1 SIANGPAHRANG 15

Judah Siangpahrang Abijah

(2 San. 13.1—14.1)

1Israel Siangpahrang Jeroboam in ram a uknak kum hleiriat kumah Abijah cu Judah siangpahrang a cang ih, 2Jerusalem ihsin kum thum sung a uk. A nu cu Absalom fanu Maakah a si. 3A pa ih a rak tuahmi sualnak pawl a tuah thluh ve ih a pu David vek si loin Abijah cu Bawipa a Pathian hnenah a fel lo a si. 4Asinain David ruangah, Jerusalem khua humtu dingah le amah hnuah Jerusalem ihsin ram uktu dingah Bawipa a Pathian in Abijah cu fapa pakhat a pek. 5Hit mi Uriah ih thu lawngah David parah Bawipa ih lungkim lonak a um; thudang ahcun David in Bawipa cu a lung a awiter ih a thupekmi pakhat hman a el lo ruangah hibangtuk in Abijah parah Bawipa in hna a ṭuannak a si. 6Abijah ih ram a uk sung hmuahhmuah ah Abijah le Jeroboam cu cat loin an do aw ringring. 7Abijah ih tuahmi dangdang pawl cu Judah Siangpahrang Pawlih Thuanthu Cabu sungah kimtein an ngan a si.

8Abijah cu a thi ih David khawpi ah an phum. Cule a fapa Asa in siangpahrang a run ṭuan.

Judah Siangpahrang Asa

(2 San. 15.16—16.6)

9Israel Siangpahrang Jeroboam in ram a uknak kum kul kum ah Asa cu Judah siangpahrang a cang ih, 10Jerusalem ihsin kum sawmli le kum khat sung a uk. A pi cu Absalom ih fanu Maakah a si. 11Asa in a pu David vekin Bawipa ih lungawinak thil a tuah. 12An ram sungih khawzing biaknak hmun pawl ih nunau siseh mipa siseh hlawhhlang pawl hmuahhmuah cu ramsung ihsin a dawi ṭheh ih, amah hlanih siangpahrang a ṭuantu pawl ih rak tuahmi milem le lemzuk pawl hmuahhmuah a hlon ṭheh. 13A pi Maakah khal leilung ṭhattertu khawzingnu Asherah ih lemzuk cu bia dingih a tuah ruangah siangpahrang ih nu dinhmun ihsin a hlon. Asa in cuih lemzuk cu a hau ih Kidron Tiva kiangah a ur. 14Asa in khawzing biaknak hmun hmuahhmuah an zatein a balsiat thluh lo naón a nun sung hmuahhmuah ah Bawipa rinsan le ṭihzah in a um. 15A pa ih Pathian hnenih a rak pekmi thilri hmuahhmuah cu Biakinn sungah a ret; amah ih pekmi sui le ngun ih tuahmi beelkheng pawl khal a ret.

16Judah Siangpahrang Asa le Israel Siangpahrang Baasha cu ram uktu an si sung hmuahhmuah ah cat loin an do aw ringring. 17Ṭum khatah Baasha in Judah ram a do ih Judah ram in a suakmi le a lutmi pawl kham ṭheh tum in Ramah khua ralhruang in a kulh ciamco. 18Cutikah Siangpahrang Asa in Biakinn le siangpahrang inn ih a ummi sui le ngun hmuahhmuah a lak ih a kuthnuai bawi pawl hrekkhat ih kut in Damaskas ah a kuat. Hezion ih tupa, Tabrimmon ih fapa a si mi Siria siangpahrang Benhadad hnenah hiti in thu a cah: 19“Kan pa le pawl an rak ṭantlang vekin kannih khal kan ṭangtlang pei. Laksawng ah hi sui le ngun hi ka lo kuat. Siangpahrang Baasha thawn ṭangtlangtu nan sinak cu rak phiat awla ka ram sungih a retmi a ralkap pawl cu Baasha in a ko sal thluh ding a si,” tiah a ti.

20Asa ih thucah mi cu Siangpahrang Benhadad a lung a kim ih a ralbawi pawl Israel ramih khua hrekkhat pawl siim dingin a thlah. Ijon khua, Dan khua, Abel Beth Maakah khua, Galilee Tipi kiangih ram pawl le Naftali ram hmuahhmuah an lak. 21Cuih thu cu siangpahrang Baasha in a theih tikah Ramah khua ralhruang ih a kulh reromi cu a bang ih Tirzah khua ah a kir.

22Cule siangpahrang Asa in Judah ramsung hmuahhmuah ah thu a pek ih a ramsung minung pawl pakhat hman hrelh loin a ko ih Baasha in Ramah khua kulhnak ih a hmanmi lungto le thingpheng pawl cu an thiar ciamco. Cuih lungto le thing cun Asa in Mizpah le Benjamin ram sungih a ummi Geba khua a sak.

23Siangpahrang Asa ih tuahmi dangdang, a ralṭhatnak thu pawl le khua a kulhnak thu pawl cu, Judah Siangpahrang Pawlih Thuanthu Cabu sungah kimten an ngan. Asinain a tar zawng ah a ke a na ih a awl ta. 24Asa cu a thi ih David khawpi siangpahrang thlaan ah an phum. Cule a fapa Jehoshafat in siangpahrang a run ṭuan.

Israel Siangpahrang Nadab

25Judah Siangpahrang Asa in ram a uknak kum hnih kum ah Siangpahrang Jeroboam ih fapa Nadab cu Israel siangpahrang a cang ih kum hnih sung a uk. 26A pa vekin Bawipa ih hmaiah a sual ih Israel mi pawl cu sualnak sungah a hruai.

27Issakhar phun Ahijah ih fapa Baasha in Nadab cu a phiar ih Nadab le a ralkap pawl in Filistin ramih Gibbethon khawpi an do ih an kulh ṭheh laifangah Baasha in Nadab cu a that. 28Nadab an thah cu Judah siangpahrang Asa in ram a uknak kum thum kum ah a si. Cuih hnuah Baasha in Israel siangpahrang a run ṭuan. 29Hmakhatte-ah Baasha in Jeroboam ih innsang le sungkhat pawl hmuahhmuah a that ciamco. Bawipa ih siahhlawh Shiloh khuami profet Ahijah hnen ihsin Bawipa ih ṭong mi vekin Jeroboam ih sungkhat hmuahhmuah cu thah ṭheh an si. Pakhat hman an luat lo. 30Hi bangtuk thil a suahnak cu Jeroboam in sualnak a tuah ih Israel khal sualnak sungih a hruai ruangah Israel ih Pathian Bawipa a thin a hengter ruangah a si.

31Nadab ih tuahmi dangdang cu Israel Siangpahrang Pawlih Thuanthu Cabu sungah kimtein an ngan a si. 32Judah siangpahrang Asa le Israel Siangpahrang Baasha cu siangpahrang an si sung hmuahhmuah ah cat loin an do aw ringring.

Israel Siangpahrang Baasha

33Judah Siangpahrang Asa in ram a uknak kum thum kumah Ahijah fapa Baasha cu Israel rampi ih siangpahrang a cang ih, Tirzah khua ihsin kum kul hluanli sung a uk. 34A hlanih siangpahrang a ṭuantu Jeroboam vekin Bawipa ih parah sualnak a tuah ih Israel mi pawl khal sualnak ah a hruai.

Currently Selected:

1 SIANGPAHRANG 15: FCL

Highlight

Copy

Compare