Iacov 4
4
Oaspi cu Lumea
1Di iu yin alumtili shi ncãcearili la voi? Nu yin dit orixili tsi alumtã nãuntru tu mãdularili a voastri? 2Voi vrets sh-nu avets, voi vãtãmats sh-avets zilii sh-nu amintats tsiva. Voi vã ncãceats sh-alumtats, ma nu avets, cã nu cãftats di la Dumnidzãlu. 3Voi cãftats sh-nu loats, cã cãftats cu nãeti arãu tra s-li ufilisits ti chehili a voastri. 4Cãlcãtori a curuniljei, nu shtits cã uspitsãljea cu lumea easti tu dushmãnlichi cu Dumnidzãlu? Atsel tsi va hibã oaspi cu lumea easti dushman a Dumnidzãlui. 5Voi minduits cã Scritura greashti digeaba: “Duhlu tsi Dumnidzãlu l-bãgã tu noi, si zilipseashti ti noi.” 6Ma elu da har sh-ma multu, trã atsea s-dzãtsi:
“Dumnidzãlu li ncuntreadzã mintimãrlji,
sh-lã da har a aplicatsilji.”#4:6 Prov 3:34
7Sumbãgats-vã a Dumnidzãlui, ncuntrats-vã a draclui sh-elu va s-dipãrteadzã di voi. 8Aprucheats-vã di Dumnidzãlu sh-elu va s-aproachi di voi. Curats mãnjili a voastri voi amãrtioshi, shi sãmtsãsits ininjli, oaminji cu doauã minti! 9Nvirinats-vã, jilits sh-plãndzets. Arãslu a vostru s-toarnã tu jali, sh-hãrsirea tu nvirinari. 10Aplicats-vã nãintea a Domnului, sh-elu va s-vã analtsã. 11Frats sh-surãri a melji, nu zburãts arãu ti un-alantu. Atsel tsi greashti arãu ti fratili icã ti sora a lui, greashti contra a legiljei sh-lu giudicã legea. Sh-ma s-giuditsi legea, tini nu eshti fãcãtor a legiljei, ma un giudicãtor. 12Singur un easti Dãtãtor sh-Giudicãtor, atsel tsi poati s-ti ascapã icã s-ti chearã. Ma tini cai eshti tsi giuditsi aproapilu a tãu?
Alãvdarea ti Mãni
13Tora ascultats, voi tsi dzãtsets: “Azã icã mãni noi va nidzem tu aestu icã tu alantu cãsãbã, va armãnem un an aclo, va fãtsem pãzari sh-va amintãm pãradzi.” 14Voi nu shtits cã tsi va hibã dzua di mãni. Tsi easti bana a voastrã? Atsea easti ca un abur tsi s-veadi di putsãn chiro sh-deapoea cheari. 15Voi prindi s-dzãtsets: “Ma s-va Domnul, atumtsea va bãnãm sh-va fãtsem aestã icã alanta.” 16Voi vã alãvdats cu fuduleatsa a voastrã. Cathi ahtar alãvdari easti arauã. 17Atsel tsi shti s-fac ghineatsã sh-nu u fatsi, elu amãrtiseashti.
Currently Selected:
Iacov 4: BLRR
Highlight
Copy
Compare
Share
Want to have your highlights saved across all your devices? Sign up or sign in
