cu Bawipa in a bawm ih an ral pawl an neh ringring. Curuangah an siangpahrang in ralbawi Naaman cu a uar zetih a upatzet fawn. Ralbawi makzet a si; asinain phaarnat a tuar ngelcel. 2Voikhat ah Israel mi an do laiah Siria ralkap pawl in Israel nauhak nu pakhat an kai. An hruai ih Naaman nupi ih hnen-um ah a cang. 3Nikhat ah a bawinu hnenah, “Ka bawipa hi Samaria ih a ummi profet hnenah va feh sehla ka va duh so! A phaarnat hi a damter rori ding,” tiah a ti. 4Cuih thu cu Naaman in a theih tikah siangpahrang hnenah a va feh ih a va sim. 5Cutikah siangpahrang in, “A ṭha, va feh awla hi ka cakuat hi Israel siangpahrang va pe phah aw,” tiah a ti.

Naaman cu a feh ih ngun tangka thawng sawmthum, sui tlep thawngruk le thleng awknak hnipuan zuun hra a keng. 6A kenmi cakuat sungah cun, “Hi cakuat a lo petu hi ka ralbawi Naaman a si ih na rak theihnak dingah hi ca hi ka lo kuat. A natnak hi rak damter hram aw,” tiah a ngan.

7Cuih cakuat cu Israel siangpahrang in a rak siar tikah mangbang in a hnipuan a thlek ṭheh ih, “Ziangtin so Siria siangpahrang in hi pa hi rak damter aw tiah i ti men? Nunnak le thihnak huham nei Pathian ah maw i ruah? Keimah thawn tawh awknak a hawl a si ko ding,” tiah awloksong in a ti.

8Cuih thu cu profet Elisha in a theih tikah siangpahrang hnenah cun, “Ziangah so riahsia in na hnipuan na thlek ṭheh? Israel ram sungah profet a um a si, ti a theihnak dingah cupa cu ka hnenah ratter aw,” tiah thu a cah.

9Curuangah Naaman cu a rang le a rangleng pawl thawn a feh ih Elisha innih kotka ah a va ding. 10Elisha in a hnen-um pakhat a hei thlah ih Naaman hnenah cun, “Feh awla Jordan Tiva ah voi sarih in ti va bual aw. Na titsa an cerh sal ding ih na dam ding,” tiah a va sim. 11Cutikah Naaman cu a thinheng in a kir ih, “Cu lawmmam! Ka hnenah ra in Bawipa a Pathian hnenah thla cam tahratin ka natnak hma parah a kut suangin i damter hmang ding, tiah ka ruat naón cuvek zianghman a um ual lo. 12Cuih tlunah Damaskas ih a luangmi Abana le Pharpar tiva pawl cu Israel ramih tiva hnakin an ṭha deuh a si lo maw? Cuih tiva pawl ah ti bual ningla ka dam sawn lo ding maw?” tiah a phunzai ciamco. Cuticun thinheng in a kir.

13Cutikah a hnen-um pawl in an hei naih ih, “Bawipa, profet in thil harsa deuh tuah dingah lo fial sehla na tuah ko ding a si. Ziangah so tiva sungih ti bual ih dam cu na duh lo?” tiah an ti. 14Curuangah Naaman cu Jordan Tiva ah a vung feh ih, ti sungah cun Elisha ih ti vekin voi sarih a hnim aw ih, cuṭheh cun a dam ngaingai! A taksa cu a dam ṭheh ih naute taksa bangin a ngil lellel. Cuticun mi thiangfai ah a cang. 15Cule Elisha hnenah cun a minung pawl thawn an va kir ih, “Atu cun Israel ramih Pathian siar lo leilungtlun khuitawk hmanah Pathian dang a um lo, ti ka thei zo. Curuangah Bawipa, ka lungawinak laksawng hi i saang hram aw,” a ti.

16Elisha in, “Ka biakmi a nung Pathian hmin saal in ka lo sim: laksawng zianghman ka la lo ding,” tiah a ti.

A laksawng la dingah Naaman cun a hneek rero naón Elisha in a duh lo. 17Cule Naaman in, “Ka laksawng i co sak thei lo a si ahcun ka khua ih phurh dingah laak pahnih phur in leilung i lakter hram aw;#Leilung i lakter hram aw ti tikah culai ahcun khawzing cu amah ih leiram lawngah biak theih a si, tiah an rak zum ruangah a si. ziangahtile atu thok ihsin Bawipa ih hnenah siar lo pathian dang zohnen hmanah raithawinak le mei-ur thawinak pawl cu ka pe nawn lo ding. 18Siria khawzing Rimmon biakinn ah ka siangpahrang a feh ih ka thlun tikah anih in khawzing a biak tikah cun ka biak ve a ṭul ding ih cutik lawngah Bawipa in i ngaithiam hram seh. Bawipa cun i ngaithiam ko ding,” tiah a ti.

19Cutikah Elisha in, “Damte in va feh aw,” a ti. Cule Naaman cu a feh.

Asinain malte lawng a feh man. 20Elisha ih hnen-um pa Gehazi in, “Ka bawipa in zianghman laksawng lak loin Naaman a fehter. Siria ralbawipa ih a pekmi cu saan ding a si naón! A nungmi Bawipa ih hmin saal in ka sim: ka dawi dingih ziangtal ka dil ding,” tiah a ti. 21Curuangah Naaman cu a dawi. Naaman in a dunglam ih a ra tlan rero mi pakhat a hmuh tikah a rangleng par ihsin a ṭum duak ih a rak tong ih, “Thupoi a um maw?” tiah a rak sut.

22Cutikah Gehazi in, “Thupoi zianghman a um lo. Asinain Efraim tlangpar ramih profet pawl lakin minung pahnih an ra thleng ih an hnenah ngun tangka thawngthum le hnipuan thleng awknak zuun hnih ka bawipa in pek a duh ih cumi cu nangmah in na rak pe thei pei maw ti lo sim dingah i thlah a si,” a ti.

23Naaman in, “Ngun tangka thawngruk in la aw,” a ti. Ngun tangka cu dip pahnih sungah a thun sak ih la dingin a hneek. Cumi le thleng awknak hnipuan zuun hnih cu a hnen-um pahnih a phurh terih Naaman ih thupeknak bangin Gehazi ih hmaiah cun an feh. 24Elisha umnak tlang an thlen tikah Gehazi in dip pahnih cu a lak ih inn sungah a ret. Cuih hnuah Naaman ih hnen-um pahnih cu a kirter. 25Inn sungih a ra lut sal tikah Elisha in, “Khuiah so na feh?” tiah Gehazi cu a sut.

Gehazi in, “Khuitawk hmanah ka feh hrimhrim lo,” tiah a pheh.

26Sikhalsehla Elisha cun, “Naaman cu a rangleng in a ṭum ih a lo ton laiah khan ka thlarau in na hnenih tel ve lo ah maw si i ruah? Atuih caan hi paisa le hnipuan, olif hmuan le sabit hmuan, tuu le caw, salnu le salpa, laak caan a si lo. 27Asinain Naaman ih nat in a lo kai ding ih nangmah le na tesinfa pawl cu cuih natnak a kumkhua in nan nei ta ding a si,” tiah a ti.

Gehazi cu lengah a suak ih cuih nat cu a tuar ngaingai - a vun cu vur bangin a rang ṭheh.

Currently Selected:

2 SIANGPAHRANG 5: FCL

Highlight

Copy

Compare