Apocalipsa 7
7
Israelitslji Atselji Vulusits
1Dupã aestã, vidzui patru anghilji stãnda tu patru chioshili a loclui sh-tsãnãnda patru vimturili a loclui tra s-nu sufla vimtu pri loc, pri amari sh-pristi vãrã pom. 2Deapoea vidzui un altu anghil cai s-alina di la rãsãrit sh-avea vula al Dumnidzãu atsilui yiu. Elu lã grãi cu boatsi analtã atsilor patru anghilji, a cui lã si fu datã si zãrãsea loclu sh-amarea. 3Deapoea adãvgã: “Nu zãrãsits loclu, amarea sh-ponjilji pãnã cãndu s-lã vulusim pri frãmti huzmichearlji a Dumnidzãlui a nostru.” 4Atumtsea avdzãi numirlu atsilor tsi eara vulusits: unã sutã patrudzãtsi patru di njilji di vulusits dit tuti soili a hiljilor al Israel.
5Dit soia al Iuda doisprãdzatsi di njilji di vulusits,
di soia al Ruben doisprãdzatsi di njilji,
dit soia al Gad doisprãdzatsi di njilji,
6dit soia al Asher doisprãdzatsi di njilji,
dit soia al Neftal doisprãdzatsi di njilji,
dit soia al Manase doisprãdzatsi di njilji,
7dit soia al Simeon doisprãdzatsi di njilji,
dit soia al Levi doisprãdzatsi di njilji,
dit soia al Isacar doisprãdzatsi di njilji,
8dit soia al Zabulon doisprãdzatsi di njilji,
dit soia al Iosif doisprãdzatsi di njilji,
dit soia al Beniamin doisprãdzatsi di njilji di vulusits.
Multsãmea Atsea Marea cu Stranji Albi
9Dupã aesti, vidzui unã multsãmi mari cai nu putea s-u numira vãrã, di tuti fãrili, soili, populjilji sh-limbili stãnda nãintea a thronlui sh-nãintea a Njelui, nviscuts cu stranji albi sh-tsãnea dedzi di pãlnji tu mãnjili a lor. 10Elji aurla cu boatsi analtã dzãcãnda:
“Ascãparea easti a Dumnidzãlui a nostru
tsi sheadi pri thron sh-a Njelui!”
11Tuts anghilji stãtea anvãrliga di thron, di aushlji sh-di patru fãpturili atseali yii. Deapoea cãdzurã pri dintsã cu fatsa mpadi nãintea a thronlui sh-alãvdarã Dumnidzãlu, 12dzãcãnda:
“Amin! Ghinicuvintarea, mãrirea,
frunimeatsa, hãristisirea, tinjia, fuchia
sh-putearea suntu a Dumnidzãlui a nostru
tu eta a etilor. Amin!”
13Un di aushlji lo zborlu sh-mi ntribã: “Cai suntu atselji cu stranji albi sh-di iu au vinitã?” 14Mini lj-apãndisii: “Doamne, tini shtii.” Atumtsea elu nji dzãsi: “Aeshti suntu atselji, tsi au vinitã dit munduirea atsea marea sh-li au aspilatã stranjili a lor sh-li au alãghit cu sãndzili a Njelui. 15Trã atsea suntu nãintea a thronlui al Dumnidzãu sh-lji huzmitipsescu a lui dzua sh-noaptea tu templul a lui, iarã atsel tsi sheadi pri thron va hibã streaha a lor. 16Nu va aibã ma foami, nu va aibã ma seati, nu va cadã soarili pri nãshi sh-nu va aibã vãrã pirã upuritã, 17cã Njelu, cai easti tu mesea a thronlui, va lji picurãreascã sh-va lji ducã pri izvurili a apilor a banãljei ‘sh-Dumnidzãlu va ashteargã tuti lãcrinjli di ocljilji a lor.’”
Currently Selected:
Apocalipsa 7: BLRR
Highlight
Copy
Compare
Share
Want to have your highlights saved across all your devices? Sign up or sign in
