1 SANSIARNAK 16
16
1David ih sakmi puanthlam ahcun Thukam Kuang cu an fehpi ih a sungah an ret. Cule mei-ur thawinak le rem-awk thawinak pawl Bawipa ih hnenah an pek. 2David in cuih thawinak a ṭheh tikah misenpi pawl cu Bawipa ih hminin thlawsuah a pek ih, 3rawl a zem hai. Israel mi an zatein nunau siseh, mipa siseh, mi pakhat ah sang zawl khat, sa em semkhat ciar le sabit caar malte ciar a pek.
4David in Levi mi hrekkhat pawl cu Thukam Kuang hmai ih Pathian thangṭhat ding le hla thawn cawimawi ding le Bawipa Israel ih Pathian a betu pawl hotu dingah a ret. 5Cupawl lakih hotu bik cu Asaf a si ih a bawmtu cu Zekhariah a si. Jeiel, Shemiramoth, Jehiel, Mattithiah, Eliab, Benaiah, Obed Edom le Jeiel pawl tla in an bawm. Annih cu ṭingṭang tumtu an si ih Asaf cu darsumsel tumtu a si. 6Puithiam pahnih Benaiah le Jahaziel cu Thukam Kuang hmaiah a tikcu caan te ih tawtawrawt tum ringringtu an si. 7Cutiin Asaf le a unau Levi mi pawl cu David in Pathian thangṭhat dingih ṭuanvo hmaisa bik a rak peknak a si.
Pathian Thangṭhatnak Hla
8 Bawipa cu thangṭhat uh;
A hmin cu phuang uh.
A thil tuahmi cu mi hmuahhmuah
hnenah than uh.
9 Bawipa ih hnenah thangṭhatnak
hla sak uh,
Thil mangbangza a tuahmi sim uh.
10Amah ih ta kan si ruangah nan
lungawi uh;
Amah betu hmuahhmuah in nan
lungawi uh.
11 Bawipa le a cahnak hawl uh;
Catbaang loin a mithmai zoh uh.
12Khawruahhar a tuahmi ruat uh,
Mangbangza a tuahmi cing ṭha uh,
A thuṭhennak pawl tla;
13Pathian salpa Jakob tefa pawl,
Pathian hrilmi Israel ih tefa
pawl tla,
14 Bawipa cu kan Pathian a si,
Thil maksak a tuahmi hngilh
hlah uh,
A thuṭhennak leilung a khat.
15Pathian ih thukam cu hngilh
hrimhrim hlah uh;
Kumkhaw daih ih a tuahmi a si;
16Abraham hnenih a thukam le
Isaak hnenih a thutiam cu.
17 Bawipa in Jakob hnenah
a thukam a nemhnget,
Israel hnenah kum khua daih
dingin a hngetter.
18“Kanaan ram ka lo pe ding,
Na covo a si ringring ding,”
a ti.
19Pathian ih minung pawl cu
an malte,
Kanaan ramah mikhual ah an cang.
20Ram khat in ram khatah an vak,
Uknak pakhat in a dang pakhat ah
an ceer.
21Sikhalsehla zohman ih neh-nen
mi an si lo;
Pathian in a hum hai ih anmah
ṭanah siangpahrang pawl a kawk.
22“Ka hrilmi ka milai pawl cu
dai hlah uh,
Ka profet pawl tham hlah uh,”
a ti.
23Leilungpi in Bawipa cu
thangṭhat uh;
A runnak thuthangṭha cu ni khat
hnu ni khat phuang uh.
24Miphun hmuahhmuah hnenah
a sunlawinak cu aupi uh;
Mikip hnenah a thil tithei zia
sim sin uh.
25 Bawipa cu a nasa ngaingai ih
hlorh tlak a si;
Khawzing dangdang hnakin ṭihzah
ding a si.
26Miphun dangdangih khawzing cu
a lem lawng an si;
Asinain vanih um thil hmuahhmuah
hi Bawipa ih siammi an si.
27Amah cu huham le sunlawinak in
a kulh ṭheh;
A Biakinn cu huham le lungawinak in a khat.
28Leitlun mi hmuahhmuah in
Bawipa cu thangṭhat uh;
A huham le a sunlawinak hlorh uh.
29A hmin sunglawi cawimawi cio uh;
Thawinak pe in a Biakinn ah ra uh.
Thianghlim Mi a lang tikah
a hmaiah kun uh;
30Leilung miphunkip a hmaiah
khur in um seh.
Leilungpi a dinhmun a hnget zo,
ṭhawn theih ding a si lo!
31Maw lei le van, nan lungawi uh;
Bawipa cu siangpahrang a si,
tiah mikip hnenah than uh.
32Au uh, tifinriat le a sung
ummi pawl tla;
Lungawi uh, leiram le a parih
ummi tla.
33Tupi sung thingkung pawl cu
lungawi in an au ding,
Lungawi in Bawipa ih hmaiah
Hla an sak ding.
Leilung uk dingih Bawipa
a rat tikah cun.
34 Bawipa ih hnenah nan lung
awi uh;
Ziangahtile Amah cu a ṭha;
Amah ih duhdawtnak cu kumkhua in
a hmun a si.
35A hnenah, “Maw Pathian, kannih
in Runtu, in run hram aw,
Hmun khatah in khawm awla,
Miphun tampi kut in in hum aw;
Cuticun na parah lungawi thu
kan rel ding ih,
Na hmin thianghlim cu kan thang
ṭhat ding,” ti uh.
36 Bawipa, Israel ih Pathian
cu thangṭhat uh;
Amah cu kumkhua in kumkhua tiang
thangṭhat uh.
Cutikah misenpi in “Amen,” an ti ih Bawipa cu an thangṭhat.
Jerusalem Le Gibeon Ah Pathian Biaknak
37David in Asaf le a unau Levi mi pawl cu Thukam Kuang retnak hmunih hnaṭuan ringringtu dingah a ret. Nitinte in an ṭuanvo cu an tuahsuak ding a si. 38Anmah bawmtu ah Jeduthun ih fapa Obed Edom le a hrinpi minung sawmruk le pariat an um. Obed Edom le Hosah cu kotka kiltu an si.
39Puithiam Zadok le a unau puithiam pawl cu Gibeon ih ummi Bawipa ih biaknak hmunah hnaṭuantu an si. 40Bawipa in Israel mi hnenih a pekmi Daan sungih a um vekin puithiam pawl cun zingtin le zantin mei-ur thawinak an pe ringring. 41Anmah thawn hmun khatah Heman le Jeduthun le a hleice ih hrilmi pawl cu, “Kumkhua ih a hmunmi Bawipa ih duhdawtnak” tiin thangṭhat dingah an um. 42Thangṭhatnak hla an sak tikah an tummi tawtawrawt, darsumsel le tummi thilri pawl tla Heman le Jeduthun cun an zoh phah fawn. Cule Jeduthun fapa pawl in kotka an kil.
43Cun misenpi cu inn ah an tlung ih David khal a innsang thlawsuah dingin a tlung ve.
Currently Selected:
1 SANSIARNAK 16: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
