1 SIANGPAHRANG 14

Jeroboam Ih Fapa A Thi

1Cuih caanah Siangpahrang Jeroboam ih fapa Abijah a na. 2Curuangah Jeroboam in a nupi hnenah, “Zohman ih theihthiam lo dingin phundang in tuah awla, profet Ahijah umnak Shiloh khua ah va feh aw. ‘Israel siangpahrang na cang ding,’ tiih a rak simtu cu amah profet Ahijah a si. 3A hrangah sang zawl hra, sangrawh malte le khuaitizu palang khat hei keng aw. Kan fapa ziangtin a um ding, ti thu va sut awla a lo sim ko ding,” tiah a ti.

4Curuangah a nupi cu Shiloh khua Ahijah inn ah a va feh. Ahijah cu a tarzet zo ih a mit khal a mal zo. 5An fapa a nat ruangih Jeroboam a hnenih a ratnak ding thu kha Pathian in a rak sim cia zo. Cule Jeroboam nupi hnenih a rak sim ding thu khal a sim cia zo.

Jeroboam nupi cu a feh ih midang vekah a tuah-aw ih Ahijah hnen ah a va thleng. 6Asinain sangka kiang a thlen kha Ahijah in a theih tikah, “Rung lut aw. Jeroboam nupi na si ka lo thei ko. Ziangah so midang vekih na tuah awk ciamco? Na hrangah thu ṭha lo ka nei a si. 7Va kir awla na pasal Jeroboam va sim aw. Bawipa, Israel ih Pathian in a hnenah hiti in a ti a si: ‘Miseenpi sung ihsin nangmah cu ka miphun Israel mi uktu dingah ka lo hril. 8Ram uknak cu David tesinfa pawl hnen ihsin ka lak ih nangmah ka lo pek. Sikhalsehla ka thu famkim zetin a ngai ih, ka thupekmi thlun tahrat in ka lungkim mi lawnglawng a tuahtu ka siahhlawh David vek cu na si lo. 9Na hlanih ram a rak uktu siangpahrang pawl hnakin luar deuh in na sual a si. Keimah i hnong zo ih biak dingah milem le zuk pawl na tuah ruangah ka thin i hengter zo. Kei cu na dunglamah i hlon zo a si. 10Curuangah na uknak parah thil poimawh ka thlengter dingih na tesinfa pawl mipa hmuahhmuah upa siseh nauhak siseh, ka thiter thluh ding. Na innsang le na sungkhat pawl ka phiatfai thluh ding ih eek an ur ṭheu bangin an reh hlanlo ka ur ding. 11Khawpi sungih a thimi na sungkhat pawl cu uico in an ruak an ei ding; hramlak ih a thimi pawl cu langta in an ei ding. Bawipa a si mi Keimah in ka sim zo,’ a ti va ti aw,” tiah a ti.

12Cule Ahijah in Jeroboam nupi hnenah cun, “Atu va tlung aw. Nan khua na thlen vete in nan fapa cu a thi ding. 13Israel mi hmuahhmuah in an ṭah ding ih an phum ding. Jeroboam innsang sungah amah lawnglawng ṭhate ih phummi a si ding. Ziangahtile amah ih tlun lawnglawng ah Israel ih Pathian Bawipa cu a lung a awi. 14Israel mi uktu dingah Bawipa in siangpahrang dang pakhat a ret ding ih amah in Jeroboam ih uknak cu a cemter ding. 15Bawipa in Israel cu a hrem dingih tiva sungih phaikung a hnin vekin Israel cu a hnin ringring ding. Bawipa in an pipu hnenih a pekmi hi ramṭha le ramnuam ihsin Israel mi pawl cu a botcat ding ih Eufrates Tiva ral ah khin a ṭhekdarh thluh ding. Ziangahtile khawzingnu Asherah ih lem an tuah ruangah Bawipa ih thin an hengter zo. 16Bawipa in Israel cu a dungtun ding, ziangahtile Jeroboam in sualnak a tuah ih Israel mi pawl khal sualnak sungah a hruai thluh zo, tiah a ti.

17Jeroboam nupi cu a suak ih Tirzah ah a tlung. A inn a luh zawng ah an fapa cu a thi. 18Israel mi pawl in an ṭah ih an phum. Bawipa in a siahhlawh profet Ahijah hnenih a simmi vekin a kim a si.

Jeroboam A Thi

19Siangpahrang Jeroboam ih tuahmi, ral a donak le ram a uknak thu pawl cu Israel Siangpahrang Pawlih Thuanthu Cabu sungah an ngan ṭheh a si. 20Jeroboam in kum kul hluanhnih sung siangpahrang a ṭuan. Cu hnuah a thi ih an phum. Cule a fapa Nadab in siangpahrang a run ṭuan.

Judah Siangpahrang Rehoboam

(2 San. 11.5—12.15)

21Solomon fapa Rehoboam#Judah uknak le Israel uknak sungah siangpahrang an tamzet ruangah a hnok deuh ih a tawizawng in fianter kan zuam pei. A kum cu Bawi Jesuh suah hlan 930-850 BC hrawngah a si. Israel uknak cu saklam ram a si ih Judah uknak cu thlanglam ram a si. Israel ih khawpi cu Tirzah le Samaria an si ih Judah ih khawpi cu Jerusalem a si. Jeroboam in Israel ram a uk sungah Judah ram cu pathum in an um: Rehoboam (14:21-31), Abijah (15:1-8), le Asa (15:9-24) an si. Cule Asa in Judah ram a uk sungah Israel ram cu siangpahrang paruk in an um: Nadab (15:25-32), Baasha (15:33-16:7), Elah (16:8-14), Zimri (16:15-20), Omri (16:21-28), le Ahab (16:29-22:40) an si. cu kum sawmli le kum khat a ti tikah Judah siangpahrang a cang ih, Bawipa an biaknak dingah Bawipa amah in Israel ram hmuahhmuah sungin a hrilmi Jerusalem khawpi ihsin kum hleisarih sung a uk. Rehoboam ih nu cu Ammon mi Naamah a si.

22Judah mi pawl in Bawipa ih parah sualnak an tuah ih an pipu pawl ih sualnak an tuahmi hmuahhmuah hnakin Bawipa ih thinhengnak tam sawn an suahter. 23Pathian biaknak hmun tampi an dawl; an biak dingah tlangpar le thingpi thuai ah lungserh an phun ih thingserh khal an phun. 24Cuih khawzing biaknak hmun ahcun nunau siseh mipa siseh hlawhhlang an um ih cumi cu thildang hmuahhmuah hnakin fihnungza bik a si. Israel mi pawl Kanaan ram sung an luh laiah Bawipa in Kanaan mi a dawihlo mi pawl in fihnungza le ningzakza thil an rak tuahmi pawl kha Judah mi pawl in an tuah ṭheh ve a si.

25Rehoboam in siangpahrang a ṭuannak kum nga a tinak kumah Izipt ram siangpahrang Shishak in Jerusalem khua a do ih a neh. 26Biakinn sung le siangpahrang inn sungih a ummi hlawnthil le thil mankhung pawl hmuahhmuah, Solomon ih a tuahmi sui ralphaw pawl tiangin a lak ṭheh. 27Cuih an lakmi pawl ai ah siangpahrang Rehoboam in daar ralphaw a tuah ih cu pawl cu siangpahrang inn kiltu bawi pawl ih kutah a ret. 28Siangpahrang bawipa Biakinn a feh tin in inn kiltu pawl in ralphaw cu an keng ih cuih hnuah inn kiltu umnak khaan ah an retsal ṭheu.

29Siangpahrang Rehoboam in a tuahmi dangdang pawl cu Judah Siangpahrang Pawlih Thuanthu Cabu sungah kimten an ngan a si. 30Kum hi hmuah sungah hin Rehoboam le Jeroboam cu cat loin an do aw ringring. 31Rehoboam cu a thi ih David khawpi siangpahrang pawl phumnak thlaan ah an phum. A nu cu Ammon mi Naamah a si. Cule a fapa Ahijah in siangpahrang a run ṭuan.

Currently Selected:

1 SIANGPAHRANG 14: FCL

Highlight

Copy

Compare