1 SANSIARNAK 15

Thukam Kuang Ṭhawn An Tum

1David in amah ih hrangah Jerusalem ah inn tampi a sak. Pathian Thukam Kuang hrangah hmun pakhat a zuah ih cutawkah puanthlam a sak. 2Cule David in, “Levi mi pawl cu Thukham Kuang phurtu dingah le amah ih hnaṭuantu dingah Pathian ih hrilmi an si ruangah anmah lawng in Pathian ih Thukam Kuang cu an phur ding,” tiah a ti. 3Puanthlam a sakmi sungih Thukam Kuang ret dingah Israel mi pawl cu David in Jerusalem ah a kokhawm ṭheh. 4Cuih hnuah Levi mi pawl le Aaron tesinfa pawl a ko. 5Kohath hrin Levi mi sung in Uriel a ra ih a hrinpi minung za le kul hotu a si. 6Merari hrin in Asaiah a ra ih a hrinpi zahnih le kul hotu a si. 7Gershom hrin in Joel a ra ih a hrinpi za le sawmthum hotu a si. 8Elizafan hrin in Shemaiah a ra ih a hrinpi zahnih hotu a si. 9Hebron hrin in Eliel a ra ih a hrinpi minung sawmriat hotu a si. 10Uzziel hrin in Amminadab a ra ih a hrinpi minung za le hleihnih hotu a si.

11Cun David in puithiam Zadok, Abiathar le Levi mi paruk Uriel, Asaiah, Joel, Shemaiah, Eliel, le Amminadab pawl a ko ih, 12an hnenah, “Nanmah hi Levi hrin pawl ih hotu cu nan si. Ka sak ciami inn sungih Bawipa, Israel Pathian ih Thukam Kuang nan run ret theinak dingah nanmah le nan Levi hrinpi pawl cu tithiangfai aw uh. 13Hitiih Thukam Kuang phurhnak ih nan tel hi a hmaisa bik a si lo; Bawipa lungkim zawng in kan biak lo ruangah Bawipa kan Pathian in in hrem a si kha,” tiah a ti.

14Cule Bawipa, Israel ih Pathian ih Thukam Kuang la dingin puithiam pawl le Levi mi pawl cu an tithiangfai awter. 15Levi mi pawl in Thukam Kuang cu an liangah laang in an zawn ih Bawipa in Moses hnenih thu a pek vekin an tuah.

16David in Levi mi hotu pawl hnenah an unau Levi mi pawl cu hla satu, ṭingṭang tumtu le darsumsel pawl tumtu tiah ṭhen dingin thu a pek. 17-21Hla saktu pawl sungin Joel fapa Heman, a sungkhat Berekhiah ih fapa Asaf le Merari hrin in Kushaiah ih fapa Ethan cu darsumsel tumtu dingah an hril. Anmah bawmtu dingah a hnuailam Levi mi pawl cu ṭingṭang aw-feem tumtu dingah an hril: Zekhariah, Jaaziel, Shemiramoth, Jehiel, Unni, Eliab, Maaseiah le Benaiah.

Cun ṭingṭang aw-pawr tumtu dingah a hnuailam Levi mi pawl cu an hril: Mattithiah, Elifelehu, Mikneiah, Azaziah le Biakinn kilvengtu Obed Edom le Jeiel tla an si.

22Levi mi awn-mawi tumtu pawl hotu dingah hla thiamzetmi Khenaniah an hril; 23Thukam Kuang kiltu dingah Berekhiah le Elkanah an hril. 24Thukam Kuang hmai ih tawtawrawt tumtu dingah puithiam Shebaniah, Joshafat, Nethanel, Amasai, Zekhariah, Benaiah le Eliezer pawl an hril. Obed Edom le Jehiah khal Thukam Kuang retnak sangka kiltu an si ve.

Jerusalem Ah Thukam Kuang An ṭhawn

(2 Sam 6.12-22)

25David, Israel hruaitu pawl le ralkap hotu ralbawi pawl cu Thukam Kuang la dingin Obed Edom inn ahcun an feh ih lungawinak puai tumpi an tuah. 26Pathian ih bomnak Thukam Kuang phurtu Levi mi pawl ih an co tengtengnak dingah cawcang pasarih le tuu pasarih that in thawinak an tuah. 27David le awn-mawi tumtu pawl, an hla hotu Khenaniah le Thukam Kuang phurtu Levi mi pawl cu puan mawi le puan mankhung an sin ciar. Cuih tlunah David cun puithiam angki ṭaangthlaih a hruk. 28Cuticun Israel mi hmuahhmuah in Thukam Kuang cu an thlun ih lungawi in an au phah ih tawtawrawt, tuuki, darsumsel le ṭingṭang tum phah in Jerusalem ah an fehpi.

29Thukam Kuang cu khawpi sungih an luhpi tikah Saul ih fanu Mikhal in tukvirh in a hei zoh ih siangpahrang David khir phah rero ih a laam kha a hmuh tikah a mitkem in a nautat ngaingai.

Currently Selected:

1 SANSIARNAK 15: FCL

Highlight

Copy

Compare