Apocalipsa 6
6
Discljiderea atsilor Shasi Vuli
1Deapoea vidzui Njelu tsi discljisi unã di atseali shapti vuli sh-avdzãi unã di patru fãpturili atseali yii cai dzãtsea cu boatsi bumbunidzatã: “Haidi.” 2Sh-ia, vidzui un cal albu sh-atsel tsi cãlãrea avea un arcu, sh-atsilui lji si deadi unã curuni. Elu ishi nichisinda shi s-dusi nãpoi s-nichisea.
3Cãndu Njelu discljisi vula a doaua, avdzãi fãptura a doaua tsi dzãtsea: “Haidi.” 4Atumtsea ishi afoarã un altu cal roshu-fleac sh-atsilui tsi cãlãrea lji si deadi s-mutea pacea di pristi loc, tsi oaminjlji si s-vãtãma cu un-alantu. A lui lji si deadi unã spatã mari.
5Cãndu Njelu discljisi vula a treia, avdzãi fãptura a treia tsi dzãtsea: “Haidi!” Sh-ia, vidzui un cal laiu sh-atsel tsi cãlãrea avea unã zigã tu mãna a lui. 6Deapoea avdzãi unã boatsi tu mesea a patru fãpturilor tsi dzãtsea: “Unã mizurã di grãn ti un denar sh-trei mizuri di ordzu ti un denar, ma nu nji aspardzã untulemlu sh-yinlu.”#6:6 un denar easti plãtirea tu unã dzuã
7Cãndu Njelu discljisi vula a patrua, avdzãi boatsea a fãpturiljei a patrua tsi dzãtsea: “Haidi!” 8Sh-ia, vidzui un cal gãlbinos sh-atsel tsi cãlãrea u-avea numa “Moartea” sh-dupã nãsu yinea Colasea. A lor lji si deadi puteari trã vãtãmari un a patrua parti a loclui cu spatã, cu foami, cu hulerã sh-cu agrinjili a loclui.
9Cãndu Njelu discljisi vula a tsintsea, vidzui sum altar suflitli atsilor tsi eara tãljeats trã itia a zborlui al Dumnidzãu sh-trã itia a mãririljei tsi avea datã. 10Elji aurla cu boatsi analtã, dzãcãnda: “Pãnã cãndu Doamne, Sãmtu sh-Alihioslu, nu giuditsi sh-nu ljeai dhichi trã sãndzili a nostru di atselji tsi bãneadzã pri loc?” 11A cathiunui lã-si deadi un stranjiu albu sh-lã si dzãsi s-ashteaptã ninga putsãn chiro, pãnã cãndu si mplinea numirlu atsilor cai au huzmitipsit deadun sh-a fratsilor a lor tsi prindea si s-vãtãma ashãtsi ca elji.
12Cãndu s-discljisi vula a shasea, s-featsi un cutrembur mari sh-soarili s-featsi laiu ca un sac di lãnã sh-luna ntreagã s-featsi ca sãndzili. 13Stealili a tserlui cãdzurã pri loc, ashãtsi ca hiclu tsi alasã hitslji a lui nicoapti s-cadã, dupã tsi easti ascuturat di furtuna. 14Tserlu s-trapsi ca unã carti anvãrligatã, sh-tuts muntsãlji sh-insulili si strãmutarã dit loclu a lor. 15Atumtsea amiradzlji a loclui, mãrlji, cumandantsãlji, avutslji, vãrtoshlji, tuts sclayilji sh-tuts liberi, s-ascumsirã prit pishtirei sh-prit shcãnghili a muntsãlor. 16Elji dzãtsea a muntsãlor sh-a shcãnghilor: “Cãdets pristi noi sh-ascundets-nã di fatsa atsilui tsi sta pri thron sh-di nãrirea a Njelui, 17cã vini dzua atsea marea a nãririljei a lui#6:17 niscãnti manuscrisi au scriat “nãrirea a lor”. sh-cai poati si sta pri cicioari?”
Currently Selected:
Apocalipsa 6: BLRR
Highlight
Copy
Compare
Share
Want to have your highlights saved across all your devices? Sign up or sign in
