1 SIANGPAHRANG 20

Siria Thawn An Do Aw

1Siria Siangpahrang Benhadad in a ralkap hmuahhmuah a khawm ṭheh ih, amah ih ralkap pawl ih tlunah ramdang uktu bawi sawmthum le pahnih in an bawm ih an rang le an raldonak rangleng pawl thawn Benhadad ho in an feh. Samaria khawpi an kulh ih an do ciamco. 2Khua sungah palai a vun thlah ih Israel Siangpahrang Ahab hnenah, “Siangpahrang Benhadad in, 3na sui le na ngun pawl, na nupi mawi bik pawl le na faate lakih a cak bik pawl i hun peseh, a lo ti,” tiah an vung sim.

4Cutikah Ahab in, “Ka bawipa Benhadad cu va sim uh: I dil vekin ka lung a kim a si. Keimah le ka neihmi hmuahhmuah khal a duh ahcun a ta kan si thei ko,” tiah a ti.

5Cuih hnuah Benhada ih palai pawl cu Ahab hnenah an ra sal ih, “Na sui le na ngun, na nupi pawl le na faate pawl, i pe ding, tiah ka lo cah. 6Sikhalsehla atu-ah ka kuthnuai ih bawi pawl ka run thlah pei ih, na umnak inn le na kuthnuai bawi pawl ih inn an rung hawl ṭheh ding; man nei thil an hmuhmi pohpoh an la ding. Thaisun atu tikcu ah an ra thleng ding, a lo ti,” tiah an sim.

7Siangpahrang Ahab in a ram sungih hotu pawl hmuahhmuah a kokhawm ih an hnenah, “Hi pa hi in siatsuah duh ruangah thusia lawnglawng a hawl a si. Ka nupi pawl, ka faate pawl, ka sui le ka ngun pawl i dil ih pek ding cu ka el lo,” tiah a ti.

8Hotu pawl le misenpi pawl in, “A thu cu zianghman ah siar duh hlah aw. A lo dilmi zianghman pe hlah,” an ti.

9Curuangah Ahab in Benhadad ih palai pawl hnenah, “Nan siangpahrang ka bawipa cu hung sim uh: ‘A hmaisaih i dilmi cu pe dingah ka lung a kim ko. Asinain a neta ih i dilmi cu ka lung a kim thei lo a si’ va ti uh,” tiah a ti.

Cule Benhadad ih palai pawl cu an tlung; 10a sinan Benhadad in palai a run thlah kir sal ih hiti in thu a run cah sal: “Na khawpi an siat thluh hnu ih a leivut le a hnawmhne hman an kutih thiar thluh theitu ralkap siar cawk lo ka runpi ding. Ka tivek ih ka tuah lo a si ahcun khawzing pawl in keimah i that hai seh,” a run ti.

11Siangpahrang Ahab in thu a khirh ih, “Siangpahrang Benhadad cu hung sim uh: Ralkap ṭha taktak cun ral a do ṭheh hlan ah tluang a khawng dah lo; ral a neh hnu lawngah tluang a khawng a si,” tiah a rak ti.

12Ahab ih thucahmi cu Benhadad le a ṭantu bawi pawl an riahhmun ih zu an in laiah a va thleng. Hmakhatte-ah Samaria do dingin Benhadad in thu a pek ih a ralkap pawl cu an ṭannak hmun ciarah tiar cia in an um.

13Culaifang ah Israel siangpahrang Ahab hnenah cun profet pakhat a feh ih, “Bawipa in, ‘Hi ralkap pawl hi an tam ruangah ṭih hlah uh. An tlunah nehnak ka lo pe ding ih Keimah cu Bawipa ka si kha in thei ding,’ a ti,” tiah a sim.

14Ahab in, “Ka do tikah zo in so a ho ding?” tiah a sut.

Profet in, “Ramṭhen uktu bawi pawl hnuai ih ralkap mino pawl in ho hai seh, tiah Bawipa in a ti,” tiah a sim.

“Hmaisa bikih a nortu pawl cu zo in so a ho ding?” tiah Ahab in a sut sal.

Profet in, “Nangmah in na ho ding,” a ti.

15Curuangah siangpahrang in ramṭhen uktu bawi pawl hnuai ih ralkap mino pawl cu a ko ṭheh ih an zatein zahnih le sawmthum le pahnih an si. Cule Israel ralkap pawl a kokhawm ih an zatein thawng sarih an si.

16An ral pawl cu sun laifangah an do; Benhadad le a ṭantu bawi sawmthum le pahnih pawl cu an riah hmunah zu an rak ri. 17Ralkap mino pawl in hmai bik ah an nor. Benhadad ih thlahmi thlingthlatu pawl in, “Samaria ihsin ralkap bur khat an ra suak,” tiah an sim. 18Cutikah Benhadad in, “Raldo dingih an rat khal asile, remnak tuah dingih an rat khal asile, a nung in kai hai uh,” tiah thu a pek.

19Ralkap mino pawl cun an do hmaisa ih an dungin Israel ralkap burpi pawl in an thlun. 20An domi an hmaiih an tonmi ral cu pakhat fingfing an that. Cutikah Siria ralkap pawl cu an tlan ih Israel ralkap pawl in an dawi vivo; amah Benhadad khal rang ralkap pawl in an kil ih rang to in a tlan suak. 21Siangpahrang Ahab ho in rang tampi le rangleng tampi an lak ih Siria ralkap pawl cu nasa zetin an siatsuah.

22Cule profet cu siangpahrang Ahab hnenah a feh ih, “Kir awla na ralkap pawl cu tam deuh le ṭha deuh in timtuah aw. Ziang hmuahhmuah ralring zetin tawlrel aw, ziangahtile hmaikum ṭhal ah Siria siangpahrang in a lo do sal ding a si,” tiah a ti.

Siria Pawl In An Do Sal

23Siangpahrang Benhadad cu a kuthnuai bawi pawl in, “Israel khawzing pawl cu tlangpar khawzing an si. Curuangah in neh. Sikhalsehla phairawn ih kan do hai a si ahcun kan neh tengteng ding. 24Tuih ṭumih in bawmtu bawi sawmthum le pahnih pawl hi ralkap an honak in hlon awla anmah ih ai ah raldo ṭhangtu ralbawi ret thluh aw. 25Cule a lo tlansantu ralkap zat in ralkap a thar in la awla, rang le rangleng pawl khal a thar in la aw. Israel ralkap pawl cu phairawn ah kan do ding ih tuih ṭum cu kan neh tengteng ding,” tiah an ti.

Siangpahrang Benhadad a lung a kim ih an ruahnak cu a thlun. 26Ṭhal a hung suah tikah a ralkap pawl a kokhawm ih Israel do dingah Afek khua ah an feh. 27Israel ralkap pawl khal an kokhawm aw ve ih ralthuam ih thuam aw aw in an feh ih Siria ralkap pawl ih riahhmun ralden hmun hnih ah an va riak. Thingkung le hrampi zat a si mi Siria ralkap pawl lakah cun Israel ralkap pawl cu a malzet mi merual rual hnih an bang. 28Profet cu siangpahrang Ahab hnenah a feh sal ih, “Bawipa ih ṭongkam cu hiti in a si: Keimah hi tlangpar khawzing a si ih phairawn khawzing a si lo, tiah Siria pawl in in ti. Curuangah ralkap hizat parah hin nehnak ka lo pe ding ih nanmah le nan misenpi pawl in keimah cu Bawipa ka si kha in thei ding, a ti a si,” tiah a sim.

29Siria ralkap pawl le Israel ralkap pawl cu an riahhmun fingfing ih ralden in ni sarih sung tiar cia ṭhepṭhep in an um. A ni sarih ni ah an do aw ciammam ih Israel ralkap in Siria ralkap ni khatah thawng zakhat an that. 30A luatmi pawl cu Afek khua ah an tlan. Cun cutiih an tlan laiah Afek khua kulhnak ralhruang a cim ih Siria ralkap thawng kul hluansarih a tlak that a si.

Benhadad khal khawpi sungah cun a lut ve ih inn pakhat ih dunglam khaan sungah a relh. 31A kuthnuai bawi pawl a hnen ah an feh ih, “Israel siangpahrang cu mi zaangfah thiam an si ti kan thei. Atu-ah na lung a kim asile Israel siangpahrang hnenah kan taai ih buri puan ṭeem in le kan lu ih hridai ṭeem#Tai ih buri puan ṭeem timi ih tican cu kan riah a sia ih kan siir aw tinak a si ih, lu ih hridai ṭeem timi hi, na kut sungah ka pe-aw tinak a si. in kan va feh hnik pei. Na nunnak tla a lo zuah thei men a si,” tiah an ti. 32Curuangah an taai ah buri puan an ṭeem ih an lu ah hridai an ṭeem ih Ahab hnenah cun an feh. “Na siahhlawh Benhadad in a nunnak zuah dingah a lo dil a si,” tiah siangpahrang Ahab an va ti.

Cutikah Ahab in, “A nunglai mawsi? A ṭha! Ka unau vekih ka ruah mi si maw a si,” a rak ti. 33Benhadad kuthnuai ih bawi pawl cun Ahab in ziangtin a ti pei tiih thinhar zetih an um laiah Ahab in, “Ka unau vek,” a hun ti cun hmakhatte-ah an thok ve ih, “Na tivek in Benhadad cu na unau a si ngai,” tiah an ti.

Cutikah Ahab in, “Ka hnenah rak hruai uh,” tiah thu a pek. Benhadad a ra thlen tikah amah ih hnenah rangleng parah a toter. 34Cule Benhadad in, “Na pa hnen ihsin ka pa ih a rak lonmi khua pawl cu na hnenah ka lo khirhsal ding. Ka pa in Samaria khawsungih dawrpi a rak tuah vekin nang khal Damaskas khawpi sungah dawrpi tuah ve aw,” tiah a ti.

Cule Ahab in, “Cuti a si ding taak ahcun ka lo thlah ding,” a ti ih, lungkimnak cakhen an tuah hnuah Benhadad cu a thlah.

35 Bawipa ih thupeknak in a buur ih a ummi profet lakah pakhat in a rualpi profet pakhat cu, “I thawi aw,” tiah a ti. Asinain cupa cun a el. 36Curuangah a hnenah, “Bawipa ih thupek mi na el ruangah na feh vete in kiosa in a lo deh ding a si,” tiah a ti. A feh ih a feh vete in kiosa in a thlun ih a deh ngaingai.

Profet In Ahab A Mawhthluk

37Cule cuih profet cu midang pakhat hnenah a feh ih, “I thawi aw,” a ti. A ti vekin a thawi ih a tuahmawh. 38Cuih profet in a hmai cu puan in a tuam ih midang vekah a tuah aw ih lamzin kiangah a ding. Israel siangpahrang cuih lamzin in ra lan ding a hngak. 39Israel siangpahrang cu a ra lan ngaingai ih profet cun, “Maw siangpahrang bawipa, ral kan do laiah khan ral kaihmi pakhat ka hnenah ralkap pakhat in a hun hruai ih, ‘Hi pa hi kil ṭha aw. Na tlanter a si ahcun na nunnak in na kuan ding. Asilole tangka thawngthum na kuan ding,’ i ti. 40Ka kil ṭha ko naón, thil dangdang tuah phahnak ah ka buaituk ih cupa cu ka tlanter pang,” tiah ringzet in a hun ti.

Siangpahrang in, “Na thu cu nangmahte na relcat zo a si cu! Na sualman cu na kuan ding,” a ti.

41Cutikah profet in a hmai tuamnak puan cu a phoih ih siangpahrang in profet a si ti kha hmakhatte ah a thei. 42Cule profet in siangpahrang hnenah, “Bawipa ih ṭongkam cu hiti in a si: ‘Thah ding ka timi na thlah ruangah na nunnak in na kuan ding ih a ralkap pawl na luatter ruangah nangmah ih ralkap pawl an cem ding,’ a ti a si,” tiah a sim.

43Israel siangpahrang cu thinlung baangzet le riahsia zetin Samaria ah a kir.

Currently Selected:

1 SIANGPAHRANG 20: FCL

Highlight

Copy

Compare