Luca 9
9
Isusul lã Pitreatsi di Doisprãdzatslji
1Isusul lã gri a doisprãdzatsilor ucenitsi a lui sh-lã deadi a lor puteari sh-autoritati pristi tuts dratslji shi s-vindicã niputerili. 2Deapoea lji pitricu ti predicari amirãriljea a Dumnidzãlui shi s-vindicã lãndzitslji. 3Sh-lã dzãsi a lor: “Nu loats tsiva cu voi pri cali: nitsi ciumagã, nitsi trastã, nitsi pãni, nitsi pãradz sh-nitsiun di voi s-nu aibã cãti doauã tunitsi. 4Tu atsea casã iu va intrats, aclo stãtets pãnã cãndu s-fudzits di cãsãbã. 5Macã vãrã nu vã aproachi, ishinda dit atsel cãsãbã, scuturats puhlu di cicioarili a voastri ca mãrtirii contra a lor.” 6Atumtsea elji s-nchisirã sh-pitrumsirã hoarili scurpisãnda evanghelu sh-vindicãnda iutsido.
Herodul Tulburat trã Isusul
7Herodul, tetrarclu, avdzã trã tuti lucrili tsi avea faptã shi s-tulburã, cã niscãntsã dzãtsea cã Ioanul eara nyeat dit mortsã. 8Altsã dzãtsea cã si-eara aspusã Elia, sh-niscãntsã altsã cã eara nyeat un di prufitsilji di atselji vecljilji. 9Ma Herodul dzãsi: “A Ioanului mini lj-am tãljiatã caplu. Cai va hibã aestu, di la cai ma avdu ahtãri lucri?” Sh-cãfta s-lu videa.
Isusul Hrãneashti Tsintsi Njilji
10Cãndu s-turnarã ucenitsilji, lji aspusirã a Isusului tuti lucrili tsi elji avea faptã. Atumtsea elu lji lo cu nãsu shi s-trapsi nãparti tu un loc ermu la un cãsãbã tsi s-acljima Betsaida. 11Cãndu multsãnjili loarã di hãbari, s-dusirã dupã nãsu. Elu li ghini-ashtiptã sh-lã grea trã amirãriljea a Dumnidzãlui sh-vindica atselji tsi avea ananghi ti vindicari. 12Cãndu dzua ma ascãpa, di doisprãdzatsi lji s-apruchearã al Isus sh-lji dzãsirã: “Nchisea multsãmea, tra s-neagã prit hoari sh-prit cãmpurili di anvãrliga, s-aflã streahã sh-hranã, cã aoa him tu un loc ermu.” 13Ma elu lã dzãsi a lor: “Dats-lã voi s-mãcã.” Elji apãndisirã: “Noi nu avem altã dicãt tsintsi pãnji sh-doi peshti, mash macã nidzem noi s-acumpãrãm hranã trã tuts aeshti oaminji.” 14Aclo eara vãrã tsintsi njilji di bãrbatsi. Ma elu lã dzãsi a ucenitsilor a lui: “Bãgats-lji s-sheadã mpadi tu buluchi cãti tsindzãtsi.” 15Elji featsirã ashã sh-lji-apunarã tuts. 16Atumtsea Isusul lo tsintsi pãnjili sh-doi peshtilji, sh-dupã tsi sculã ocljilji cãtrã tser, li ghinicuvãntã, li pãrtsã sh-li deadi a ucenitsilor a lui s-li dãdea a multsãmiljei. 17Tuts mãcarã shi s-fãnãtirã, sh-di bucãtsili tsi armasirã adunarã doisprãdzatsi di coshuri.
Petrul Aspuni cã Isusul Easti Hristolu
18Unã dzuã cãndu Isusul ma s-ruga tu singurami, ucenitsilji eara deadun cu nãsu. Sh-elu lji ntribã: “Cai dzãtsi populu cã escu mini?” 19Elji apãndisinda lji dzãsirã: “Niscãntsã dzãc Ioan Pãtidzãtorlu, altsã dzãc Elia, sh-altsã dzãc un di prufitsilji di atselji strãveclji tsi easti nyeat.” 20Sh-elu lji ntribã: “Ma voi, cai dzãtsets cã escu mini?” Atumtsea Petrul apãndisi: “Hristolu a Dumnidzãlui.”
Isusul Prividzu Moartea a Lui
21Atumtsea elu lã ursi cu aspru si nu apunã a vãrui, 22dzãcãnda: “Hiljilu a Omlui prindi s-patã multi, s-lu arniseascã aushlji, mãrlji a preftsilor sh-scriblji, s-lu vatãmã sh-a treia dzuã s-nyeadzã.” 23Deapoea lã dzãsi a tutulor: “Macã vãrã va hibã uceniclu a meu, si s-aleapid, s-u ljea cathi dzuã crutsea a lui shi s-mi urmeadzã. 24Cã cai va u-ascapã bana a lui, va u chearã, ma cai va u chearã bana a lui trã mini, va u ascapã. 25Tsi hãiri ari omlu ma s-amintã tutã lumea, sh-apoea s-chearã sh-elu shi s-ducã tu zãrari? 26Cã, macã a vãrui lji yini arushini di mini sh-di zboarili a meali, sh-a Hiljilui a Omlui va lj-yinã arushini di nãsu, cãndu s-yinã tu mãrirea a lui sh-a Tatãlui sh-a sãmtsãlor anghilji. 27Dealihea ma vã dzãc cã aoa suntu niscãntsã tsi nu va u veadã moartea, nãinti s-veadã amirãriljea a Dumnidzãlui.”
Isusul sh-Lunjinarea a lui
28Sh-aproapi vãrã optu dzãli dupã tsi dzãsi aesti zboari, Isusul lo cu nãsu Petrul, Ioanul, Iacovul shi s-alinã pri munti trã rugari. 29Sh-cãndu ma s-ruga, videarea a fatsãljei a lui alãxi sh-nvishtearea a lui s-featsi albã sh-lunjinatã. 30Sh-ia, doi bãrbats ma zbura cu nãsu. Elji eara Moisiul sh-Elia, 31tsi s-aspusirã tu mãriri shi-zbura ti fudzirea a lui di aestã banã sh-tsi va s-fãtsea tu Ierusalem. 32Petrul sh-sotslji a lui eara bãgat tu somnu greu. Cãndu s-dishtiptarã, vidzurã mãrirea a lui sh-atselji doi bãrbats cai eara cu nãsu. 33Sh-cãndu aeshti ma s-dipãrta di la nãsu, Petrul lj-dzãsi al Isus: “Nvitsãtore, trã noi easti ghini s-armãnem aoa, s-fãtsem trei tendi: unã trã tini, unã trã Moisiul sh-unã trã Elia,” ma elu nu shtia cã tsi dzãtsea. 34Cãndu elu ma grea ashã, vini un nior tsi lji anvãli cu aumbra a lui, sh-ucenitsilji s-aspãrarã, cãndu intrarã tu nior. 35Deapoea unã boatsi s-avdza dit nior dzãcãnda: “Aestu easti Hiljiu a meu aleptu, ascultats-lu!” 36Sh-cãndu s-avdza aestã boatsi, Isusul s-aflã singur dip. Elji tãcurã sh-tu atseali dzãli nu lji aspusirã a vãrui di atseali tsi avea vidzutã.
Isusul Vindicã Un Ficior Demonizat
37Alantã dzuã, cãndu elji dipunarã dit munti, unã multsãmi mari di oaminji ishi nãintea al Isus. 38Atumtsea un bãrbat di multsãmea ahurhii s-aurlã dzãcãnda: “Nvitsãtore, tsã fac rigeai, toarnã mutrita pri hiljiu a meu, cã easti singurlu tsi am. 39Shi ia, un duh lu apucã sh-troarã elu zghileashti. Deapoea trimburã, scoati spumi sh-mizi fudzi di la elu, dupã tsi lu dirinã. 40Mi rugai a ucenitsilor a tãlji s-lu avinã, ma elji nu puturã.” 41Sh-Isusul apãndisinda, dzãsi: “O farã fãrã pisti sh-anapuda, pãnã cãndu va s-hiu cu voi sh-pãnã cãndu va s-vã aravdã? Adu-l aoatsi hiljiu a tãu!” 42Cãndu cilimeanlu ma s-apruchea, draclu lu scuturã sh-lu dirinã. Ma Isusul lu vãrghi duhlu atsel nicuratlu, lu vindicã cilimeanlu sh-lji-lu deadi a tatãlui a lui.
Isusul Prividzu di a Doaua Oarã Moartea a Lui
43Tuts armasirã thãvmãtisits di mãrirea a Dumnidzãlui. Sh-cãndu tuts ma thãvmãtisea trã itsido tsi fãtsea Isusul, elu lã dzãsi a ucenitsilor a lui: 44“Bãgats-lã ghini tu minti aesti zboari: Hiljilu a Omlui va s-cadã tu mãnjili a oaminjlor.” 45Ma elji nu li aduchirã aesti zboari. Aduchirea a lor eara ascumtu sh-trã aestã nu putea s-li aduchea sh-s-aspãrea s-lu ntriba trã atseali zboari.
Cuvenda ntrã Ucenitsilji
46Apoea namisa di elji ahurhi unã cuvendã: cai di nãshi va eara ma mari. 47Atumtsea Isusul, shtinda cã tsi minduiri avea elji tu ininjli a lor, lo un cilimean njic sh-lu apruche ningã nãsu. 48Apoea lã dzãsi a lor: “Atsel tsi lu aproachi aestu cilimean njicã tu numa a mea, mi aproachi mini. Atsel tsi mi aproachi mini, aproachi atsel tsi mi pitricu mini, cã atsel tsi easti ma njic di voi tuts, elu va hibã ma marli.” 49Atumtsea Ioanul luãnda zborlu dzãsi: “Nvitsãtore, noi vidzum un om cai avina dratslji tu numa a ta sh-lu curmãm, cã elu nu ti urmeadzi deadun cu noi.” 50Ma Isusul lj-dzãsi: “Nu lu curmats, cã cai nu easti contra di voi, cu voi easti.”
Ncuntrarea di la Samaritenjilji
51Cãndu ma s-apruchea dzãlili tsi Isus prindea s-alina tu tser, elu apofãsi s-ducã tu Ierusalem, 52sh-pitricu nãinti hãbãrsitorlji. Aeshti, s-nchisirã sh-intrarã tu unã hoarã a Samaritenjilor tra s-lji etimãseascã yinearea. 53Ma atselji di hoarã nu vrurã s-lu apruchea, cã elu imna cãtrã Ierusalem. 54Cãndu lu vidzurã aestã, ucenitsilji a lui Iacovul sh-Ioanul dzãsirã: “Doamne, vrei tini tsi s-dzãtsem s-dipunã foc dit tser shi s-lji upureascã?” 55Ma elu s-turnã cãtrã elji sh-lji vãrghi. 56Deapoea s-dusirã tu unã altã hoarã.
S-urmedzi Isusul custiseashti
57Cãndu elji ma imna pri cali, un lj-dzãsi: “Doamne, mini va ti urmedz iutsido tsi s-ti duts.” 58Ma Isusul lj-dzãsi: “Vulchili au gãvrili sh-puljilji a tserlui fuljeauã, iarã Hiljiu a Omlui nu ari iu s-andoapirã caplu.” 59Deapoea lji dzãsi a unui altu: “Urmeadzã-mi!” Ma elu lj-apãndisi: “Doamne, dã-nji volje ma nãinti s-mi duc s-ngropã tatã-nju.” 60Isusul lji dzãsi: “Alasã mortsãlji s-lji ngroapã mortsãlji a lor. Iarã tini imnã sh-preadicã amirãriljea a Dumnidzãlui!” 61Un altu lj-dzãsi: “Doamne, mini va ti urmedz tini, ma dã-nji volje ma nãinti s-mi dispartu cu Fumealja a mea.” 62Isusul lj-dzãsi: “Vãrã tsi ari bãgatã mãna tu paramandã sh-mutreashti nãpoi, nu easti axiu trã huzmitipsiri tu amirãriljea a Dumnidzãlui.”
Currently Selected:
Luca 9: BLRR
Highlight
Copy
Compare
Share
Want to have your highlights saved across all your devices? Sign up or sign in
