Luca 10
10
Isusul Pitreatsi Shaptidzãtsi sh-Doi di Ucenjitsi
1Dupã aesti Domnul numi shaptidzãtsidoi altsã sh-lji nchisi doi cãti doi nãintea a lui tu cathi cãsãbã sh-loc, iu elu va njidzea. 2Sh-lã dzãsi a-lor: “Sitsirarea easti multã, ma lucrutorlji suntu putsãnji. Rugats-vã a Domnului a sitsirariljei s-pitreacã lucrutori la sitsirarea a lui. 3Dutsets-vã! Ia, mini ma vã pitrec ca njelji namisa di luchi. 4Nu loats nitsi pungã, nitsi trastã, nitsi sandali. Pri cali nu vã salutats cu vãrã. 5Tu cathi casã tsi va intrats, ma nãinti dzãtsets: ‘Pacea tu aestã casã!’ 6Sh-macã easti atsia un hiljiu a paciljei, pacea a voastrã va dipunã pristi nãsu, macã nu, va s-toarnã la voi. 7Armãnets tu atsea casã. Mãcats sh-bets di atseali tsi va vã da, cã lucrutorlu easti axiu trã plata a lui. Nu imnats di la unã casã tu alanta. 8Tu itsi cãsãbã iu va intrats sh-vã ghini-ashteaptã, mãcats tsi vã bagã nãinti. 9Vindicats lãndzitslji tsi va hibã aclo sh-dzãtsets-lã a lor: ‘Amirãriljea a Dumnidzãlui easti ningã voi.’ 10Ma, macã intrats tu vãrã cãsãbã sh-nu vã ghini-ashteaptã, ishits prit cãljuri sh-dzãtsets: 11‘Noi ma scuturãm sh-pulbirlu a cãsãbãlui a vostru tsi nã s-alãchi. Ma voi si shtits cã Amirãriljea a Dumnidzãlui easti aproapi.’ 12Mini vã dzãc cã atsea dzuã trã Sodom va hibã ma lishor dicãt atsel cãsãbã. 13Cavai di tini Corazin! Cavai di tini Betsaida! Cã ma s-eara faptã tu Tiro sh-tu Sidon thavmatili tsi s-featsirã la voi, elji di cu chiro va s-eara mitãnjiusits, nviscuts cu sac sh-apunats tu cinushi. 14Trã atsea, giudicata trã Tiro sh-Sidon va hibã ma lishor dicãt trã voi. 15Sh-tini Capernaum, cum mindueshti cã ti anãltsashi pãnã tu tser? Tini va ti ahãnduseshti pãnã tu Colasi. 16Cai vã ascultã voi, mi ascultã mini. Cai vã arniseashti voi, mi arniseashti mini. Cai mi arniseashti mini, arniseashti atsel tsi mi pitricu mini.”
17Shaptidzãtsidoi di ucenitsi s-turnarã cu harauã sh-dzãsirã: “Doamne, sh-demonjlji nã si sumpun tu numa a ta.” 18Sh-Isusul lã dzãsi a lor: “Mini lu vidzui Satanlu cãdzãnda dit tser ca un sfulgu. 19Ia, vã am dat autoritati s-ncãlcats pristi nãpãrtitsi sh-scrachi sh-pri itsi fuchii a neamiclui, sh-tsiva nu va vã zãrãseascã. 20Cu tut atsea, nu vã hãrsits cã duhurili ma vã si sumpun, ma hãrsits-vã ma multu cã numili a voastri suntu scriati tu tser.”
21Tu atsea oarã Isusul s-umplu cu harauã prit Duhlu Sãmtu sh-dzãsi: “Mini ti alavdu, Tatãl, Domnul a tserlui sh-a loclui, cã li ascumseshi aesti a mintimenjilor sh-a shtiutslor, sh-u discupirish la cilimenjlji atselji njitsi. Ie, Tate, cã ashã ts-arãsi a tsãea. 22Itsido nji easti datã di la Tatãl a meu, sh-vãrã nu shtii cai easti Hiljilu, dicãt mash Tatãl sh-vãrã nu shtii cai easti Tatãl, dicãt mash Hiljilu sh-atsilui tsi Hiljilu aleadzi s-lu discoapirã.”
23Deapoea s-turnã cãtrã ucenitsilji sh-lã dzãsi dinãparti a lor: “Ca hara di ocljilji cai ved atseali tsi videts voi. 24Ma vã dzãc cã multsã prufits sh-amiradzi vrurã s-videa atsea tsi ma videts voi, ma nu u vidzurã, shi s-avdã atseali tsi ma avdzãts voi, ma nu li avdzãrã.”
Parabola a Bunlui Samaritan
25Atumtsea un mastru a legiljei si sculã tsi s-bãga tu provã Isusul sh-lji dzãsi: “Nvitsãtore, tsi prindi s-fac tsi s-mushtinescu bana eternã?” 26Sh-Isusul lj-dzãsi: “Tsi easti scriatã tu lege? Cum u cãntsã?” 27Elu lj-apãndisi: “S-vrei Domnul, Dumnidzãlu a tãu cu tutã inima a ta, cu tut suflitlu a tãu, cu tutã fuchia a ta, sh-cu tutã minduirea a ta, shi s-vrei aproapili a tãu ca cum ti vrei tini.” 28Isusul lj-dzãsi: “Apãndisishi ndreptu. Fã aestã sh-va s-bãnedz!” 29Ma elu vrãnda s-lji aspunea cã easti ndreptu, lj-dzãsi al Isus: “Cai easti aproapili a meu?” 30Atumtsea Isusul lj-apãndisi: “Un om dipunã dit Ierusalem cãtrã Ierico sh-cãdzu tu mãnjili a furilor. Elji lu dispuljearã, lu featsirã cu pledzi, s-dipãrtarã sh-lu alãsarã aproapi di moarti. 31Chiui tsi un preftu, dipunãnda tu atsea cali, vidzu omlu sh-tricu cãtrã alantã parti. 32Tut ashã sh-un Levit, cãndu agiumsi la atsel loc, vini l-vidzu sh-tricu cãtrã alantã parti. 33Ma un Samaritan, tsi ma cãlãtorea lji s-apruche sh-cãndu lu vidzu aspusi njilã. 34Vini la elu, lj-arcã untulem sh-yin sh-lji ligã pledzili. Deapoea l-bãgã pri pravda a lui, lu dusi tu unã hani sh-lji featsi huzmeti. 35Alantã dzuã, scoasi doi denari sh-lji li deadi a hãngiului dzãcãnda: ‘Fã huzmeti a lui sh-cãti pãradzi va s-hãrgiueshti va ts-li dau cãndu va mi tornu.’ 36Cai di aeshti trelji tsã si pari cã s-featsi aproapili atsilui tsi cãdzu tu mãnjili a furilor?” 37Sh-elu apãndisi: “Omlu tsi aspusi njilã trã nãsu.” Atumtsea Isusul lj-dzãsi: “Duti sh-fã ashãtsi sh-tini!”
La Casa ali Martii sh-ali Marii
38Chiui tsi cãndu elji ma cãlãtorea, Isusul intrã tu unã hoarã, sh-unã muljeari cu numa Marta lu ashtiptã la casa a ljei. 39Marta avea unã sorã tsi s-acljima Maria. Ea stãtu la cicioarili al Isus sh-avdza nvitsãtura a lui. 40Ma Marta eara apucat cu lucrili a etimãsiriljei sh-dupã tsi lji s-apruche lj-dzãsi: “Doamne, nu vrei s-shtii cã sora a mea mi alãsã singur s-fac huzmeti? Dzã-lji s-mi agiutã!” 41Domnul lj-apãndisi: “Marta, Marta, tini eshti apucatã sh-munduitã cu multi lucri. 42Ma unã easti di ananghi. Maria aleapsi partea atsea ma buna, tsi nu va lji si mutã.”
Currently Selected:
Luca 10: BLRR
Highlight
Copy
Compare
Share
Want to have your highlights saved across all your devices? Sign up or sign in
