1 Timoteu 3
3
1Aestu zbor easti pistipsit: Macã vãrã va si s-facã episcop, lucru bun va. 2Lipseashti tsi episcoplu s-hibã fãrã cusuri, bãrbat a unei singur muljeari, mintimen, misurat, rispectat, oaspitor, cãdãr s-nveatsã sh-altsã, 3s-nu hibã datã dupã yinlu, s-nu hibã violent, ma s-hibã arãvdãtor, s-nu hibã gindãvos, s-nu hibã tãmãchear a pãradzilor. 4Elu prindi s-hibã om tsi u nicuchireashti ghini casa a lui sh-prindi s-aibã cilimenjlji ursits sh-cu multu rispect. 5Cã macã vãrã nu shtii s-nicuchireascã casa a lui, cum va s-aibã cãshtigã ti bisearica a Dumnidzãlui? 6Episcoplu s-nu hibã macãt-turnat tu pisti, tra s-nu lji creascã mintea shi s-cadã tu pozita a cãtãdzicãsiriljei a draclui. 7Elu prindi s-aibã mãrtirii bunã di la atselji di nafoarã, tsi s-nu cadã tu arushinari shi s-nu s-acatsã tu laclu a draclui.
8Tutashã diaconjlji prindi s-hibã cu tinjii, nu cu doauã fãts, s-nu si s-da dupã multu yin, s-nu hibã tãmãchear di amintatic ni-ndreptu. 9Elji prindi s-tsãnã cu conshtintsã curatã mistiryiul a pistiljei. 10Aeshti si s-bãgã ma nãinti tu provã, deapoea s-facã huzmitipsirea a lor macã suntu fãrã cusuri. 11Muljerili a lor s-hibã tinjisiti, nu munafitsi, ma misurati sh-pistimenji tu itsido. 12Diaconjlji s-hibã bãrbatslji a unei singur muljeari, s-lã nicuchireascã ghini cilimenjlji sh-alants oaminji ali fumealji. 13Cã atselji tsi au faptã ghini diaconia, amintã numã bunã shi mari sigurantsã tu pistea al Isus Hristos.
14Ma ts-li scriu aesti lucri cã am nãdii cã va yinã trãoarã la tini, 15ma, ma mi amãnai, sã shtii cã cum oaminjlji prindi si s-poartã tu casa al Dumnidzãu, cã voi crishtinjlji hits bisearica a Dumnidzãlui atsilui yiulu, coloana shi timeljiu a alihiljei. 16Shi fãrã shubei cã mistiryiul a pistiljei easti mari:
Hristolu s-fãnirusi tu trup,
s-ndriptã tu Duh,
s-aspusi la anghilji,
s-ghinihãbãrsi la pãngãnjlji,
s-pistipsi tu lumi,
s-anãltsã tu mãriri.
Currently Selected:
1 Timoteu 3: BLRR
Highlight
Copy
Compare
Share
Want to have your highlights saved across all your devices? Sign up or sign in
