1 SIANGPAHRANG 22
22
Profet Mikaiah In Ahab Ralrinnak A Pek
(2 San. 18.2-27)
1Israel le Siria karlakah kum hnih sung ral a dai. 2Asinain a kum thumnak ah Judah siangpahrang Jehoshafat cu Israel siangpahrang Ahab tong dingah a feh.
3Cule Ahab in a kuthnuai bawi pawl hnenah, “Ziangah so Gilead ramih Ramoth khua cu Siria siangpahrang kutsung ihsin a lak kan tum lo? Kanmah ih ta a sisi!” a ti. 4Cun Jehoshafat hnenah, “Ramoth ka do ding ih i bawm pei maw?” tiah a sut.
Jehoshafat in, “Ka lo bawm ding. Ka ralkap pawl le ka rang ralkap pawl khal an tiar aw ko. 5Asinain hmaisabik ah Bawipa kan ron hnik pei,” tiah a ti.
6Curuangah Ahab in profet pawl a ko ih an zatein zali an ra. An hnenah, “Ramoth ka do pei maw?” tiah a sut.
Annih in, “Do aw. Bawipa in nehnak a lo pe ding,” tiah an ti.
7Asinain Jehoshafat in, “Bawipa kan ron theinak dingah profet dang an um nawn lo maw?” tiah a sut.
8Ahab in, “A dang pakhat a um hrih. Amah cu Imlah fapa Mikaiah a si. Asinain anih cu ka hua. Ziangahtile ka hrangah thu ṭha a ṭong dah lo. Thusia lawnglawng a sim ṭheu,” a ti.
Jehoshafat in, “Cuticun ṭong hlah aw,” a ti.
9Curuangah siangpahrang Ahab in zamrangte ih Mikaiah va ko dingah a zungih bawi pakhat a fial.
10Siangpahrang pahnih, Ahab le Jehoshafat cu an siangpahrang thuam hruk in Samaria khawpi kulhnak hauhruang kotka lengih fang rialnak hmunah siangpahrang tokham parah an to ih, an hmaiah cun profet pawl cu profet ṭong in an ṭong rero. 11Anmah lakih profet pakhat, Khenaanah ih fapa Zedekiah in thir ki a tuah ih Ahab hnenah, “Bawipa in, ‘Hi ki hin Siria pawl nan do ding ih an ci nan hmit thluh ding,’ a ti,” tiah a sim. 12Profet dang pawl khal in cuvek thotho in an sim ṭheh. “Ramoth khua do uhla nan neh ding, Bawipa in nehnak a lo pe ding,” tiah an ti cio.
13A culaiah Mikaiah ko dingih thlahmi bawi in Mikaiah cu, “Profet dang pawl in kan siangpahrang ih neh ding thu lawng an sim a si. Nang khal cutiin sim ve aw,” tiah a forh.
14Asinain Mikaiah in, “Bawipa ih hminin ka sim: Bawipa ih sim ding i fialmi lawng ka sim ding a si,” tiah a ti.
15Mikaiah cu siangpahrang hmai ih a thlen tikah siangpahrang bawipa in, “Mikaiah, siangpahrang Jehoshafat le keimah in Ramoth khua kan do pei maw, do lo so, sim hnik?” tiah a ti.
Mikaiah in, “Do aw he! Na neh ding. Bawipa in nehnak a lo pe ding,” tiah a sawn.
16Asinain Ahab in, “Bawipa hmin saal in ka hnenih thu na sim tikah thudik lawnglawng i sim aw, tiah voi ziangzat so ka lo ti ding?” tiah a kawk.
17Cutikah Mikaiah in, “Israel mi pawl cu khaaltu nei lo tuurual bangin tlang parah vakvai in an um ṭheh ka hmu. Bawipa in, ‘Hi misenpi pawl hi hotu an nei lo; an inn ah tlung thluh hai seh,’ a ti,” tiah a sim.
18Cule Ahab in Jehoshafat hnenah, “Hi pa cu ka hrangah thuṭha a ṭong dah lo, ka lo ti tho lo maw? Thusia lawnglawng a sim ṭheu a si,” a ti.
19Mikaiah in a hun peh ih, “Atu Bawipa ih ṭongkam rak ngai aw! Bawipa cu vancung a Siangpahrang tokham parah to in a vancungmi pawl a kiang vorhlam le kehlam ah an din kha ka hmu. 20Cule Bawipa in, ‘Ahab cu Ramoth khua ah feh in thihnak a tonnak dingah zoso a vung bum ding?’ a ti. Vancungmi hrekkhat in thu pakhat an sim; a dang in thudang an sim. 21Netabik ah thlarau pakhat in Bawipa cu a hei naih ih a hnenah, ‘Keimah ka vung bum pei,’ a ti. ‘Ziangtin so na bum ding?’ ti ih Bawipa ih a sut tikah, 22anih in, ‘Ka vung feh pei ih Ahab ih profet hmuahhmuah thuphan ka perter ṭheh ding,’ a ti. Cutikah Bawipa in, ‘Vung feh awla vung bum aw. Na ti thei ngaingai ding,’ a ti,” tiah a ti.
23Mikaiah in a hun peh bet ih, “A tivek in a si ngaingai hi! Bawipa in na profet pawl na hnenah thuphan a perter ṭheh a si. Bawipa amah rori in na parah siatsuahnak thleng dingin lai a rel zo a si,” tiah a ti.
24Cutikah Zedekiah in Mikaiah cu a hun naih ih a hnakhang ah a beng ih, “Ziangtin so Bawipa ih thlarau cu na hnen ṭong dingah ka hnen ihsin a ra ceer?” a ti.
25Mikaiah in, “Inn dunglam khaan sungih na relh rero tikah cuih thu cu na thei leh ding,” a ti.
26Cule siangpahrang Ahab in a kuthnuai bawi pakhat hnenah, “Mikaiah hi kai awla khawpi uktu Amon le ka fapa Joash hnenah hei hruai aw. 27Va sim awla himdamte ih ka rakir sal hlanlo thawngah rak thla hai sehla sang le tidai rak pe hai seh,” tiah a ti.
28Cutikah Mikaiah in, “Himdamteih na rakir a si ahcun keimah hmangin Bawipa a ṭong lo a si ding. Mi hmuahhmuah in ka ṭong mi hi i theihpi uh,” tiah a ti.
Ahab A Thi
(2 San. 18.28-34)
29Israel siangpahrang Ahab le Judah siangpahrang Jehoshafat cu Gilead ram Ramoth khua do dingah an suak. 30Ahab in Jehoshafat hnenah, “Ral kan do tikah kei cu midang vekah ka tuah aw ding ih nang cu siangpahrang vekin na thuam-aw pei,” a ti. Cuticun Israel siangpahrang cu midang vekih tuah-aw in raldonak ahcun a feh.
31Siria siangpahrang in Israel siangpahrang siar lo a dang zohman do lo dingin a rangleng ralkap hotu sawmthum le pahnih pawl cu thu a pek. 32Cule siangpahrang Jehoshafat an hmuh tikah Israel siangpahrang a si hmang tiah an ruat ih an do ciamco. Asinain Jehoshafat a au tikah, 33Israel siangpahrang a si lo ti an thei ih an cawl. 34Siria ralkap pakhat in batmi nei cuang leem loin a conkiang a hei sai meen ih a vanduainak ah siangpahrang Ahab cu daar ih tuahmi a ralthuam ih peh awknak ongte in a hei ngah. Cutikah Ahab cu, “In hriam ee!” tiah a au ih, a rangleng mawngtupa cu, “Zamrang in i tlanpi aw,” tiah thu a pek.
35An do awknak a nasa ngaingai ih siangpahrang Ahab cu a rangleng parah do cop in Siria ralkap pawl ṭannak lam hoi in a um. An hriamnak hma ihsin a thi a luang ih a rangleng zial cu a thisen in a khat ṭheh. Cule zanlam ah a thi. 36Ni a liam zawng ah Israel ralkap pawl hnenah, “Nan khua le nan ram ciarah tlung thluh uh,” tiah thu an than.
37Cuticun siangpahrang Ahab cu a thi. A ruak cu Samaria khua ah an phur ih an phum. 38A rangleng cu Samaria tili ah an tleuhfai ih Bawipa ih a rak sim cia vekin a thisen cu uico in an liak. Cutawk cu hlawhhlang pawl tla ti an bual ṭheunak a si.
39Siangpahrang Ahab ih tuahmi dang hmuahhmuah, vuiho ih ceimawimi a siangpahrang inn thu le khua a dinmi pawl ih thu cu Israel Siangpahrang Pawlih Thuanthu Cabu sungah kimten an ngan a si. 40A thih tikah a fapa Ahaziah in siangpahrang a run ṭuan.
Judah Siangpahrang Jehoshafat
(2 San. 20.31—21.1)
41Israel siangpahrang Ahab in ram a uknak kum li kum ah Asa ih fapa Jehoshafat cu Judah siangpahrang a cang. 42Culai ah amah cu kum sawmthum le kum nga a si ih, Jerusalem ihsin kum kul hluannga sung ram a uk. A nu cu Shilhi ih fanu Azubah a si. 43A pa Asa vekin Bawipa ih mithmuh ah thil ṭha a tuah. Asinain khawvel pawl ih milem biaknak hmun pawl cu a siatbal lo; curuangah mi tampi in cuih biaknak hmun pawl cu raithawinak ah an hmang thotho. 44Jehoshafat in Israel siangpahrang thawn remnak a tuah.
45Jehoshafat ih tuahmi dang hmuahhmuah, a raldonak le a ralṭhatnak pawl thawn, Judah Siangpahrang Pawlih Thuanthu Cabu sungah an ngan. 46A pa Asa san ihsin a tanglaimi, an khawzing biaknak ih hlawhhlang hna a ṭuantu pawl hmuahhmuah, nunau siseh mipa siseh, a that ṭheh hai a si.
47Culai ah Edom ram cu uktu siangpahrang a nei lo. An ram uktu cu siangpahrang bawmtu lawng an si ih Judah siangpahrang ih hnaṭuan pekmi an si.
48Siangpahrang Jehoshafat in Ofir ram ihsin sui leinak dingah tipi thuanthum feh thei tangphawlawng tampi a tuah. Asinain Ofir ah an feh thei lo, ziangahtile Ezion-geber ah an lawng pawl a siat. 49Cule Israel siangpahrang Ahaziah in a milai tipi thuanthum khual tlawng pawl le Judah siangpahrang Jehoshafat ih milai tipi thuanthum khual tlawng pawl khual tlawng tlang dingah a sawm. Asinain Jehoshafat in a el.
50Jehoshafat cu a thi ih David khawpi siangpahrang pawl phumnak hmun ah an phum. Cule a fapa Jehoram in siangpahrang a run ṭuan.
Israel Siangpahrang Ahaziah
51Judah siangpahrang Jehoshafat in an ram a uknak kum hleisarih kumah Ahab ih fapa Ahaziah cu Israel siangpahrang a cang ih Samaria khawpi ihsin kum hnih sung a uk. 52A pa Ahab, a nu Jezebel le siangpahrang Jeroboam ih sualnak lamzin a thlun ih Bawipa ih parah a sual ve. Ahab le Jezebel le Jeroboam cu Israel mi sualnak sungih a hruailuttu an si. 53A pa ih a rak tuah zo vekin Ahaziah khal in Baal khawzing a biak ih a hna a ṭuan; cuticun Bawipa Israel ih Pathian cu a thin a hengter.
Currently Selected:
1 SIANGPAHRANG 22: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
