2 Corintenji 1
1
1Pavlu, apostul al Hristolu Isus prit vrearea al Dumnidzãu, sh-Timoteu, fratili a nostru, ma lji scriem a bisearicãljei al Dumnidzãu tu Corintu, deadun cu tuts oaminjlji a lui sãmtsã tu tutã Ahaia:
2Har pri voi sh-pace a voauã di la Dumnidzãlu, Tatãl a nostru, sh-di la Domnul Isus Hristos.
Dumnidzãlu a Diznjirdariljei
3Ghinicuvintat s-hibã Dumnidzãlu sh-Tatãl a Domnului a nostru Isus Hristos, Tatãl a njiluirilor sh-Dumnidzãlu trã cathi diznjirdari, 4atsel cai nã diznjeardã tu tuti munduirili a noastri tsi noi s-putem s-diznjirdãm atselji cai suntu tu itsi munduiri, prit diznjirdarea cu cai noi nã diznjirdãm di la Dumnidzãlu. 5Cã ashã cum artirsescu munduirili al Hristos trã noi, ashãtsi artirseashti sh-diznjirdarea a noastrã prit Hristolu. 6Macã nã munduim, aestã easti ti diznjirdarea sh-ascãparea a voastrã. Macã nã diznjirdãm, aestã easti ti diznjirdarea a voastrã tsi lucreadzã tu arãvdarea a voastrã, tu idyili munduiri tsi sh-noi li trãdzem. 7Sh-nãdia a noastrã trã voi easti niminatã, cã shtim cã ashãtsi dupã cum hits pãrtashi tu munduiri, ashãtsi hits pãrtashi sh-tu diznjirdari.
8Cã noi nu vrem, frats sh-surãri, tsi voi s-hits nishtiuts trã munduirea a noastrã tsi pãtsãm tu Asii. Aclo noi earam ngãrcats multã, ma multã di atsea tsi puteam, ahãntu cãt nã nvirinãm trã bana a noastrã. 9Noi idyilji avum tu noi apofãsirea a moartiljei, cu nãeti tra s-nu pistipseam tu noi, ma tu Dumnidzãlu cai nyeadzã mortsãlji. 10Elu nã ascãpã sh-va nã ascapã di un piricljiu multu mari a moartiljei sh-trã aestã noi nãdãim cã va nã ascapã dinou, 11cu agiutarea prit rugãciunjili a voastri trã noi, cu nãeti tra s-aibã hãristisiri ti noi di multsã oaminji trã doara a harului aspus cãtrã noi prit rugãciunjili a multor oaminji.
Pavlu Alãxeashti Planlu
12Alãvdarea a noastrã easti aestã: Conshtintsa a noastrã mãrtirseashti cã noi him aspus tu lumi, ma ma multu cãtrã voi, cu sãmtsãsiri sh-cu curãtsiljea a inimãljei tsi yini di la Dumnidzãlu sh-nu tu mintimenilji trupeascã, ma tu harul a Dumnidzãlui. 13Cã noi nu vã scriem altu tsiva dicãt atseali tsi cãntats sh-aduchits sh-mini nãdãescu cã va li aduchits pãnã tu soni, 14ashã dupã cum nã avets aduchitã pãnã tu un loc, cã noi him alãvdarea a voastrã, dupã cum sh-voi hits alãvdarea a noastrã tu dzua a Domnului Isus.
15Cu aestã ghini-achicãsiri vream s-yineam ma nãinti la voi, tra s-aveat un altu har. 16Prit voi vream s-tritseam tu Machidunii sh-dinou di Machidunii s-yineam la voi sh-di la voi s-earam pitricut tu Iudea. 17Vrãnda aestã, nacã minduii ca minti-lishor? Icã trã atseali tsi apofãsescu, apofãsescu ca lumea, tra s-hibã la mini tu idyiul chiro “Ie, ie” shi “Nu, nu”?
18Ma ashã cum Dumnidzãlu easti pistimen, zborlu a nostru nu easti “Ie” shi “Nu.” 19Cã Hiljiu a Dumnidzãlui, Isus Hristos, cai s-predicã ntrã voi prit noi – prit mini, Silvanlu sh-Timoteul, nu eara “Ie” shi “Nu”, ma easti faptã “Ie” tu nãsu. 20Cã tuti tãxirili a Dumnidzãlui suntu “Ie” tu Hristolu, trã atsea, prit elu easti “Amin” trã mãrirea a Dumnidzãlui prit noi. 21Sh-easti Dumnidzãlu atsel cai nã nvãrtuseashti deadun cu voi tu Hristolu sh-cai nã aumsi, 22cai nã vulusi sh-nã deadi Duhlu ca cãpari tu ininjli a noastri.
23Mini acljem Dumnidzãlu ca martir a meu, elu u cunoashti inima a mea, cã nu vinj tu Corintu tra s-nu vã vãrghescu. 24Noi nu vrem s-vã spunem cã avem domnilji pri pistea a voastrã, ma him colucrãtori ti haraua a voastrã, cã voi ma stats niminats tu pistea a voastrã.
Currently Selected:
2 Corintenji 1: BLRR
Highlight
Copy
Compare
Share
Want to have your highlights saved across all your devices? Sign up or sign in
