1 SIANGPAHRANG 13

Bethel Ih Biakṭheng A Siat

1 Bawipa ih thupeknak bangtuk in Judah ihsin profet pakhat cu Bethel ah a feh ih thawinak pek dingah biakṭheng hmai ih Jeroboam a din laifangah a va thleng. 2Bawipa ih thupeknak thlun in profet in biakṭheng cu siat a serh ih, “Maw biakṭheng, biakṭheng, Bawipa in hiti in a ti: Naute pakhat, a hmin ah Josiah an timi cu David sungkhat lak ihsin a suak ding. Na parih thawinak a petu khawzing biaknak biakṭheng ih hnaṭuantu puithiam pawl cu na parah hin a that ding. Cule na parah hin milai ruh a ur ding a si,” tiah a ti. 3Cuih hnuah profet in a bet sal ih, “Hi biakṭheng hi a cim ṭheh ding ih a parih vutcam hi darh ṭheh a si ding. Cutikah atu ih ka ṭongmi hi Bawipa ih ṭongkam a si, ti nan thei ding,” a ti.

4Cumi cu siangpahrang Jeroboam in a theih tikah, a kutzung a hei khih ih, “Kha pa kha kai uh!” tiah thu a pek. Hmakhatte-ah siangpahrang ih kut cu a caar ih a ṭhum sal thei nawn lo. 5Biakṭheng cu a cim ih biakṭheng parih vutcam cu, Bawipa hmin in profet ih a relcia vekin, leilung parah a theh darh-aw ṭheh. 6Cutikah siangpahrang Jeroboam in, “I zaangfah awla Bawipa na Pathian hnenah ka kut damter sal dingin thla i cam sak hram aw,” tiah profet cu a dil.

Profet in Bawipa hnenah thla a cam ih siangpahrang kut cu a dam sal. 7Cule siangpahrang in profet hnenah, “Ka inn ah ra awla, rawl ra ei aw. Laksawng lo pek ka duh a si,” tiah a ti.

8Cutikah profet in, “Na neih mi hmuahhmuah ih hrek hman i pe cila na inn ahcun ka ra lo ding. Na hnenah zianghman ka ei ka in lo ding. 9Bawipa in zianghman ei lo ding le in lo ding le ka ratnak lamzin ihsin kirsal lo dingah thu i pek a si,” tiah a ti. 10Curuangah a ratnak lamzin ihsin tlung loin lamzin dang in a tlung.

Bethel Ih Profet Tarpa

11Culai ahcun Bethel ah profet tarpa pakhat a um. A fapa pawl a hnenah an ra ih Judah ram profet in Bethel ah siangpahrang Jeroboam hnenah a ṭongmi le a hnaṭuan mi dangdang pawl tla an sim. 12Profet tarpa cun, “A kir lamah khuitawk lamzin so a zawh?” tiah a sut hai. Annih in a zawhmi lamzin cu an sim. 13Anih in, “Ka laak kha a kung i dam sak uh,” tiah a fial. An dam ṭheh in a laak cu a to ih, 14Judah ram profet a kirnak lamzin ihsin a vun dawi. Cule sasuapi kung thuai ih a to laiah a vun man. “Judah ramih profet na si maw?” tiah a sut.

“Ka si,” tiah a rak ti.

15Anih in, “Ka inn ah ra awla rawl ra ei aw,” a ti.

16Asinain Judah ram profet in, “Na inn ahcun ka lo thlun thei lo ding. Na hnenah zianghman ka in ka ei thei lo ding, 17ziangahtile Bawipa in zianghman ei lo ding le in lo dingin thu i pek ih ka ratnak lamzin khal zawh kir lo dingin i fial a si,” tiah a ti.

18Cule Bethel ih profet patarpa in, “Keimah khal nangmah vekin profet ka si ve ih, Bawipa ih thupekmi vekin ka inn ih lo sawm dingah vancungmi in i fial a si,” tiah a ti. Asinain profet patarpa cu thuphan a per a si.

19Cutiih a sawm ruangah Judah ram profet cun a thlun ih profet patarpa hnenah cun rawl a va ei. 20Cutiih rawl an ei tlang laifangah Bawipa ṭongkam cu profet patarpa hnenah a ra ih, 21a mikhualpa hnenah cun, “Bawipa in, ‘Ka thu na ngai lo ih tuah dingih ka lo fialmi na tuah lo ruangah le, 22kir tahratin ei lo ding ka tinak hmunih rawl na ei ruangah, nangmah cu thah na si ding ih na ruak cu na pipu pawl ih thlaan ah phum a si lo ding,’ a ti,” tiah a au ciamco.

23Rawl an ei ṭheh tikah profet patarpa in Judah ram profet pa ih hrangah laak kung a damsak ih a feh. 24Lamzin ah kiosa pakhat a tong ih cuih kiosa cun a keu that. A ruak cu lamzin ah a ril ih a laak le kiosa cu a kiangah an ding. 25Khual tlawng pawl in a ruak cu an hmu ih, a kiangih kiosa a din khal an hmu. Bethel ah an feh ih an hmuh vekin an vung sim.

26Cuih thu cu profet tarpa in a theih tikah, “Pathian thupekmi a thlun duh lotu cu amah a si. A tiam cia vekin Bawipa in kiosa a thlah ih kiosa in a zon ih a thah a si cu!” a ti. 27Cule a fapa pawl hnenah, “Ka laak kung i damsak uh,” tiah a fial. An damsak ih, 28a vung feh tikah profet ih ruak cu lamzin ah a ril in a hmu ih, a kiangah laak le kiosa khal an ding lai in a hmu. Kiosa in profet ih ruak cu a ei lo ih laak khal cu a deh lo. 29Profet patarpa in cuih ruak cu a laak parah a suang ih ṭah ding le phum dingah Bethel ah a phur. 30Anmah ih sung thlaan ah an phum ih amah le a fapa pawl in, “Mi vanduai unaupa ee,” tiah an ṭah. 31An phum ṭheh hnuah profet tarpa in a fapa pawl hnenah, “Ka thih tikah hi thlaan ahhin i run phum uhla ka ruh cu hi pa ih ruh kiangah run ret uh. 32Bawipa ih ṭongkam bangtuk in Bethel ih biakṭheng le Samaria khua pawl ih biaknak hmun pawl parih lungkim lonak a simmi hmuahhmuah cu a ṭong vekin an kim thluh leh ding a si,” tiah a ti.

Jeroboam Ih Sualnak Poimawhbik

33Siangpahrang Jeroboam cu thilsual a tuahnak lamzin ihsin a kir cuang lo ih cuih hlan vekin biakṭheng a dawlnak hmun ih hnaṭuantu dingah mi menmen sungin puithiam a hril thotho. Zokhal puithiam can a duhtu cu hriak a culh hluahhlo. 34Cutiih a sual ruangah amah ih hrin in Israel ram uk ringring theinak ding cu a siatsuah a si.

Currently Selected:

1 SIANGPAHRANG 13: FCL

Highlight

Copy

Compare