1 SANSIARNAK 17

David Hnenih Nathan Thusim

(2 Sam 7.1-17)

1Siangpahrang David cu a siangpahrang inn ahcun a um. Nikhat ah David in profet Nathan a ko ih, “Kei cu sidar zanthing ih sakmi inn ah ka um, asinain Bawipa ih Thukam Kuang cu puanthlam sungah kan ret,” tiah a ti.

2Cutikah Nathan in, “Pathian cu na hnenih a um ruangah na thinlung ih a ummi cu tuah ko aw,” tiah a ti.

3Asinain cuih zanah cun Pathian in Nathan hnenah, 4“Feh awla ka siahhlawh David hnenah, ‘Ka umnak dingih biakinn a satu ding cu nang na si lo ding. 5Israel mi pawl Izipt ram in ka hruaisuak ihsin tuih sun tiangah biakinn sungah ka um dah lo; ka umnak cu puanthlam a si ih hmun khatión hmun khatah ka ceer. 6Israel mi pawl thawn ka khualtlawnnak hmuahhmuah ah ka hrilmi an hotu zohman, ziangah so sidar thing in ka hrangah biakinn na sak lo, tiah ka ti dah lo,’ a ti,” va ti aw.

7“Ka siahhlawh David hnenah cun va sim awla Keimah Ziangkimtithei Bawipa in amah ka sim duh mi cu, ‘Hramlakih tuu na khalhnak in ka lo lak ih ka minung Israel uktu ah ka lo tuah. 8Na fehnak hmun kipah ka lo umpi ih na lamzin ih na ral hmuahhmuah ka lo nehsak ṭheh. Leilung tlunih mi nasa bik tlukin na hmin ka thanter ding. 9-10Zohman ih an hrem thei lonak dingah an hrangah hmun ka hril ih ka miphun Israel pawl cu cuih hmunah ka umter. Hitawk ram an thlen vete in mi siatsuah lawng a duhtu pawl in an do ringring; asinain tuih hnu ahcun cubangtuk cu a um nawn lo ding. Na ral pawl hmuahhmuah neh dingah le tesinfa tampi nei dingah thu ka lo kam a si. 11Na thih ni a kim ih na pupa hnenih phum na si tikah na fapa pawl sungin pakhat cu siangpahrang ah ka tuah ding ih a uknak cu ka cakter ding. 12Ka hrangah amah in biakinn a sak ding ih a uknak cu kumkhua in ka hngetter ding. 13Keimah cu a pa ka si dingih amah cu ka fapa a si ding. Nangmah siangpahrang canter duh ah ka dawihlo mi Saul ka tlansan vek cun anih cu ka tlansan lo ding. 14Ka miphun le ka uknak zohtu le kiltu ah kumkhua in ka tuah ding. A uknak cu a cem dah lo ding,’ va ti aw,” tiah a ti.

15Pathian ih a phuanmi hmuahhmuah cu Nathan in David a sim ṭheh.

David Lungawi Thlacamnak

(2 Sam 7.18-29)

16Siangpahrang David cu Bawipa ih umnak Puanthlam ahcun a feh ih a to hnuah thla a cam: “Maw Bawipa Pathian, keimah le ka innsang hrangih na thil tuahmi pawl hi ka ruah tikah ka hlawh hrimhrim lo. 17Cuih tlunah hi hnakih thil thupi deuh sawn ka hrangah na tumtah ih ka tesinfa pawl an hmailam kum tampi hrang tiang thukam na tuah zo; Bawipa Pathian, kei hi mi nasazet vekin i zoh a si. 18Hi tlunah ziangso kei cun ka sim thei nawn ding? Na siahhlawh kei hi i thei ṭheh ko naón hi tlukih i cawisan lawmmam hi! 19Hi bangtuk thil ka hrangih tuah le hmailam ka sunlawinak pawl tuah hi na duh mi le na tumtah mi hrimhrim a rak si! 20Maw Bawipa, nangmah bangtu zohman an um lo; nangmah lawng Pathian na si. Kanmah hrimhrim in kan thei zo. 21Saltaannak in na runsuak ih na miphun ih na tuahmi Israel mi bangtuk leilung tlunah an um lo. An hrang ih khawruahhar le mangbangza na tuah ruangah leilung pumpi ah na hmin cu a thang ṭheh. Izipt ram ihsin na minung cu na suahter ih hmaiih an nor tikah miphun dangdang cu na dawihlo ṭheh. 22Kumkhua hrangin Israel cu na minung ah na tuah zo ih, maw Bawipa, nang cu an Pathian na si zo.

23“Curuangah maw Bawipa, ka hrang le ka tesinfa pawl hrangih na thukam tuahmi cu kimter awla, ka tuah ding na timi cu tuahsuak hram aw. 24Na hmin cu a thang ding ih mi hmuahhmuah in, ‘Ziangkimtithei Bawipa cu Israel tlun ah Pathian a si,’ tiah kumkhua in an ti ding. Cule ka uknak cu sanikhuk na hmunter ding. 25Na salpa ka hnenah hin na tumtahmi na phuang ih, ‘Na tesinfa pawl cu siangpahrang an si ding,’ ti tiang i sim zo ruangah hi thlacamnak hi na hnenih ka hun thlenter ngamnak cu a si. 26Maw Bawipa, nang cu Pathian na si ih hi bangtuk mangbangza thukamnak hi ka hnenah na tuah zo. 27Na mithmaiṭha hmutu an si ringringnak dingah ka tesinfa pawl cu thlawsuah pe hram aw, tiah zaangfah ka lo dil a si. Bawipa nangmah in thlawsuah na pe zo; na thlawsuah cu an parah kumkhua in um hram seh,” tiah a ti.

Currently Selected:

1 SANSIARNAK 17: FCL

Highlight

Copy

Compare