Luca 5
5
Isusul Acljeami Protslji Ucenitsi
1Cãndu Isusul s-aflã ningã laclu di Ghenezaret, multsãmea ma s-pindzea anvãrliga di nãsu trã avdzãri zborlu a Dumnidzãlui. 2Elu vidzu doauã vãrtsi ligati tu mardzina a laclui, di la cai avea ishitã piscarlji sh-ma aspila plãsili. 3Atumtsea s-alinã tu unã di atseali vãrtsi, tu atsea tsi eara a Simonlui, sh-lji si pãrãcãlsi s-u dipãrteadzã niheamã di meal. Deapoea shidzu tu varcã sh-nvitsa oaminjlji. 4Sh-cãndu ascãpã si zburãscã, lj-dzãsi a Simonlui: “Duti iu easti ma ahãndoasã, sh-arucats plãsili a voastri trã piscuiri.” 5Sh-Simonul lj-apãndisi: “Masture, nã munduim tutã noaptea sh-nu acãtsãm tsiva, ma ti hãtãrea-a zborlui a tãu, va u-aruc plasa.” 6Sh-cum featsirã ashãtsi, acãtsarã ahãntu multã peshti, cãt ma s-arupea plasa. 7Atumtsea featsirã semnu a sotsilor a lor tsi eara tu alantã varcã s-yinea s-lji agiuta. Sh-elji vinirã sh-li umplurã doauli vãrtsi ahãntu multu cãt ma s-fundusea. 8Cãndu Simon Petrul vidzu aestã, lj-cãdzu la dzinuclji a Isusului shi lj-dzãsi: “Doamne, dipãrteadzã-ti di mini, cã escu om amãrtios!” 9Petrul sh-tuts atselji tsi eara cu nãsu, s-ciudisea di cãt multi peshti avea acãtsatã. 10Ashã undzi sh-cu Iacovul sh-cu Ioanul, hiljilji al Zebedeu, tsi eara sotslji al Simon. Atumtsea Isusul lj-dzãsi a Simonlui: “Nu ti-aspari, di tora sh-nclo tini va s-hii piscar di oaminji.” 11Deapoea elji, trãgãnda vãrtsili tu meal, alãsarã itsido shi s-dusirã dupã nãsu.
Isusul Vindicã Leprosul
12Iarã Isusul eara tu un di atseli cãsãbadz, vini un om umplut cu leprã. Cãndu lu vidzu Isusul, elu cãdzu pri dintsi sh-lji si rugã dzãcãnda: “Doamne, ma s-vrei tini, pots s-mi curi.” 13Atumtsea Isusul timsi mãna sh-lu pusputi dzãcãnda: “Ie, voi, curã-ti.” Shi trãoarã lepra lu-alãsã. 14Sh-Isusul lu-dimãndã: “Nu lji spun a vãrui! Ma duti, fãnirusea-ti a-preftului sh-fã un curbani trã curarea a ta, dupã cum ari ursit Moisiul, tsi aestã s-hibã ca mãrtirii trã nãshi.” 15Sh-anamea trã nãsu ma s-arãspãndea totãna sh-ma multu, sh-multsãnji mãri s-aduna trã avdzãri sh-trã vindicari di la nãsu lãngoarili a lor. 16Ma elu s-trãdzea tu locuri ernji shi s-ruga.
Vindicarea sh-Ljirtarea a Paralizatlui
17Unã dzuã, dupã tsi Isusul nvitsa, eara aclo apunats nãscãntsi Farisei sh-nvitsãtori di lege, tsi avea vinitã di tuti hoarili a Galileiljei, a Iudeiljei sh-di Ierusalem. Putearea a Domnului eara cu Isusul, tsi s-vindica lãndzitslji. 18Sh-ia, niscãntsã oaminji ma adutsea pri un pat un om paralizat sh-cãfta s-lu dutsea nãuntru shi s-lu bãga nãintea al Isus. 19Ma, niaflãnda pri iu s-intra nãuntru trã itia a multsãmiljei, s-alinarã pri citia a casãljei shi lu dipunarã di citii cu tut patul namisa di oaminji nãintea al Isus. 20Vidzãnda pistea a lor, elu lji dzãsi a paralizatlui: “Om, amãrtiili a tali tsã suntu ljirtati.” 21Atumtsea scriblji sh-Fariseilji apãrnjirã s-mindueascã: “Cai easti aestu tsi dzãtsi blãsteami? Cai poati s-li ljeartã amãrtiili, dicãt mash un, Dumnidzãlu?” 22Ma Isusul, cunuscãnda minduirili a lor, lo zborlu sh-ntribã: “Tsi minduits tu ininjli a voastri? 23Tsi easti ma lishor s-dzãts: ‘Amãrtiili a voastri suntu ljirtati,’ icã s-dzãts: ‘Scoalã-ti sh-imnã’? 24Ghini-ma, mini voi si shtits cã Hiljilu a Omlui ari autoritati pri loc s-ljeartã amãrtiili.” Ashã elu lj-dzãsi a paralizatlui: “Mini ts-dzãc, scoalã-ti, ljea patlu a tãu sh-duti la casa a ta!” 25Sh-trãoarã atsel om si sculã nãintea a lor, lo patlu iu eara ashtirnat shi s-dusi la casa a lui, alãvdãnda Dumnidzãlu. 26Tuts s-ciudisirã sh-alãvda Dumnidzãlu, shi mplini di fricã, dzãtsea: “Azã vidzum lucri thãvmãsiti.”
Isusul Acljeami Levi sh-Mãcã cu Amãrtioshlji
27Dupã aesti lucri, Isusul ishi sh-vidzu un taxidar, tsi s-acljima Levi, cai shãdea tu loclu a taxilor, sh-lji dzãsi: “Urmeadzã-mi!” 28Levi li alãsã tuti, si sculã sh-lu urmã. 29Deapoea Levi lj-adrã la casa a lui un uspetsi mari sh-unã multsãmi mari di taxidari sh-altsã shidea la measã deadun cu elji. 30Ma Fariseilji sh-scriblji pushpura contra a ucenitsilor al Isus dzãcãnda: “Cãtse mãcats sh-bets deadun cu taxidarlji sh-amãrtioshlji?” 31Sh-Isusul lã apãndisi: “Nu suntu sãnãtoshlji atselji tsi au ananghi di doctor, ma nipututsilji. 32Mini nu vinj s-acljem ndreptsãlji, ma amãrtioshlji trã mitãnjiusiri.”
Isusul lu Ntribarã trã Pãreasinjli
33Atumtsea elji lji dzãsirã: “Cãtse ucenitsilji al Ioan sh-atselji a Fariseilor agiunedzu totãna shi s-roagã, iarã a tãlji mãcã sh-bea?” 34Elu lã apãndisi a lor: “Putets s-li fãtsets numtarlji s-tsãnã pãreasinji, pãnã cãndu dzinirli easti cu nãshi? 35Ma va yinã dzãlili cãndu va lu ljea dzinirli sh-atumtsea, tu atseali dzãli, elji va agiuneadzã.” 36Apoea lã aspusi unã parabolã: “Vãrã nu bagã un peatic di un stranjiu nou la un stranjiu vecljiu, altã soi peaticlu di stranjilu atsel nou va arupã stranjilu atsel vecljiu, sh-peaticlu atsel noulu nu s-uidiseashti la stranjilu atsel vecljiu. 37Sh-vãrã nu bagã yin nou tu folji veclji, altã soi yinlu atsel nou arupi foljilji, yinlu s-vearsi sh-foljilji cher. 38Trã atsea yinlu atsel nou s-bagã tu folji noi. 39Vãrã tsi ari biutã yin vecljiu, nu va yin nou, cã elu dzãtsi: ‘Vecljul easti ma bun.’”
Currently Selected:
Luca 5: BLRR
Highlight
Copy
Compare
Share
Want to have your highlights saved across all your devices? Sign up or sign in
