1 Petru 1
1
1Petru, apostul al Isus Hristos, atsilor tsi hits aleptsã sh-xenji tu diasporã tu Pontu, tu Galatia, tu Capadochia, tu Asia sh-tu Bitinia, 2dupã pricunushtearea a Dumnidzãlui, Tatãlui, prit sãmtsãrea di la Duhlu, s-hibã ascultãtori al Isus Hristos sh-pruscutits cu sãndzili a lui:
Harul sh-pacea s-vã si adavgã!
Alãvdarea a Dumnidzãlui di Nãdia atsea yii
3Ghinicuvintat s-hibã Dumnidzãlu, Tatãl a Domnului a nostru Isus Hristos, tsi, dupã marea njila a lui nã amintã dinou la unã nãdii yii prit nyearea al Isus Hristos dit mortsã, 4cãtrã mushtinirea niaspartã, nipãngãnitã sh-nimãrãnghisitã, tsi easti vigljeatã tu tseruri ti noi. 5Voi hits vigljeats cu putearea a Dumnidzãlui prit pisti trã ascãparea tsi easti etimã trã dizvãliri tu chirolu di soni. 6Trã aestã hãrsits-vã, cu tutã cã tora, prindi s-hits nvirinats di putsãn chiro cu soi di soi di cãrteari. 7Ashãtsi prova a pistiljei a voastrã, tsi easti ma scumpu di furia tsi s-aspardzi, sh-macã easti provat prit foc, s-hibã trã alãvdari, mãriri sh-tinjii cãndu Isus Hristos va s-aspunã. 8Cu tutã cã voi nu lu avets vidzutã, lu vrets. Voi nu lu videts tora atsel, ma-pistipsits la nãsu. Trã atsea voi vã hãrsits cu harauã nispusã sh-mãritã, 9amintãnda nãetea a pistiljei a voastrã, ascãparea a suflitlor a voshtri. 10Trã aestã ascãpari, cãftarã sh-ntribarã prufitsilji, tsi prufitipsirã trã harul tsi va s-yinea trã voi, 11shi sitixirã s-afla chirolu sh-cunditsili tsi Duhlu a Hristolui eara tu nãshi lã spunea cãndu elu mãrtirsea di ma nãinti ti munduirili a Hristolui sh-ti mãririli tsi va yinea. 12A prufitsilor lã si aspusi cã elji huzmitipsea nu ti nãshi, ma ti voi. Cãndu elji zbura ti lucrili tsi tora ma si aspunã a voauã di la elji tsi au predicat evanghelu prit Duhlu Sãmtu pitricut dit tser, trã aestã, sh-anghilji vor multu s-mutrescu atseli lucri.
S-hii Sãmtu
13Trã atsea, etimãsits-vã, s-hits limpidz shi nãdãits didip tu harul tsi va s-vã si da tu aspunearea al Isus Hristos. 14Ca hilji cãndãrsits, nu vã dutsets dupã vrearili atseli uruti di ma nãinti cãndu earat tu nishtirea a voastrã. 15Ashãtsi cum easti sãmtu atsel tsi vã acljimã, s-hits sh-voi sãmtsã tu purtarea a voastrã. 16Cã easti scriat: “S-hits sãmtsã, cã mini escu sãmtu.”#Lev 19:2. 17Macã lu acljimats Tatã atsel tsi fãrã hãtãri giudicã dupã faptili a cathiunui, atumtsea tritsets ca xenji chirolu a vostru pri loc cu fricã. 18Voi shtits, cã nu vã arãscumpãrat prit lucrili tsi s-aspargu ca asimea sh-furia, di bana atsea digeaba tsi mushtinatã di la ntãnjilji, 19ma cu sãndzili atsel scumpul al Hristos, ca Njelu fãrã cusuri sh-fãrã lãvushiturã. 20Elu eara aleapt ma nãinti di adrarea a lumiljei, ma aspus tu chirolu di soni trã voi. 21Prit nãsu s-pistipsits la Dumnidzãlu, tsi lu nyie dit mortsã sh-lu multumãri tsi pistea sh-nãdia a voastrã s-hibã la Dumnidzãlu. 22Tora voi avets curat suflitli a voastri prit cãndãrsirea a alihiljei, tsi s-avets vreari frãtseascã fãrã ipucrizii, s-vã vrets multu cu un-alantu sh-cu inima curatã. 23Voi hits amintat nu di unã simintsã tsi s-aspardzi, ma di unã simintsã tsi nu s-aspardzi, prit zborlu atsel yiulu al Dumnidzãu tsi armãni di totãna. 24Cã:
“Cathi om easti ca iarba,
sh-cathi mãriri a omlui easti ca lilicea a iarbãljei.
Iarba s-usucã sh-lilicea cadi,
25ma zborlu a Domnului armãni di totãna.”#Isa 40:6-8.
Aestu easti zborlu, tsi easti ghini-hãbãrsitã a voauã.
Currently Selected:
1 Petru 1: BLRR
Highlight
Copy
Compare
Share
Want to have your highlights saved across all your devices? Sign up or sign in
