Luca 7
7
Pistea a Tsenturionlu
1Dupã tsi bitisi trã dzãtseari tuti aesti zboari trã populu cai lu asculta, Isusul intrã tu Capernaum. 2Aclo un tsenturion avea un huzmichear tsi lu axiusea multu, eara niputut sh-greu trã moarti. 3Tsenturionlu, cãndu avdzã trã Isusul, lj-pitricu niscãntsã di aushlji a Iudeilor si lj-ruga s-yinea s-vindica huzmichearlu a lui. 4Cum agiumsirã la Isusul, elji lji si rugarã multu dzãcãnda: “Elu easti axiu tsi tini s-lji fats aestã ghineatsã, 5cã elu lu va populu a nostru sh-elu u adrã sinagoga ti noi.” 6Atumtsea Isusul s-dusi cu nãshi. Cãndu nu eara multu diparti di casã, tsenturionlu pitricu niscãntsã oaspits s-lji dzãtsea: “Doamne, nu ti cãrtea cã mini nu escu axiu tsi tini s-intsrã tu citia a mea. 7Tr-atsea nu mi lugursii ti axiu s-yin la tini. Ma tini dzã mash un zbor sh-huzmichearlu a meu va s-vindicã. 8Cã sh-mini escu un om sum cumanda altui sh-am sum mini suldats. Cãndu lj-dzãc a unui: ‘Duti,’ elu s-dutsi, sh-cãndu lj-dzãc a altui: ‘Haidi,’ elu yini. Cãndu lj-dzãc a huzmichearlui a meu: ‘Fã aestã,’ elu u-fatsi.” 9Cãndu Isusul li avdzã aesti zboari, s-thãvmãtisi cu nãsu, s-turnã cãtrã multsãmea tsi lu urma sh-dzãsi: “Mini ma vã dzãc cã nitsi tu Israel nu am aflatã ahãntã mari pisti.” 10Sh-cãndu pitricutslji s-turnarã la casã, aflarã vindicatã huzmichearlu tsi eara niputut.
Isusul Nyie Hiljilu a Veduvãljei
11Dupã niheamã Isusul s-dusi tu un cãsãbã tsi s-acljima Nain. Deadun cu nãsu njidzea ucenitsilji a lui sh-unã multsãmi mari. 12Cãndu s-apruche di poarta a cãsãbãlui, vidzu cã ma dutsea ti ngrupari un mortu, singurlu hiljiu a mumãljei a lui, tsi eara veduvã. Unã multsãmi mari di cãsãbã eara cu nãsã. 13Macãt u vidzu, Domnu avu njilã trã nãsã sh-lji dzãsi: “Nu plãndzi!” 14Deapoea s-apruche, bãgã mãna pri sinduchi sh-atselji tsi u purta dãnãsirã. Atumtsea elu dzãsi: “Tinire, mini tsã dzãc, scoalã-ti!” 15Sh-mortul si sculã sh-ahurhi si zburãscã. Sh-Isusul lji-lu deadi a mãsiljei. 16Atumtsea tuts s-ciudisirã sh-alãvda Dumnidzãlu dzãcãnda: “Namisa di noi easti fãnirusit un prufit mari,” shi: “Dumnidzãlu vidzu populu a lui.” 17Shi hãbarea aestã s-arãspãndi tu tutã Iudea sh-anvãrliga di tut loclu.
Isusul sh-Ioan Pãtidzãtorlu
18Ucenitsilji al Ioan lji spusirã a lui trã tuti aesti. Ioanul acljimã ningã nãsu doi di ucenitsilji a lui, 19sh-lji pitricu la Domnul s-lji dzãtsea: “Eshti tini atsel tsi prindi s-yinã, ama prindi s-ashtiptãm vãrã altu?” 20Aeshti bãrbats s-dusirã la elu sh-lji dzãsirã: “Ioan Pãtidzãtorlu nã pitricu la tini s-ti ntribãm: ‘Eshti tini atsel tsi prindi s-yinã, ama prindi s-ashtiptãm vãrã altu?’” 21Tu atsea oarã Isusul avea vindicatã multsã oaminji di lãngoari, di munduirili sh-di duhurili nicurati sh-la multsã orghi lã deadi videarea. 22Atumtsea Isusul lã apãndisi a lor: “Imnats sh-dzãtsets al Ioan tsi avets vidzutã sh-tsi avetsã avdzãtã: Orghilji amintarã nãpoi videarea, shcljiochlji imnã, leproshilji ma s-curã, surdzãlji ma avdã, mortsãlji ma s-nyeadzã sh-evanghelu s-dimãndã la niavutslji. 23Ghinicuvintat s-hibã atsel tsi nu s-ncheadicã di itia a mea!” 24Cãndu pitricutslji al Ioan fudzirã, elu apãrnji s-dzãcã a multsãnjilor trã Ioanul: “Tsi vrets s-videts tu irnjii? Un cãlami tsi u-mina vimtul? 25Tsi vrets s-videts tsi ishit? Un om nviscut cu stranjii moali? Ia, atselji tsi poartã stranji scunchi, bãneadzã tu aveari sh-tu cãsi amirãreshti. 26Tsi vrets s-videts tsi ishit? Un prufit? Ie, mini ma vã dzãc, ninga ma multu di un prufit. 27Ioanul easti atsel trã cai easti scriatã:
‘Ia mini ma pitrec nãintea a fatsãljei a ta mãndatorlu a meu,
tsi va s-ndreagã calea nãintea a ta.’#Mal 3:1.
28Cã mini ma vã dzãc tsi di amintatslji di la muljeri nu easti nitsiun ma mari dicãt Ioan. Ma njiclu tu amirãriljea a Dumnidzãlui easti ma mari dicãt nãsu.” 29Tut populu tsi lu avdzã sh-taxidarlji lj-deadirã ndriptati a Dumnidzãlui cã s-pãtidzarã cu pitedzlu a Ioanului. 30Fariseilji sh-nvitsãtorlji a legiljei lu arnisirã planlu a Dumnidzãlui trã nãshi cã nu s-pãtidzarã di la Ioan. 31Atumtsea Isusul dzãsi: “Cu tsi s-lji undzescu, oaminjlji a aishtei gheneratsi? Sh-a cui lj-undzescu? 32Lji undzescu a cilimenjilor tsi sta pri pãdzi sh-aurlã a sotsilor dzãcãnda:
‘Noi avem bãtutã flueara ti voi
sh-voi nu avets giucat.
Noi avem vãitat di voi,
sh-voi nu avets plãmsit.’
33Vini Ioan Pãtidzãtorlu, tsi nu mãca pãni sh-nitsi nu bea yin sh-voi dzãtsets: ‘Elu ari un demon.’ 34Vini Hiljilu a Omlui tsi mãca sh-bea, sh-voi dzãtsets: ‘Ia, mãcãtorlu sh-biutorlu, oaspilu a taxidarilor shi a amãrtioshilor.’ 35Ma a mintimeniljei al Dumnidzã lji da ndriptati tuts hiljilji a ljei.”
Muljearea Amãrtioasã Aumsi Isusul
36Un di Fariseilji acljimã Isusul s-mãca deadun cu nãsu. Elu intrã tu casa a Fariseului shi s-apunã la measã. 37Sh-ia, unã muljeari di atsel cãsãbã, tsi eara unã amãrtioasã, cãndu lo di hãbari cã Isusul eara la measa a un Fariseu, adusi unã vasã di alabastru mplin cu untulem cu bunã njurizmã. 38Ea stãtea dinãpoi la cicioarili a lui sh-plãngãnda, apãrnji s-lji li spila cu lãcri cicioarili, s-lji li ashteargã cu perili a caplui a ljei, s-lji li bãsha cicioarili shi s-lji li aundzea cu untulem cu bunã njurizmã. 39Cãndu lu vidzu aestã Fariseulu tsi lu avea acljimat, dzãsi cu mintea a lui: “Aestu ma s-eara prufit, va shtia tsi soi di om easti muljearea tsi bãgã mãna, cã ea easti amãrtioasã.” 40Isusul lji dzãsi: “Simone, voi s-tsã dzãc tsiva.” Sh-elu lj-apãndisi: “Nvitsãtore, grea.” 41Sh-Isusul lj-dzãsi: “Un om avea doi mprumutatsi. Un lji avea mprumut tsintsisuti di denari sh-alantu tsindzãtsi. 42Cãndu elji nu avea s-plãtea, elu lã ljirtã a doilor mprumutlu. Dupã tini, cai di elji va l-va ma multu?” 43Simonul lj-apãndisi: “Minduescu, elu a cui s-ljirtã ma multu.” Sh-Isusul lj-dzãsi: “Giudicash ndreptu.” 44Apoea s-turnã cãtrã muljearea shi lj-dzãsi a Simonlui: “U vedz muljearea aestã? Mini intrai tu casa a ta sh-tini nu nj-dãdeshi apã di aspilari cicioarili, ma ea nji-li aspilã cicioarili cu lãcrinji a ljei sh-nji-li ashtearsi cu perli a caplui. 45Tini nu nj-dãdeshi nitsi unã bãshari, ma ea di cãndu intrai, nu pãpsi di bãshari cicioarili a meali. 46Tini nu nj-aumsesh caplu cu untulem di masin, iarã ea nji-li aumsi cicioarili cu untulem cu njurizmã bunã. 47Trã atsea mini ma tsã dzãc cã amãrtiili a ljei atseali multi suntu ljirtati, cum u aspusi mari vrearea a ljei. Ma a cui lji-si ljeartã putsãn, ari putsãn vreari.” 48Apoea lj-dzãsi a ljei: “Amãrtiili a tali tsã suntu ljirtati.” 49Atumtsea atselji tsi eara la measã deadun cu Isusul apãrnjirã s-dzãtsea cu mintea a lor: “Cai easti aestu cai ljeartã sh-amãrtiili?” 50Iarã Isusul lj-dzãsi a muljeariljei: “Pistea a ta ti ascãpã. Duti tu pace!”
Currently Selected:
Luca 7: BLRR
Highlight
Copy
Compare
Share
Want to have your highlights saved across all your devices? Sign up or sign in
