2 Corintenji 2
2
1Mini aveam apofãsit s-nu yineam nãpoi la voi tra s-nu vã nvirinam. 2Cã macã mini vã nvirinedz, cai ari armas tsi s-mi hãrseascã, dicãt atselji tsi mini lji am nvirinat? 3Mini lu scriai atsea, tsi cãndu mini s-yin la voi s-nu am nvirinari di atselji tsi prindi s-mi fac mini s-hãrsescu. Cã mini escu cãndãrsit di voi tuts cã haraua a mea va s-hibã a voastrã. 4Mini vã am scriat a voauã cu mari cãshtigã sh-mirachi tu inimã sh-cu multi lãcrinji, s-nu vã nvirinedz voi, ma s-vã dau s-cunushtets vrearea a mea ti voi.
5Macã vãrã mi nvirinã, elu nu mi ari nvirinat singur mini, ma elu pãnã tu un loc vã ari nvirinat sh-voi tuts. 6Condamnarea tsi lj-easti datã a lui di la multsãlji agiundzi. 7Tora, cu tut atsea, voi prindi s-lu ljirtats shi s-lu diznjirdats atsel, tra s-nu hibã putut di multã nvirinari. 8Ashãtsi, vã urnipsescu s-lji spunets vrearea a voastrã. 9Cã trã aestã vã scriai, tra s-cunoscu prova a haractirlui a vostru, nacã hits cãndãrsits trã tuti. 10A cuitsido tsi lji ljirtats tsiva, sh-mini lji ljiertu, cã sh-mini itsido tsi am ljirtat, macã am ljirtat tsiva am ljirtat nãintea a Hristolui trã voi, 11tra s-nu nã ufiliseascã Satanlu, cã nu him nishtiuts trã planurili a lui.
Huzmichearilji a Pisti-ligãturiljei Atsiljei Noauã
12Cãndu agiumsh tu Troas tra s-dimãndam evanghelul al Hristos sh-iarã Domnul nj-discljisi unã ushã, 13nu avui acumtinari tu duhlu a meu, cã nu aflai Titul, fratili a meu. Ashã cum mi dispãrtsai di elji, mi nchisii cãtrã Machidunii.
14Ma hãristisit s-hibã Dumnidzãlu, atsel cai totãna nã cãlãuzeashti s-nichisim tu Hristolu sh-aspuni prit noi njiurizma a cunushteariljei a lui tu iutsido. 15Cã noi him trã Dumnidzãlu njiurizma atsea buna a Hristolui ntrã atselji tsi ascapã sh-ntrã atselji tsi cher. 16Trã aeshti, njiurizma di moarti tsi dutsi tu moarti. Trã atselji njiurizma di banã tsi dutsi tu banã. Sh-cai easti axiu trã aesti? 17Cã noi nu him ca multsã altsã tsi vor s-facã pãzari cu zborlu al Dumnidzãu, ma zburãm cu chischineatsã nãintea a Dumnidzãlui ca huzmichearilji a Hristolui.
Currently Selected:
2 Corintenji 2: BLRR
Highlight
Copy
Compare
Share
Want to have your highlights saved across all your devices? Sign up or sign in
