Ioan 21
21
Isusul sh-Acãtsarea Thãvmãtisitã a Peshtilor
1Dupã aesti, Isusul lã si aspusi a ucenitsilor ningã amarea a Tiberiadãljei, shi undzi ashã, 2Simon Petrul, Toma (acljimat Dzeamin), Natanaelu di Cana tu Galilei, hiljilji al Zebedeu sh-doi altsã di ucenitsilji a lui eara deadun. 3Simon Petrul lã-dzãsi a lor: “Ma mi duc s-piscuiescu.” Elji lji dzãsirã: “Ma yinim sh-noi cu tini.” Ishirã shi s-alinarã trãoarã tu varcã, ma atsea noapti nu acãtsarã tsiva. 4Cãndu eara dimineatsa, Isusul stãtu tu meal, ma ucenitsilji nu l-cunuscurã cã eara elu. 5Atumtsea Isusul lã dzãsi: “Ficiori, nacã avets acãtsat tsiva ti mãcari?” Elji apãndisirã: “Nu!” 6Elu lã dzãsi a lor: “Arucats plasa tu parta atsea ndreapta a varcãljei sh-va aflats.” Elji arcarã plasa sh-nu putea s-u astrãdzea di multsã peshti. 7Atumtsea uceniclu tsi Isusul lu vrea lji dzãsi a Petrului: “Easti Domnul!” Simon Petrul, cãndu avdzã cã eara Domnul, nviscu stranjili cã eara dizviscut shi s-arcã tu apã. 8Iarã alantsã ucenitsi vinirã cu varcã, cã nu eara diparti di meal, aproapi doausuti di cots, trãgãnda plasa cu multsã peshti. 9Cãndu ishirã tu meal, vidzurã un foc cu jãr sh-pri nãsu eara bãgat peshti sh-pãni. 10Isusul lã dzãsi a lor: “Adutsets di peshtilji tsi acãtsat tora!” 11Simon Petrul s-alinã tu varcã shi scoasi plasa tu meal mplinã cu peshti mãri, unã sutã tsindzãtsi shi trei. Sh-cu tutã cã eara ahãntsã multsã, plasa nu s-arupsi. 12Isusul lã dzãsi a lor: “Yinits s-mãcats!” Sh-vãrã di ucenitsilji nu cutidza s-lu ntriba: “Cai eshti tini?”, shtinda cã eara Domnul. 13Atumtsea Isusul vini, lo pãnea shi lã-u deadi a lor, tutashãtsi sh-pescul. 14Aestã eara a treia oarã tsi Isusul s-aspusi a ucenitsilor a lui, dupã tsi s-nyie dit mortsã.
Isusul Anãltsã Petrul
15Dupã tsi mãcarã, Isusul lji dzãsi al Simon Petru: “Simone, hiljilu al Ioan, mi vrei tini ma multu dicãt aeshti?” Elu lj-dzãsi: “Ie, Doamne, tini shtii cã mini ti voi.” Lji dzãsi napoi: “Pashti-li njeljilji a melji!” 16Isusul ntribã di a doaua oarã: “Simone, hiljilu al Ioan, mi vrei tini?” Elu lj-dzãsi, “Ie, tini shtii cã ti voi.” Isusul lji dzãsi: “Veaglji-li oili a meali!” 17Lu ntribã di a treia oarã, “Simone, hiljilu al Ioan, mi vrei tini?” Petrul si nvirinã cã lu ntribã di a treia oarã, “Mi vrei tini?”, shi lji dzãsi, “Doamne, tini li shtii tuti. Tini shtii cã mini ti voi.” Isusul lji dzãsi: “Pashti-li oili a meali! 18Dealihea ma tsã dzãc, cãndu tini earai ma tinir, strindzeai curaua sh-imnai iu vreai, ma cãndu va s-ausheshti, va li tindzã mãnjili sh-vãrã altu va s-tsã stringã curaua sh-va ti ducã aclo iu tini nu va vreai.” 19Aesti li dzãsi, tra sã spunea cu tsi moarti Petrul va s-multumãreascã Dumnidzãlui. Sh-dupã tsi dzãsi aesti, lji dzãsi: “Urmeadzã-mi!” 20Petrul s-turnã sh-vidzu cã yinea dupã nãsu uceniclu, tsi Isusul lu vrea. (Atsel tsi la tsinã eara ndupiratã pri cheptul al Isus shi avea dzãsã, “Doamne, cai easti atsel tsi va ti vindã?”) 21Cãndu Petrul lu vidzu, lji dzãsi al Isus: “Doamne, ma cu aestu tsi va s-fac?” 22Isusul lji dzãsi: “Macã voi tsi elu s-armãnã yiu pãnã cãndu s-yin mini, tsi ti lipseashti tini? Tini urmeadzã-mi!” 23Atumtsea ishi zborlu namisa di fratslji cã uceniclu-atsel nu va s-moarã, ma Isusul nu lji dzãsi cã nu va s-moarã, ma: “Macã voi tsi aestu s-armãnã yiu pãnã cãndu s-yinã mini, tsi ti lipseashti tini?” 24Aestu easti uceniclu tsi mãrtirseashti trã aesti lucri sh-tsi ari scriatã aesti lucri, sh-noi shtim cã mãrtiria a lui easti alihioasã.
25Suntu sh-multi alti lucri tsi featsi Isusul, tsi ma si scria unã dupã unã, minduescu cã lumea nu va li ncãpa cãrtsili tsi va sã scria.
Currently Selected:
Ioan 21: BLRR
Highlight
Copy
Compare
Share
Want to have your highlights saved across all your devices? Sign up or sign in
