Uvreilji 5
5
1Cã cathi arhipreftu cai s-ljea di la oaminjlji, s-arãdãpseashti trã oaminjlji la atseali lucri cai au s-facã cu Dumnidzãlu, trã adutseari doari sh-curbãnsiri trã amãrtiili. 2Elu easti ti cãdãri s-aspunã njilã trã atselji cai suntu nishtiuts sh-arãshi cã sh-elu idyiul si sumbãgã a slãbintsãljei, 3sh-trã aestã slãbintsã elu easti strimtu s-aducã curbãnji trã amãrtiili, cum trã populu, ashãtsi sh-trã nãsu idyiul. 4Sh-vãrã nu u ljea singur aestã tinjii, ma u ljea cãndu easti acljimat di la Dumnidzãlu, ashã di cum sh-Aaron.
5Ashã sh-Hristolu nu s-multumãri singur tra si s-facã arhipreftu, ma fu Elu cai lji dzãsi:
“Tini eshti Hiljiu a meu!
Mini azã ti am amintat.”#Ps 2:7.
6Ashã dzãtsi sh-tu un altu loc:
“Tini eshti preftu di daima
dupã arada al Melchisedec.”#Ps 110:4.
7Tu chirolu a banãljei a lui umineascã, adusi cu aurlari vãrtoasi sh-cu lãcrinji, cum rugãciunji sh-cum giurãri cãtrã atsel cai poati s-lu ascãpa di moartea shi s-ascultã trã itia a fricãljei cãtrã Dumnidzãlu, 8cu tutã cã eara hiljiu, nvitsã ascultarea di atseali tsi trapsi. 9Dupã tsi s-featsi perfectu, s-featsi itii trã ascãpari di daima trã tuts atselji cai lu asculta, 10sh-numit di la Dumnidzãlu arhipreftu dupã arada al Melchisedec.
Prispuneari tra s-nu Alasã Pistea
11Ti aesti lucri avem multi ti dzãtseari sh-suntu greali ti sitãxiri cu zboari, metsi hits faptã aĝalnitsi ti aduchiri. 12Cã tora voi cu chirolu prindi s-earats nvitsãtori, cu tutã atsea aveats ananghi ninga s-vã nveats tsiniva nvitsãturili di prota dzãsi di la Dumnidzãlu shi hits tu atsea situati s-avets ananghi ti lapti, nu ti hranã vãrtoasã. 13Cã caitsido cai bãneadzã cu lapti, nu l-achicãseashti cum prindi zborlu a ndriptatiljei cã easti cilimean. 14Iarã hranea atsea vãrtoasa easti trã mãrlji, trã atselji cai au simtsurili nvitsati trã aduchiri bunili sh-arãli.
Currently Selected:
Uvreilji 5: BLRR
Highlight
Copy
Compare
Share
Want to have your highlights saved across all your devices? Sign up or sign in
