1 SIANGPAHRANG 21

Naboth Ih sabit Hmuan

1Jezreel khua siangpahrang Ahab inn kiangah sabit hmuan pakhat a um ih a neitu cu Naboth a si. 2Voikhat ah Ahab in Naboth hnenah, “Na sabit hmuan hi kei ka co pei. Ka inn kiangah a um ih hanghnah hangrah cinnak hmuanah ka duh. A ai ah a ṭha deuhmi sabit hmuan a dang pakhat ka lo pe ding. Asilole na duh sawn a si ahcun a man a mawitawk in ka lo pe ding,” tiah a ti. 3Naboth in, “Hi sabit hmuan cu ka pipu pawl ih ro a si. Nang ka lo pek ding cu Bawipa in i kham hram seh,” a ti.

4Ahab cu Naboth ih a rak el ruangah a hmai siazet le thinheng in a inn ah a tin. A ihkhun ah phar lam hoi in a it ringring ih rawl khal a ei duh lo. 5Cutikah a nupi Jezebel cu a hnenah a feh ih, “Ziangah so na riah a siat? Ziangah so rawl na ei lo?” tiah a sut.

6Ahab in, “Naboth ih ṭong ruangah a si. A sabit hmuan lei ka tum ih a lei na sian lo le a ai ah sabit hmuan a dang pakhat ka lo pe ding ka ti naón, a siang thotho lo. Na co thei lo ding, tiah i ti,” tiah a let.

7Cule a nupi Jezebel in, “Israel ram siangpahrang na si lo sawm? Tho! It nawn hlah. Thinnuam in um awla, rawl tla ei aw. Naboth ih sabit hmuan cu keimah in ka lo ngah sak ding,” tiah a ti.

8Jezebel cun Ahab ih hmin in ca a ngan ih siangpahrang hmin a ṭhutter ih Jezreel khawpi sungih bawi pawl le hotu pawl hnenah a kuat. 9A ca sungah cun, “Rawl ulh ni tuah uhla misenpi kokhawm uh. Naboth kha cutawkah upatnak hmunah toter uh. 10Cule misualral pahnih ko uhla, ‘Naboth hi Pathian le siangpahrang a camtu a si,’ tiah sualpuh hai seh. Cuih hnuah Naboth cu hnarpawn ah fehpi uhla lungto in deengthat uh,” tiah a ngan.

11Jezebel ih thupek vekin khawsung bawi pawl le hotu pawl in an tuah. 12Rawl ulh ni an tuah ih misenpi pawl an kokhawm ih Naboth cu upatnak hmunah an toter. 13Cutikah misualral pahnih cun senpi hmaiah, “Hi pa hi Pathian le siangpahrang a camtu a si,” tiah sual an puh ciamco. Cu thluh cun Naboth cu hnarpawn ah an hruai ih lungto in an den that. 14Cule Jezebel hnenah, “Naboth cu a thi zo,” tiah thu an hei than.

15Cuih thu a theih vete in Jezebel in Ahab hnenah, “Naboth cu a thi zo. Va feh awla a lo zorh duh lomi a sabit hmuan cu na ta a si thei zo,” a ti. 16Ahab cu hmakhatte-ah a tho ih sabit hmuan ham dingah a feh.

17Cule Bawipa in Tishbe khua profet Elijah hnenah, 18“Samaria Siangpahrang Ahab hnenah feh aw. Naboth ih sabit hmuan la dingah a feh ih hmuan sungah na tong ding. 19A hnenah, ‘Amah Naboth na thah hnuah a leiram khal na lak hrih ding maw? Uico pawl in Naboth ih thisen an liahnak hmunah na thisen an liak ve ding,’ tiah Bawipa in a ti va ti aw,” tiah a fial.

20Ahab in Elijah a hmuh tikah, “Aize, i hmu suak maw si, ka ralpa!” tiah a rak ti.

Cutikah Elijah in, “Asi, ka lo hmu a sihi! Bawipa ih mithmuh ah thilsual lawnglawng na tuah a si. 21Curuangah Bawipa in na hnenah, ‘Na parah vanduainak ka thlengter ding ih na nunnak ka cemter ding. Na innsang ih mipa hmuahhmuah, nauhak tilo, upa tilo, ka hloralter thluh ding. 22Israel mi pawl sualnak sungah na luhpi ih ka thinhengnak cu meisa vekih na alhter ruangah na innsang pawl cu Nebat fapa siangpahrang Jeroboam le Ahijah fapa siangpahrang Baasha ih innsang pawl an bang ding,’ a ti. 23Cule Bawipa in, ‘Jezebel ih ruak cu Jezreel khawpi sungah uico in an ei ding,’ a ti. 24Khawsungih a thimi na sungkhat pawl ih ruak cu uico in an ei dingih hramlak ih a thimi pawl cu langta in an ei ding,’ a ti a si,” tiah a ti.

25 Bawipa ih mithmuh ah Ahab vekih thilsual lawnglawng a tuahtu zohman an um lo. A zatein a nupi Jezebel ih forhfialnak lawnglawng in a tuah. 26A thilsual tuahmi lakah fihnungza bik cu Israel mi pawl Kanaan ram an luh tikah Bawipa in a rak dawimi Amor mi pawl vekin milem a biaknak kha a si.

27Elijah in thu a sim ṭheh tikah, Ahab cu a hnipuan a thlek ṭheh ih buri hnipuan a hruk ih rawl khal ei loin a um. Buri puan sin in a it ih riahsia zet le mithmai sia ṭeemṭeem in a um.

28Cule Bawipa in profet Elijah hnenah, 29“Ka hmaiah Ahab a thinlung niam in tangdor ih a umzia hi na hmu maw? Hitiih a um ruangah a nunsung ahcun hloh-ral vanduainak ka thlenter lo ding. A fapa sanah Ahab ih sungkhat parah ka thlenter ding,” tiah a ti.

Currently Selected:

1 SIANGPAHRANG 21: FCL

Highlight

Copy

Compare