Apocalipsa 9
9
A Tsintsul Anghil Asunã Trumpeta
1A tsintsul anghil asunã trumpeta sh-vidzui unã steauã, tsi cãdzu dit tser pri loc sh-atsilui lji si deadi cljeaia a putslui di Ahãndami. 2Cãndu discljisi putslu a Ahãndamiljei, dit puts s-alinã un fum ca fumlu a unui cireap mari. Soarili sh-aera si scutidisirã di fumlu a putslui. 3Dit fum ishirã carcaletsi pri loc sh-a lor lã si deadi puteari ashãtsi di cum au puteari scrachilji a loclui. 4Atsilor lã si dzãsi s-nu zãrãseascã iarba a loclui, nitsi vãrã virdeatsã, nitsi vãrã pom, ma mash oaminjlji tsi nu au vula a Dumnidzãlui pri frãmtili a lor. 5A carcaletsilor nu lã si deadi volje s-lji vãtãma atselji, ma s-lji munduea di tsintsi meshi sh-dorlu a munduiriljei a lor s-eara ca ntsãparea a scraplui. 6Tu atseali dzãli oaminjlji va u-caftã moartea, ma nu va u-aflã atsea. Va vor s-moarã, ma moartea va fugã di elji.
7Pãrearea a carcaletsilor eara unã soi ca atsea a caljilor etimãsits trã alumtã sh-pri capitli a lor avea unã ca soi di curuni di furii sh-fatsa a lor eara ca fatsa a oaminjlor. 8Perlu a lor eara ca perlu di muljeari sh-dintsilji a lor eara ca dintsilji a ljundarilor. 9Avea tu cheptu un ca cheptar di her sh-vãzirea a arichilor a lor eara ca vãzirea a multor cãrutsi sh-a caljilor tsi alãga tu alumtã. 10Elji avea codzi tsi undzea ca scrachi sh-ca atsi, sh-tu codzili a lor eara putearea tsi fãtsea arãu a oaminjlor di tsintsi meshi. 11Ca amirã pri nãshi avea anghilu a Ahãndamiljei. Numa a lui pri uvreieshti eara “Abaddon”, iarã pri gãrtseshti eara “Apollion.”#9:11 Abaddon sh-Apollion va s-dzãc aspãrgãtorlu.
12Taxiratea#9:12 “Cavai” Apo 8:13. atsea di prota tricu. Ma ia, ma yin ninga doauã taxirãtsi dupã aestã.
13A shasilu anghil asunã trumpeta sh-mini avdzãi unã boatsi di coarnili a altarlui di furii tsi easti nãintea al Dumnidzãu, 14dzãcãnda a shasilui anghil tsi avea trumpeta: “Dizleagã-lji atselji patru anghilji, cai suntu ligats la marili arãu Eufrat.” 15Atumtsea patru anghilji cai eara etimãsits trã atsea oarã, dzuã, mes sh-anu, s-dizligarã trã vãtãmari unã a treia parti a oaminjlor. 16Numirlu a suldatsilor a cãvãlãriiljei eara njilji di njilji sh-multi njilji, lu avdzãi numirlu a lor. 17Caljilji sh-cãvãlarlji tsi vidzui tu viziuni avea cheptar roshu ca fleaca, ca alabastru sh-galbinã ca schifurã. Capitli a caljilor eara ca capitli a ljundarilor sh-dit gura a lor ishea foc, fum shi schifurã. 18Di aesti trei pledzi di foclu, di fumlu sh-di schifurã tsi ishea dit gura a lor s-vãtãmarã unã a treia parti a oaminjlor. 19Cã putearea a caljilor eara tu gura a lor sh-tu coadzili a lor, cã coadzili a lor undzea ca nãpãrtitsli, metsi avea capiti sh-cu aesti zãrãsea. 20Iarã alantsã oaminji, atselji tsi nu s-vãtãmarã di aesti pledzi, nu s-mitãnjiusirã di faptili a mãnjilor a lor shi nu dãnãsirã trã alãvdari demonjlji sh-idolji atselji di furii sh-di asimi, di bãcãr, di cheatrã sh-di lemnu, cai nu pot nitsi s-veadã, nitsi s-avdã sh-nitsi s-imnã. 21Nu s-mitãnjiusirã trã vãtãmãrili a lor, nitsi trã mãyiili a lor, nitsi trã putãnsirili a lor sh-nitsi trã furãrili a lor.
Currently Selected:
Apocalipsa 9: BLRR
Highlight
Copy
Compare
Share
Want to have your highlights saved across all your devices? Sign up or sign in
