1 SANSIARNAK 18

David Ih Ralnehnak

(2 Sam 8.1-18)

1Tawkfang a rei hnuah David in Filistin mi pawl a do ih a neh. Gath khawpi le a kiangkap ih khawte pawl tla a lak ṭheh. 2Cule Moab mi pawl a do ih a neh. A kuthnuai minung ah an cang ih siah an pek.

3Cuih hnuah Siria ram sung Zobah peng siangpahrang Hadadezer in Eufrates Tiva hna lamih ram pawl neh dingih a feh laiah Hamath ram kiangah David in a do ih a neh. 4David in a rangleng thawng khat, rang ralkap thawng sarih le ke ralkap thawng kul a kai. Rangleeng zakhat hrangah rang cu a zuah ih a dang pawl cu an kaizatha a satcat ṭheh.

5Cule Damaskas ih ummi Siria mi pawl in siangpahrang Hadadezer bawm dingah ralkap an kuat. Cupawl tla cu David in a neh ih ralkap thawng kul hluanhnih a that. 6An ram sungah a ralkap a ret ih a ukmi ah an cang ih siah an pek. Bawipa in David cu khuazakipah nehtu a siter. 7Hadadezer kutthuai bawi pawl ih kenmi sui phaw pawl cu David in a long ih Jerusalem ah a tlunpi. 8Hadadezer ih ukmi Tibbath le Kun khawpi pawl ihsin dar tamzet a lak. Cumi pawl cu Solomon in Biakinn sungih khokheng pawl, ṭhuam pawl le maihum tumpipi tuahnak ah a hmang.

9David in Hadadezer ralkap a neh thluh thu Hamath siangpahrang Toi in a thei. 10Curuangah siangpahrang David lawm dingah le lungawipi dingah Toi cun a fapa Joram a thlah; ziangahtile Toi in Hadadezer cu voi tampi a rak do zomi a si. Joram in David cu sui, ngun le dar ih tuahmi thilri tampi laksawng a pek. 11Cuih thilri cu David in Edom mi, Moab mi, Ammon mi, Filistin mi le Amalek mi pawl hnenin a lonmi sui le ngun pawl thawn Bawipa biaknak ih hman dingah a pek.

12Cun Zeruiah ih fapa Abishai in Edom mi cu Cite Phairawn ah thawng hleiriat a that. 13Edom ram sungah ralkap a ret ih cuticun Edom mi pawl cu David ih uk mi ah an cang. Bawipa in David cu khuazakip ah nehtu a siter.

14David in Israel ram le a minung pawl cu dingthluk lairelnak in a uk. 15Abishai ih u Joab cu ralbawi upa bik a si. Ahilud fapa Jehoshafat cu rampi cazin kaitu a si. 16Ahitub fapa Zadok le Abiathar fapa Ahimelek cu puithiam an si. Seraiah#Seriah tihi Hebru ṭong cun Shavsha tiin a um. (2 Sam 8:17.) cu siangpahrang zungih sungṭuan a si. 17Jehoiada ih fapa Benaiah cu siangpahrang kiltu Kereth mi le Peleth mi pawl hotu a si. David ih fapa pawl cu a pa ih uknak sungah hnaṭuan tumpipi ṭuantu an si.

Currently Selected:

1 SANSIARNAK 18: FCL

Highlight

Copy

Compare