2 SIANGPAHRANG 6

Hrei Fang An Ngah Sal

1Voikhat ah Elisha ih ho mi profet pawl cu Elisha hnenah an ra ih, “Zohhnik aw, kan umnak hi a fate tuk. 2Kan umnak inn a tum deuh ih sak dingah thing hau dingin Jordan ah in fehter aw,” tiah an ti.

Elisha in, “A ṭha, feh uh,” a ti.

3Cule profet pakhat in feh ve dingah Elisha cu a sawm ih a lung a kim. 4Cule an zatein an feh tlang. Jordan an thlen tikah thing cu an hau. 5Pakhat pa in thing a hau laiah rinlopi-in ti sungah a hrei fang a tla pang. “Ailaw, ka bawipa, ziangtinso ka tuah ding? Ka saan mi a si fawn,” tiah a au ciamco.

6Elisha in, “Khuitawk zawn ah so a tlak?” tiah a sut.

Cupa cun a tlaknak zawn cu a sim. Cutikah Elisha in funghreu pakhat a saat ih tidai sungah a vun hlon ih hrei fang cu a hung phuan. 7Elisha in, “Vun la aw,” a ti ih cupa cun a vun dawh ih a lak.

Siria Ralkap An Sung

8Voikhat ah Siria siangpahrang in Israel ram a do. A ralbawi pawl thawn an tongkhawm aw ih, “Cutawk zawn, khatawk zawn in nan nam pei?” tiah thu a pek. 9Cule Elisha in Israel siangpahrang hnenah, “Cutawk, khatawk ahcun feh hlah uh. Siria ralkap pawl in an lo bawh a si,” tin thu a cah. 10Curuangah Israel siangpahrang in cutawk lamih a fehmi ralkap pawl cu ralrinnak a pek ih ralring zetin an um. Cuticun voi tampi an luat.

11Cumi cu Siria siangpahrang in a theih tikah a thin a heng ngaingai. A ralbawi pawl a ko ih, “Zoso Israel siangpahrang lamah a ṭangtu kan lakah a um?” tiah a sut.

12Cutikah a ralbawi pakhat in, “Maw siangpahrang, zohman in kan lo zuar lo. Na khaan sungih na relmi na thuthup hman kha profet Elisha in Israel siangpahrang hnenih a sim cingcing ruangah a si,” a ti.

13Siria siangpahrang in, “Cupa ih umnak cu i sim uhla ka kai ding,” tiah a ti.

Elisha cu Dothan ah a um, ti ih an sim tikah, 14rang le rangleng pawl thawn ralkap tampi cutawkah a hei thlah. Dothan khua cu zanah an va thleng ih an kulh ṭheh. 15A thaizing zingthlapit ih Elisha ih hnen-um pa a thawh tikah inn lengah a va suak ih, Dothan khua kulhtu Siria ralkap pawl, an rang le rangleng pawl thawn an tiar awk ṭhepṭhep kha a hmu. Elisha hnenah a vung tlan ih, “Ailaw, bawipa, kan cem a si! Ziangtin so kan um ding?” tiah thinphang in a au.

16Cutikah Elisha in, “Na thinphang hlah; annih hnenih a ummi hnakin kannih hnenih a ummi an tam sawn,” a ti. 17Cule Bawipa ih hnenah thla a cam. “Maw Bawipa, a mit run vaangter awla khua run hmuhter aw,” a ti. Bawipa in a thlacamnak cu a run thei ih Elisha ih hnen-um pa cun khua a hun thlir tikah Elisha ih kiangkap tlangtluan hmuahhmuah cu rang le meisa rangleng in an khah ṭhepṭhep kha a hmu.

18Siria ralkap pawl in an run nam tikah Elisha in thla a cam ih, “Maw Bawipa, hi ralkap pawl hi an mit run cawter aw,” a ti. Bawipa in a thlacamnak cu a run thei ih an mit a cawtter ṭheh ngaingai. 19Cule Elisha cu an hnenah a va feh ih, “Nan lamzin nan hlo a si. Nan hawl reromi khua cu himi a si lo. I thlun uhla nan hawl mipa umnak ah ka lo hruai hai ding,” tiah a ti. Cuticun Samaria ah a hruai hai.

20Khua sungih an thlen vete in Elisha in thla a cam ih, “Maw Bawipa, an mit run damter awla khua hmu hai seh,” a ti. Bawipa in a thlacamnak cu a run thei; an mit a run damter ih Samaria khua sungih an um kha an hmu.

21Israel siangpahrang in Siria ralkap pawl a hmuh tikah, “Bawipa, hi ralkap pawl hi ka that thluh pei maw?” tiah Elisha a sut.

22Cutikah Elisha in, “Na that lo pei. Ral nan donak ih nan kaihmi ralkap pawl hman nan that lo pei. An ei ding ti le rawl pe hai uhla an siangpahrang hnenah tlung hai seh,” tiah a ti. 23Curuangah Israel siangpahrang in anmah ih hrangah rawl ei puai tumzet a tuahsak ih an in an ei ṭheh hnuah Siria siangpahrang hnenah an tlung. Cuih ṭum thokin Siria ralkap pawl in Israel ram an rung do nawn lo.

Samaria An Siim

24Tikcu a hung rei deuh tikah Siria siangpahrang Benhadad in a ralkap hmuahhmuah a kokhawm ih Israel a do ih Samaria khawpi cu a kulh ṭheh. 25Cutiih caan reipi a kulh ṭheh ruangah cun Samaria khua sungah rawl a har ciammam ih laak lu pakhat cu ngun tangka sawmriat a man ih tlangpurun mehtok kilh khatah ngun tangka fangnga a man.

26Nikhat ah Israel siangpahrang cu khawpi kulhnak lungdawl kapih lam a leen laiah nunau nu pakhat in, “Maw siangpahrang Bawipa, i bawm hram aw,” tiah a auh.

27Siangpahrang Bawipa in, “Bawipa Pathian in a lo bawm lo a si ahcun kei in ziangso ka lo bawm thei ding? Sangvut le sabit nei ah maw si i ruah? 28Ziang so na poi?” tiah a ti.

Nunau nu in, “Kan dungah hi nunau nu hin, ‘Na faate kan ei pei ih, thaisun ah kei ih faate kan ei leh pei,’ tiah i ti. 29Curuangah ka faate cu kan suang ih kan ei thluh. A thaisun ah na faate kan ei thlang pei, ka ti naón a thuphlo a si,” tiah a ti.

30Cuih thu cu siangpahrang in a theih tikah a riahsia in a hnipuan a thlek ṭheh. Khawpi kulhnak lungdawl parih a feh laiah a kiangkap ih a ummi pawl in a hnipuan hnuai ah buri a hruh kha an hmu. 31Cule siangpahrang bawipa cun, “Tuihsun rori ih Shafat fapa Elisha a hngawng ka tan lo a si ahcun Bawipa in keimah i that seh,” a ti. 32Cule Elisha kai dingin mi a thlah.

Culai ah Elisha cu a inn ah a rak um ih upa hrekkhat pawl in an rak leeng. Siangpahrang ih thlahmi milai a ra thlen hlan deuh ah Elisha in, “Khi laithat pa in keimah that dingah mi pakhat a rak thlah a si,” tiah upa pawl cu a sim. “A thlah mipa a ra thlen tikah sangka khar uhla inn sungah lutter hlah uh. Siangpahrang amah khal a ra thleng cing ve ding,” a ti. 33Cutiih a ṭong hman a cem hlanah siangpahrang cu a ra thleng ngaingai ih anih in, “Hi bangtuk harsatnak kan parih a thlengtertu hi Bawipa a si. Ziangtin so amah ih bomnak cu ka rin thei nawn ding?” a ti.

Currently Selected:

2 SIANGPAHRANG 6: FCL

Highlight

Copy

Compare