1 SANSIARNAK 19

David In Ammon Mi Le Siria Mi A Neh

(2 Sam 10.1-19)

1Tikcu a hung rei deuh tikah Ammon siangpahrang Nahash a thi ih a fapa Hanun siangpahrang a cang. 2David in, “A pa Nahash cu ka parih a ṭhat vekin Hanun parah rualpi ṭha ka sinak ka langter ve ding,” a ti. Curuangah Hanun va topi dingah David in a ai-awh ah palai a thlah.

Ammon ram an thleng ih siangpahrang Hanun hnen an feh tikah, 3Ammon ram hotu upa pawl in an siangpahrang hnenah cun, “Na pa upatnak ah David in hi palai pawl hi nangmah topi dingah a thlah a si, tiah na ruat maw? Cutiih na ruah asile na palh tengteng ding! Kan ram neh duh ah hipawl hi thlingthlatu-ah a rak thlah a si sawn,” an ti.

4Cutikah Hanun in David mithlah mi palai pawl cu a kai ih an khahmul a meet ṭheh ih an korfualpi cu an taai ri-in a tansak ṭheh hnu ah a thlah. 5An ningzak in inn hmanah an tlung ngam lo. Cuih thu cu David in a theih tikah an khahmul a sau hlan lo Jerikho ih um ding in thu a cah.

6Siangpahrang Hanun le Ammon mi pawl in David an ral ih an canter kha an theihsaal tikah ngun tangka cuai thawng hleiriat le zariat tluk pe in tlunlam Mesopotamia le Siria khawpi Maakah le Zobah in ralkap an saang. 7An saanmi rangleng thawng sawmthum le thawnghnih le Maakah siangpahrang ralkap pawl cu an ra ih Medeba kiangah ṭanhmun an khuar. Ammon mi pawl khal an khua ciar in an pok ih raldo dingin an tiar aw.

8Cuih thu cu David in a theih tikah ralbawi Joab le Israel ralkap zatein cu pawl va do dingah a fehter. 9Ammon mi pawl cu an suak ih Rabbah khawpi hnarpawn in ṭanhmun an khuar. Anmah bawm dingih a rami siangpahrang pawl cu hramlak in ṭanhmun an khuar ve.

10Ral pawl in hmailam le dunglam in in do ding ti kha Joab in a theih tikah Israel ralkap sungih ralkap ṭhabik pawl a hril ih Siria ralkap do dingah a bawhter. 11A dang Israel ralkap hmuahhmuah cu a unau Abishai a hoter ih Ammon ralkap pawl do dingin an bawh ve. 12Cule Joab in Abishai hnenah, “Siria ralkap pawl in kei in neh a si ahcun in ra bawm pei. Ammon ralkap pawl in nang an lo neh a si le ka ra lo bawm ding. 13Cakzet le ralṭha zetin um aw! Kan miphun le kan Pathian ih khawpi pawl hrangah nasa tak in kan do pei. Bawipa ih duhnak vekin si ko seh,” tiah a ti.

14Cuṭheh vete in Joab le a ralkap pawl cun an nor ciammam ih Siria ralkap pawl cu an tlan ṭheh. 15Siria ralkap pawl an tlan ti kha Ammon ralkap pawl in an theih tikah Abishai do ngam loin an zaam ih khawpi sungah an siip ṭheh. Cuih hnuah Joab cu Jerusalem khua ah a tlung.

16Israel pawl in in neh seksek a si tikha Siria mi pawl in an theih tikah Eufrates tiva in nisuahnak lamih a ummi Siria ramsung minung pawl ralkap ah an lak ih Zobah peng siangpahrang Hadadezer ih ralkap hotu upa bik Shobak an hoter. 17Cuih thu cu David in a theih tikah Israel ralkap pawl cu a kokhawm lala ih Jordan tiva a tan hnuah Siria ralkap do ding in ṭanhmun a khuar. An do aw ciammam ih, 18Israel pawl in an neh lala. David le a ralkap pawl in Siria rang ralkap thawng sarih le ke ralkap thawng sawmli an that. Siria ralbawi upa bik Shobak tla an that. 19Siangpahrang Hadadezer kuthnuai siangpahrang pawl in Israel ralkap in in neh thluh a si, ti an theih tikah David thawn remnak an tuah ih a ukmi ah an cang. 20Cuih hnu cun Siria mi in Ammon mi cu an bawm duh nawn lo.

Currently Selected:

1 SANSIARNAK 19: FCL

Highlight

Copy

Compare