2 SIANGPAHRANG 4

Elisha In Farah Nuhmei A Bawm

1Profet burpi sung ihsin profet pakhat ih nupi cu Elisha hnenah a feh ih, “Bawipa, na salpa ka pasal in i thih san. Na theih vekin amah cu Pathian duhzettu a si. Asinain atu-ah lei a baak mipa a ra ih ka fapa pahnihte leiba ai-ah sal ah kaih a tum a si,” tiah a ra ti.

2Cutikah Elisha in, “Ziang so ka lo tuah sak ding? Inn ah ziangso na neih?” tiah a sut. Anih in, “Olif siti langkhat siarlo zianghman neihmi dang ka nei lo,” tiah a sim.

3Elisha in, “Va feh awla na innhnen pawl hnen ihsin palang lawng tampi in va saang aw. 4Cuthluh in nangmah le na fapa pahnih cu inn sungah lut uhla sangka khar uhla palang lawng sungah cun na siti palang sungih siti cu than vivo uh. An khah vete in palang pawl cu a dangah re cingcing uh,” a ti.

5Curuangah nuhmei nu cu a fapa pawl thawn inn sungah an lut ih sangka a khar hnuah, a fapa pawl ih rak kenmi palang sungah a neih cia mi siti cu a thun vivo. 6Palang hmuahhmuah khat ṭheh ko ih a thun hnuah, “Palang lawng dang a um lai maw?” tiah a sut. A fapa pakhat in, “Palang lawng dang a um nawn lo,” tiah a ti. Cutikah siti a thlet reromi cu a pit ve. 7Profet Elisha hnenah cun a va feh sal ih, Elisha in, “Na siti zuar awla na leiba hmuahhmuah sam thluh aw. Cuih tlunah nangmah le na fapa pawl nunnak dingah paisa hlei a um hrih thotho ding,” a ti.

Elisha Le Shunem Khua Milian Nu

8Nikhat ah Elisha cu Shunem khua ah a feh. Cuih khua ahcun nunau milian pakhat a um ih Elisha cu rawl ei dingah a ko ih, 9cuih thok ihsin Shunem khua a thlen tinte in cuih inn ah Elisha cu rawl a ei ringring. Cule a pasal hnenah, “Kan innih a ra ringring pa hi mi thianghlim a si ding tiah ka zum. 10Kan inn diphun parah khaan pakhat kan tuahsak pei ih cuih khaan sungah ihkhun pakhat, cabuai pakhat, tokham pakhat le mei-inn pakhat kan retsak pei ih in ra tlawn tinin cutawkah a riak ṭheu pei,” tiah a ti.

11Nikhat cu Shunem khua ah Elisha cu a ra tlawng ih a khaan sungah cun a hung cawl. 12Cule a hnen-um pa Gehazi cu, “Inntek nu va ko aw,” tiah a fial. Inntek nu a rat tikah, 13Elisha in Gehazi hnenah, “Hi tluk ih in tuamhlawm ruangah le kan hrangih a zonzaih ai ah ziangso a hrangah ka tuahsak thei ding, sut hnik aw. Siangpahrang maw, ralkap hotu ralbawipa maw va ton sak in ziangthu tal va sim sak a duh maw?” tiah a ti.

Inntek nu cun, “ṭulmi zianghman ka nei lo. Ka miphunpi lakah hin sammi zianghman ka nei lo,” a ti.

14Cule Elisha in, “Cuti asile a hrangah ziangso ka tuahsak ding?” tiah Gehazi cu a sut.

Gehazi in, “Sammi pakhat cu a nei: fapa a nei lo. A pasal le a tar zo fawn,” tiah a ti.

15“Hitawk ah ra seh,” tiah Elisha in a ti. Inntek nu cu a ra ih sangka ah a ding. 16Cule Elisha in, “Hmaikum tu tikcu ah na ṭaangah fapa te na cawi ding,” a ti.

Cutikah anih in, “Aa, bawipa, nang Pathian ih minung na sisi; thuphan cu i sim hlah aw!” a ti.

17Asinain Elisha ih a tivek in cuih hnu kum khatah fapa a hring ngaingai.

18A hung upat deuh tikah voikhat cu fang at dingah, fang attu dang pawl thawn a pa cu lo ah a feh. An fapa te khal a pa hnenah a feh ve. 19Cule rinlopi-ah, “Ka pa, ka lu a na, ka lu a na,” tiah a ai ciamco.

Cutikah a pa in, “A nu hnenah vun pawk aw,” tiah a hnen-um pakhat a fial. 20Hnen-umpa in a nu hnenah cun a vun pawk ih a nu in a cawn parah sun tiang a cawi ih a thi. 21Cutikah a nu in Elisha ih khaan ah a ruak cu hun cawi in ihkhun parah a ret ih sangka a khar hnuah a taan. 22Cule a pasal a ko ih, “Hnen-um pakhat laak pakhat thawn rak thlah aw. Profet Elisha hnenah ka va feh pei ih zamrang zetin ka ra kirsal ding,” a ti.

23A pasal in, “Ziangah so tuihsun kherkher ih feh cu na duh? Sabbath ni a si lo, Thla Thar Puai khal a si lo,”#Sabbath ni le Thla Thar Puai ih profet leen cu a ṭha bik tiah an rak zum. tiah a ti.

Anih in, “A poi lo, a ṭha ko ding,” a ti.

24Laak cu a kung an dan ṭheh tikah hnen-um pa cu, “Laak hi zamrang in nawt awla ka lo sim lai hlanlo fuungter aw hlah,” tiah a ti. 25Cuticun a pok ih Elisha umnak Karmel Tlangah a feh.

Shunem khua ih nunau nu a rat kha Elisha in hla nawn ah a hei hmu ih a hnen-um Gehazi hnenah, “Zohhnik, Shunem khua ih nunau nu a rat khi! 26Zamrang in a hnenah va tlan awla, amah le a pasal le an fapa te an dam maw, va sut hnik,” tiah a ti.

Gehazi hnenah cun, “Thawmvang a ṭha ko,” tiah a rak ti. 27Asinain Elisha hnenih a thlen tikah cun a hmaiah a kun ih Elisha ih ke cu a kuah. Gehazi in tuul-hloh a tum naón Elisha in, “Tuul hlah aw. Vansang in a um tihi na hmu lo mawsi? Bawipa in a vansaannak thu i sim fawn lo,” tiah a ti.

28Cutikah nunau nu in, “Bawipa, fapa ka lo dil dah leem mawsi? Thuphan i sim hlah aw ka lo ti lo maw?” tiah a ti.

29Elisha in Gehazi hnenah, “Zamrang aw! Ka kianghrol hi la awla a tlan in tlan aw. Lamzin ah zohman bia-aw hlah. Mi ih an lo biak khalle bia kir hlah aw. A inn ah va feh awla a fapa ih tlunah ka kianghrol hi va thlir aw,” a ti.

30Cule nunau nu in, “Bawipa ih nunnak le nangmah ih nunnak saal in thu ka lo kam: Ka lo taan lo ding,” tiah Elisha cu a ti. Curuangah an pahnih in an feh tlang. 31Gehazi cu an hmaiah a rak feh ih, an fapa te ih tlunah cun Elisha ih kianghrol cu a va thlir. Asinain ziang thawthaang hman a nei lo; cang khal a caang lo. Curuangah a kir ih Elisha hnenah, “Nauhak pa cu a nung thei cuang lo,” a ti.

32Elisha a thlen tikah amah lawng a khaan sungah a lut ih ihkhun parah nauhak pa ih ruak cu a hmu. 33Sangka a khar ih Bawipa hnenah thla a cam. 34Cule nauhak pa ih parah cun a bok ih a kaa zawn ah a kaa, a mit zawn ah a mit, le a kut zawn ah a kut ret in a nen. Cuticun nauhak pa ih ruak cu malte a hung hlum. 35Cun Elisha cu a tho ih a khaan sung ahcun khatlam le khatlam ah a vak zok rero; cuih hnuah nauhak pa ih ruak cu a va nen sal. Cuti ih a tuah hnuah nauhak pa cu voi sarih a hahthio ih a mit a hun meng. 36Cule Gehazi a ko ih, “A nu vung ko aw,” a ti. A nu cu a ra ih Elisha in, “Na fapa hi ra la aw,” tiah a ti. 37Cutikah a nu cu Elisha ih kehram ah a bok ih a hmai leilung dai in upatnak a pek. Cule a fapa te cu a cawi ih a fehpi.

A Dang Mangbangza Pahnih

38Voikhat cu an ram pumpi ah paam a tlung ih cutikah Elisha cu Gilgal ah a kir. Elisha in profet pawl thu a zirh rero laiah a hnen-um pa hnenah, “Tap parah beel tumpi toh awla hi profet pawl hrangah sa-buber suang aw,” a ti. 39Hnen-um pakhat cu vauhrial hawl ah hramlakah a feh. Hramlak uumhri a hmu ih uumrah a lo ih a phurh theizat in a puan in a fun. Inn ah a tlung ih ziang a si ti thei loin hramlak uum cu a sat ih sa-buber ah a suang. 40An ei dingah sa-buber cu an suak ih an teh tikah, “Ai law, thihsii a si ee!” tiah an au ciamco ih an ei ngam nawn lo. 41Cutikah Elisha in, “Sangphut malte in i pek uh,” a ti. Cumi cu beel sungah a vun thlah ih, “An ei dingah sa-buber cu suak uh,” tiah a ti. An suah sal tikah cun ei ṭha ah a cang ṭheh.

42Cun voikhat cu Baal Shalishah ihsin mi pakhat a ra ih cuih kum ih lak hmaisa bik barli sangvut ih tuahmi sang zawl kul le fangthar lak mi a vui in Elisha hrangah a rak phur. Elisha in, “Hi rawl cu profet pawl pe aw, ei hai seh,” tiah a hnen-umpa a fial. 43Asinain a hnen-umpa in, “Minung zakhat hrangah hi cu zianghman titham a si ual lo,” a ti.

Elisha in, “An ei dingah pe ko aw, ziangahtile Bawipa in, ‘An ei dingih an hlahmi tla a um ding,’ a ti,” tiah a sim. 44Curuangah profet pawl cu a pek hai ih an zate ih an ei hnuah, Bawipa ih ti vekin, an hlahmi a um ngaingai.

Currently Selected:

2 SIANGPAHRANG 4: FCL

Highlight

Copy

Compare