1 Petru 2
2
1Trã atsea, arucats nclo itsi arãutati, itsi arãdeari, itsi ipucrizii, itsi zilii sh-itsi cacuzburãri. 2Ca ficiuritslji di macãt-amintats, s-vrets laptili atsel curatu sh-suflitescu, tra s-vã crishtets tu ascãparea a voastrã, 3macã dealihea avets gustat, cã Domnul easti bun.#Ps 34:8.
Cheatra Atsea Yii sh-Populu Atsel Aleptu
4Aprucheats-vã la nãsu, tsi easti cheatrã yii, arnisitã di oaminjlji, ma aleaptã sh-custusit nãintea a Dumnidzãlui. 5Sh-voi, ca chetsri yii, vã-adrats ca unã casã sufliteascã, s-hits priftsami sãmtã, tsi s-lã aprucheats curbãnji sufliteascã, arsitã a Dumnidzãlui prit Isus Hristos. 6Cã s-dzãtsi tu Scriturã:
“Ia, ma bagã tu Sion unã cheatrã di chiushei,
aleaptã shi scumpã, sh-atsel tsi pistipseashti la nãsu,
nu va s-arushineadzã dip.”#Isa 28:16.
7Trã voi tsi pistipsits, atsea easti scumpã, ma trã atselji tsi nu pistipsescu:
“Cheatra arnisitã di masturlji,
atsea s-featsi cheatra a chioshlui.”#Ps 118:22.
8Shi:
“Cheatrã di nchidicari,
sh-cheatrã di cãdeari.”#Isa 8:14-15.
Elji s-ncheadicã cã nu ascultã la zborlu, sh-trã aestã elji eara arãdãpsitsã.
9Ma voi hits popul aleptu, priftsami amirãreascã, farã sãmtã, popul a lui aleptu di la Dumnidzãlu, tsi s-dimãndats mãrirea atsilui, tsi vã acljimã di ntunearic tu lunjina a lui atsea thãvmãtusita. 10Voi tsi vãrãoarã nu earat popul, iarã tora hits populu al Dumnidzãu, vãrãoarã earat ninjiluits, ma tora njiluits.#Hos 2:23.
S-Bãnedz unã Banã Dumnidzãsitã tu unã Dunjauã Pãngãnã
11Multu-vruts, vã fac rigeai, ca xenji sh-ca cãlãtori, s-vã afirits di orixili atseali trupeshti, tsi alumtã contra a suflitlui. 12Spunets-vã bunji namisa di pãngãnjlji, tsi sh-macã elji zburãscu arãu trã voi, s-veadã faptili a voastri atseali buni shi s-multumãreascã Dumnidzãlu tu atsea dzuã tsi va yinã. 13Sumbãgats-vã trã hãtãrea a Domnului la itsi puteari umineascã: ashã di cum a amirãlui ca ma analtu autoritati, 14ashãtsi sh-a-guvernatorilor, ca pitricuts di la amirãlu trã cãtãdzicãsiri arãlji sh-trã alãvdari atselji tsi fac ghini. 15Cã aestã easti vrearea a Dumnidzãlui, tsi voi fãcãnda ghini si ncljidets gura a nishtiriljei a oaminjlor fãrã minti. 16Bãnats ca oaminji liberi, ma nu ufilisits libertatea ca nvãliturã di anvãliri arãutatea, ma ca sclayi al Dumnidzãu. 17Tinjisits-lã tuts, s-vrets frãtsiljea, s-avets frica a Dumnidzãlui, tinjisits amirãlu!
18Voi sclayi, sumbãgats-vã a domnjilor a voshtri cu fricã, nu mash a bunjilor sh-a moljilor, ma sh-a capriciosilor. 19Easti trã alãvdari, macã vãrã aravdã durearili di munduirili nindriptati cu conshtintsã trã Dumnidzãlu. 20Tsi alãvdari va hibã ma s-arãvdats bãterili dupã tsi avets amãrtisitã? Ma, ma s-arãvdats munduirili ti ghinili tsi fãtsets, aestã lj-arseashti a Dumnidzãlui. 21Cã trã aestã hits acljimats, cã sh-Hristolu trapsi trã voi, alãsãnda a voauã un exemplu, tsi voi s-imnats dupã urmili a lui. 22Elu nu featsi vãrã amãrtii, sh-nu s-aflã nitsiun arãdeari tu gura a lui.#Isa 53:9. 23Cãndu lu pizuirã, nu apãndisea. Cãndu s-munduia, nu cãnusea, ma lji si pridãdea Atsilui tsi giudicã cu ndriptati.#Isa 53:7. 24Elu li purtã amãrtiili a noastri tu truplu a lui pri lemnul a crutsiljei, tsi noi mortsã trã amãrtii s-bãnãm cu ndriptati, “sh-prit pledzili a lui voi vã vindicat.”#Isa 53:5. 25Cã “voi earat ca oi tsi au chirut calea,” ma tora voi vã turnat la Picurarlu sh-la Vigljitorlu a suflitlor a voastri.#Isa 53:6.
Currently Selected:
1 Petru 2: BLRR
Highlight
Copy
Compare
Share
Want to have your highlights saved across all your devices? Sign up or sign in
