Luca 6
6
Isusul Easti Domnul a Sãmbãtãljei
1Unã dzuã, dupã Sãmbãta Isusul ma tritsea prit agrili cu grãnu, sh-ucenitsilji a lui arupea schicuri, li fãrca cu mãnjili sh-li mãca. 2Niscãntsã di Fariseilji lji ntribarã: “Cãtse fãtsets atsea tsi nu easti volje si s-fãcã Sãmbãta?” 3Ma Isusul lã apãndãsi a lor: “Nu avets cãntatã tsi featsi Davidul sh-atselji tsi eara deadun cu nãsu cãndu agiuna? 4Cum intrã tu casa a Dumnidzãlui, elu lo pãnjili a bãgarãljei nãinti, mãcã elu sh-lã deadi ti mãcari sh-atsilor tsi eara deadun cu nãsu. Atseli pãnji nu eara volje ti vãrã s-li mãca, dicãt mash preftsãlji.” 5Apoea lã dzãsi a lor: “Hiljilu a Omlui easti Domnu a Sãmbãtãljei.”
6Una altã Sãmbãtã Isusul intrã tu sinagogã sh-ma nvitsa. Aclo eara un om tsi avea mãna atsea ndreapta uscatã. 7Scriblji sh-Fariseilji ma lu vigljea, macã elu va lu vindica Sãmbãta, tsi deapoea s-lu vãrghea. 8Ma elu li cunushtea minduirili a lor shi lji dzãsi a omlui cu mãna uscatã: “Scoalã-ti shi shedz aoa tu mesi.” Sh-elu si sculã pri cicioari shi stãtu aclo. 9Deapoea Isusul lã dzãsi a lor: “Mini ma vã ntreb: Easti volje tu dzua di Sãmbãtã, s-fatsi ghini icã s-fatsi arãu, s-ascachi un om icã s-lu cheri?” 10Sh-cum lj-mutri tuts di anvãrliga, lj-dzãsi a omlui: “Tindi mãna a ta!” Elu u teasi mãna sh-mãna a lui s-featsi sãnãtoasã. 11Elji s-nevrisirã sh-ahurhirã si zbura un cu-alantu cã tsi putea s-lji fãtsea a Isusului.
Alidzearea a Doisprãdzatsi Apostulji
12Tu atseali dzãli Isusul s-dusi tu munti ti rugari, sh-tricu noaptea cu rugãciuni cãtrã Dumnidzãlu. 13Sh-cãndu alghi dzua, acljimã ningã nãsu ucenitsilji a lui sh-aleapsi di nãshi doisprãdzatsi sh-lji numi apostulji. 14Aeshti eara: Simonul tsi lj-bãgã numa Petru, sh-Andrea, fratili a lui, Iacovul sh-Ioanul, Filipul sh-Bartolomeu, 15Mateu sh-Toma, Iacovul, hiljilu al Alfeu, sh-Simonul, tsi s-acljima Zelotlu, 16Iuda, hiljilu al Iacov, sh-Iuda Iscariotlu, tsi s-featsi prudot.
Ghinicuvintãrili sh-Spigiurãrili
17Apoea, dipunã deadun cu nãshi, dãnãsi pri unã padi, cu multsãmea a ucenitsilor a lui sh-cu unã multsãmi mari di oaminji di tutã Iudea, di Ierusalem sh-di pri ningã amarea a Tirlui sh-a Sidonlui, 18tsi avea vinitã s-lu asculta shi s-vindica di niputerili a lor. Sh-atselji tsi s-munduea di duhurili nicurati s-vindica. 19Tutã multsãmea cãfta s-lu pusputea, cã di la nãsu ishea unã fuchii tsi lji vindica tuts.
20Isusul, sculã ocljilji cãtrã ucenitsilji a lui sh-dzãsi:
“Ghinicuvintats s-hits voi, oarfãnji, cã a voastrã easti amirãriljea a Dumnidzãlui.
21Ghinicuvintats s-hits voi, tsi tora avets foami, cã va s-vã fãnãtits.
Ghinicuvintats s-hits voi, tsi tora plãndzets, cã va s-arãdets.
22Ghinicuvintats s-hits voi, cãndu oaminjlji va vã aurascã, va vã scoatã afoarã sh-va vã ngiurã, va u aspunã numa a voastrã ti arãu, trã itia a Hiljilui a Omlui.
23Hãrsits-vã tu atsea dzuã sh-giucats di harauã, cã ia, arãsplãtirea a voastrã easti mari tu tseruri. Ashãtsi pãrintsãlji a lor fãtsea cu prufitsilji.
24Ma cavai di voi, avutsi, cã tora u avets loatã diznjirdarea a voastrã.
25Cavai di voi, tsi tora hits fãnãtits, cã va avets foami.
Cavai di voi, tsi tora arãdets, cã va vã jilits sh-va plãndzets.
26Cavai di voi, cãndu tuts oaminjlji va greascã ghini trã voi, cã ashã featsirã sh-pãrintsãlji a lor cu prufitsilji arãdioshi.”
Vrearea ti Neamitsilji
27“Ma mini ma vã dzãc a voauã tsi mi ascultats: S-li vrets neamitsilji a voshtri, s-fãtsets ghini atsilor tsi vã aurãscu. 28Ghinicuvintats atselji tsi vã blastimã sh-rugats-vã trã atselji tsi vã facã arãu. 29Macã vãrã ti agudeashti tu unã fatsã, toarnã-lji sh-alanta. Sh-atsilui tsi ts-ljea mantolu, alas-lu s-tsã-ljea sh-tunica. 30Dã-lji a cuitsido tsi caftã di la tini. Macã vãrã ljea tsiva di la tini, nu caftã s-ts-u toarnã. 31Ma, ashã cum vrets s-vã facã a voauã oaminjlji, ashã fãtsets sh-voi cu nãshi. 32Ma, ma s-lji vrets atselji tsi vã vor, tsi meritã va s-avets di aestã? Cã sh-amãrtioshlji lji vor atselji tsi lji vor. 33Sh-macã lã fãtsets ghini atsilor tsi vã facã ghini, tsi meritã va avets di aestã? Idyiul lucru facã sh-amãrtioshlji. 34Sh-macã lã dats mprumut atsilor tsi nãdãits s-vã li toarnã, tsi meritã va avets di aestã? Sh-amãrtioshlji da mprumut a amãrtioshilor, tsi s-ljea nãpoi cãtã deadirã. 35Ma voi vrets-lji neamitsilji a voshtri, fãtsets ghini a lor sh-dats mprumut sh-nu ashtiptats s-vã si toarnã. Atumtsea plãtirea a voastrã va hibã mari, sh-voi va hits hiljilji a Multu Analtului, cã elu easti ghini-voitor cu aharishtslji sh-anapudzlji. 36S-hits njilãoshi, ashã cum Tatãl a vostru easti njilãos.”
Nvitsãtura pri Giudicata Altsilor
37“Nu giudicats sh-nu va hits giudicats. Nu condamnats sh-nu va hits condamnats. Ljirtats sh-va hits ljirtats. 38Dats sh-va vã si da. Unã mizurã bunã, ndisatã, scuturatã, mplinitã va s-vearsã tu poalã. Cu atsea mizurã tsi va misurats va vã s-misurã sh-a voauã.”
39Deapoea elu lã dzãsi unã parabolã: “Un orbu poati s-lji aspun cala a unui altu orbu? Nu va cadã doilji tu groapã? 40Uceniclu nu lji-lu treatsi a nvitsãtorlui a lui, ma cathi ucenic ghini-nvitsatã va hibã ca nvitsãtorlu a lui. 41Cãtse tini vedz paljilu tu ocljilu a fratilui a tãu sh-nu mutreshti grenda tu ocljilu a tãu? 42Icã, cum pots s-lji dzãtsi a fratilui a tãu: ‘Frate, alasã-mi s-tsã scot paljilu tsi ai tu ocljiu a tãu,’ cãndu tini nu mutreshti grenda tu ocljilu a tãu? Ipucrite, scoat prota grenda dit ocljilu a tãu sh-atumtsea va pots s-mutreshti ma ghini si scots paljilu dit ocljiu a fratilui a tãu.”
Un Pom cu Fruti
43“Nu ari pom bun s-facã fruti arali, nitsi pom arãu s-facã fruti buni. 44Cathi pom s-cunoashti di frutlu a lui, cã nu s-adunã hitsi di pri schinji sh-nu s-adunã auã di pri rudz. 45Omlu atsel bunlu u scoati ghineatsa dit ayishtearea atsea buna a inimãljei a lui, sh-omlu atsel arãu scoati arali dit ayishtearea arauã a inimãljei a lui. Cã gura a omlui zburashti di mplinirea a inimãljei.”
Casa pri Cheatrã sh-Casa pri Arinã
46“Cãtse nj-grits: ‘Doamne, Doamne’, sh-nu fãtsets atsea tsi vã dzãc? 47Cathi om tsi yini la mini sh-avdã zboarili a meali sh-li fatsi, mini va vã spun a cui lj-undzeashti. 48Elu lj-undzeashti a unui om tsi, cãndu adrã casa a lui, sãpã multu hãndauã sh-timeljilu l-bãgã pri cheatrã. Vini un nicari, traplu s-plãscãni pri casã, ma ea nu s-cutrimburã, cã casa eara adrat ghini. 49Ma atsel tsi li avdzã sh-nu li featsi, lj-undzeashti a unui om tsi u adrã casa a lui pri loc sh-fãrã timeljiu. Cãndu traplu s-plascãni la casã, ea cãdzu trãoarã sh-aspãrdzearea a ljei eara mari.”
Currently Selected:
Luca 6: BLRR
Highlight
Copy
Compare
Share
Want to have your highlights saved across all your devices? Sign up or sign in
