1 SANSIARNAK 20
20
David In Rabbah A Lak
(2 Sam 12.26-31)
1Khua a hung ṭhal ih siangpahrang pawl an raldo caan a hung cuut tikah, Joab le a ralkap cu an feh ih Ammon ram an do. An khawpi Rabbah an kulh ṭheh. Culai ah David cu Jerusalem ah a um. Joab in Rabbah cu a do ih a siatsuah ṭheh. 2Cule Ammon mi in Molek an timi khawzing lem an nei ih a sui lukhuh cu cuai kul a rit. A sungah lungmankhung a um ih cumi cu David in a lak ih a siangpahrang lukhuh ah a bun. Khawpi sungih hransaw tampi tla a lak. 3Khawsung mi pawl cu a hruai hai ih hluah le tupheng le hreitlung thawn hna a ṭuanter. Ammon ram khua dangdang mi pawl tla cuvek thotho in a tuah. Cuih hnuah a ralkap pawl thawn Jerusalem ah an kir.
Filistin Mitumzet Pawl An Do
(2 Sam 21.15-22)
4Cuih hnuah, Filistin mi pawl thawn Gezer ah an do aw. Israel mi in an neh. Cuih ṭum ah Hushah mi Sibbekai in mikei tia a si mi Sippai an timi a that.
5Cule Filistin thawn an do-aw lala ih Jair fapa Elhanan in Gath mi Goliath ih unau Lahmi a that; a feihlung cu thiamtleeng tia a si.
6Gath ah an do-aw sal ih cuih khua ahcun a kut khatlam ah kutzung paruk veve, a ke khatlam ah kezung paruk veve a neimi a um. Amah cu khuahlan mitum zetzet pawl ih tesinfa a si. 7Israel mi pawl cu a dodal ih David ih unau Shammah ih fapa Jonathan in cupa cu a that.
8Hi minung pathum, David le a ralkap pawl ih an thahmi hi Gath khua ih mitum zetzet tefa pawl an si.
Currently Selected:
1 SANSIARNAK 20: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
