رومیوں 4

شریعت تے اِیمان دے بارے ءچ ابرہام دی مثال

1اساں ابرہام دے بارے ءچ جیہڑا جِسمانی لحاظ نال ساڈا پِیُو ہے، کیا آکھوں؟ اِیندے بارے ءچ اُونکُوں کیا پتہ لگا؟ 2جے او آپنڑے اعمال دی وجہ کنُوں راستباز کھڑدا تاں اُونکُوں فخر کرݨ دا حق ہوندا پر خُدا دے حضُور ءچ نئیں۔ 3کیوں جو خُدا دا کلام آدھے جو ”ابرہام خُدا اُتے اِیمان گِھن آیا تے ایہ اُوندے کیتے راستبازی شمار کیتا گِیا#پیدائش 15‏:6۔۔“ 4کم کرݨ آلے دی مزدُوری کوئی تحفہ نئیں بلکہ اُوندا حق سمجھی ویندی ہے۔ 5پر جیہڑا بندہ کم نئیں کریندا بلکہ بدکاراں کُوں راستباز بنڑاوݨ آلے خُدا اُتے اِیمان رکھیندے، اُوندا اِیمان#4‏:5 یعنی نجات اُنہاں کُوں مِلدی ہے جیہڑے خود گُنہگار ہووݨ دا اِقرار کریندے ہِن تے آپنڑے مذہبی کماں اُتے نئیں بلکہ خُدا دی رحمت اُتے بھروسا رکھیندے ہِن۔ اُوندے کیتے راستبازی شمار کیتا ویندے۔ 6بس جئیں بندے کُوں خُدا اُوندے اعمال دے بغیر راستباز آدھے، داؤد وی اُوں بندے کُوں اِینویں مُبارک اکھیندے، 7جو

”مُبارک او ہِن جِنہاں دیاں بدکاریاں بخش ڈِتیاں گئیاں،

تے جِنہاں دے گُناہاں اُتے پڑدہ پاتا گِیا۔

8مُبارک ہے او بندہ جیندے گُناہاں دا رب حساب نہ کریسی#زبُور 32‏:1‏،2۔ ۔“

9بس کیا ایہ مُبارک بادی صرف ختنہ تھئے ہوئیاں کیتے ای ہے یا ختنہ نہ تھئے ہوئیاں کیتے وی ہے؟ کیوں جو اساں آدھے ہیں جو ابرہام دا اِیمان اُوندے کیتے راستبازی شمار کیتا گِیا۔ 10پر او کیہڑی حالت ءچ راستباز شمار کیتا گِیا؟ ختنہ کراوݨ تُوں بعد ءچ یا پہلے؟ ایہ اُوندے ختنہ کراوݨ تُوں پہلے دی گالھ ہئی نہ جو بعد دی۔ 11تے اُونکُوں ختنہ دا نشان اُوں راستبازی اُتے مُہر دے طور تے مِلیا، جیہڑی اُونکُوں ختنہ کراوݨ تُوں پہلے اِیمان رکھنڑ دے سببّوں مِلی۔ اِینویں او اُنہاں ساریاں دا پِیُو ہے جیہڑے اِیمان گِھن آندے ہِن تے بھانویں اُنہاں دا ختنہ نئیں تھیّا، راستبازاں ءچ شمار کیتے ویندے ہِن۔ 12تے او اُنہاں ختنہ کراوݨ آلیاں دا وی پِیُو ہے جِنہاں نہ صرف ختنہ کروایا بلکہ ساڈے پِیُو ابرہام دے اُوں اِیمان دی وی پیروی کریندے ہِن جیہڑا اُونکُوں ختنہ کراوݨ تُوں پہلے حاصل ہا۔

خُدا دا وعدہ اِیمان دے وسیلے نال مؤثر تھیندے

13کیوں جو خُدا ابرہام تے اُوندی نسل نال وعدہ کیتا ہا جو او دُنیا دے وارث ہوسن، پر ایہ وعدہ شریعت دے سببّوں نہ کیتا گِیا ہا بلکہ اُوں راستبازی دے سببّوں جیہڑی اِیمان دے وسیلے نال مِلدی ہے۔ 14کیوں جو جے صرف شریعت آلے ای دُنیا دے وارث ہووݨ تاں اِیمان بے فائدہ ہوندا تے خُدا دا وعدہ وی بے مقصد ہوندا۔ 15کیوں جو شریعت غضب گِھن آندی ہے تے جِتھاں شریعت نئیں اُتھاں حُکم عدُولی وی نئیں#4‏:15 یعنی شریعت ساکُوں خُدا دی مرضی ڈسیندی ہے تے اُوندے اُتے عمل نہ کرݨ نال اساں خُدا دے غضب دے لائق تھیندے ہیں۔۔

16اِیں واسطے ایہ وعدہ اِیمان دے سببّوں مِلدے تاں جو فضل دے طور تے ہووے تے ابرہام دی یکی نسل کیتے ہووے، صرف اُنہاں کیتے نئیں جیہڑے شریعت دے مننڑ آلے ہِن بلکہ اُنہاں کیتے وی جیہڑے ابرہام وانگُوں اِیمان رکھیندے ہِن۔ کیوں جو ابرہام اساں ساریاں دا پِیُو ہے، 17جِینویں لِکھیا ہے جو ”مَیں تیکُوں بہُوں ساریاں قوماں دا پِیُو مقرر کیتے#پیدائش 17‏:5۔۔“ ابرہام خُدا دی نِگاہ ءچ ساڈا پِیُو ہے جیندے اُتے او اِیمان رکھیندا ہا یعنی او خُدا جیہڑا مُردیاں کُوں زندہ کریندے تے غیر موجود چیزاں کُوں اِینویں سڈ گِھندے جِینویں او موجود ہِن۔ 18ابرہام نا اُمیدی ءچ وی اِیمان رکھیندا ہا تے بہُوں ساریاں قوماں دا پِیُو بنڑیا جِینویں جو اُونکُوں آکھیا گِیا ہا جو ”تیڈی نسل اِینویں#4‏:18 یعنی تاریاں دے وانگُوں۔ ای ہوسی#پیدائش 15‏:5۔ ۔“ 19ابرہام تقریباً سو سال دا ہا تے جانڑدا ہا جو اُوندا جِسم مُردے آلی کار ہے تے سارہ دا رِحم وی مُردے آلی کار ہے، وَل وی اُوندا اِیمان کمزور نہ تھیّا۔ 20اُوں اِیمان دی کمی دے سببّوں خُدا دے وعدہ اُتے شک نہ کیتا بلکہ اِیمان ءچ مضبوط تھی تے خُدا دی تمجید کیتی۔ 21اُونکُوں پکا یقین ہا جو جیہڑا وعدہ خُدا کیتے او اُونکُوں پُورا کرݨ دی وی قُدرت رکھیندے۔ 22اِیں واسطے ابرہام دا اِیمان اُوندے کیتے راستبازی شمار کیتا گِیا۔

23ایہ گالھ جو ”اِیمان اُوندے کیتے راستبازی شمار کیتا گِیا،“ صرف اُوندے کیتے نئیں لِکھی گئی 24بلکہ ساڈے کیتے وی جِنہاں کیتے اِیمان راستبازی شمار کیتا ویسی۔ کیوں جو اساں اُوں خُدا اُتے اِیمان گِھن آئے ہیں جئیں ساڈے خُداوند یسُوع کُوں مُردیاں ءچوں زندہ کیتا۔ 25او ساڈے گُناہاں کیتے موت دے حوالے کیتا گِیا تے ساکُوں راستباز بنڑاوݨ کیتے زندہ کیتا گِیا۔

Currently Selected:

رومیوں 4: SKRV

Highlight

Copy

Compare