रोमी 8
8
परमेश्वर आत्मे अधीनला देत्कानला चुक ओङगीते
1जो जो येशू ख्रीष्टताङ जीउज्यीकराङ ओङला दुक था थेबेकी परमेश्वर सजाय ङेतराङ मेङेदो। 2परमेश्वर आत्मेकी ङाला पाप खित्च्येते बानीदुकी टाल्गीन ङे पाप खाबेकी स्या फाप्च्येते सजायदुकीङ जोए खाईन बिन्सुङ। थेमे ङा येशू ख्रीष्टताङ जीउज्यीकराङ ओङा ओतेकी थेकी ङाला नोमुङ मिसिन्च्येते जुनीङ बिन्दा ओत। 3ङुरूङ परमेश्वरगी खि साबाच्योक खिता मुथुप्कान्ते मि ईन्देकी ङुरूङला पापदुकी डेल्च्येते थेमे स्यिसादुकी जोए खित्च्येते काम परमेश्वर नियम छ्य्वापेकी ओङा थुपा मेतान। थोगी दि काम खिताला मि जुनीराङ लाला केला च्याला स्याप्ला परमेश्वरगी थे खोरोङ फुज्युङराङ देमा ताङसुङ। मि जुनी लासीनोङ थेकी नोमुङ छ्याङ पाप खाबा मेतान। थेमे पापकी सजाय जति परमेश्वरगी थेलाराङ भोगे खित च्युत्सुङ। थे थोक खाईन स्याप्की खित्सादु परमेश्वरगी मिओनला पाप खित्च्येते बानीदुकी टाल्गीन बिन्सुङ। 4दोक ओङा ओतेकी थाचेन ङुरूङगी परमेश्वर नियमला खि साबातेताङ माकेत साबाते गाङे साबा च्योकराङ खिता थुप्क्यो। था ङुरूङ गोमाबा च्योकराङ दाक्पोन खुशीला माख्यामो। बरू परमेश्वर आत्मेकी चुक खित ज्युता छोल्गीका थोकराङ खिओ।
5दाक्पोन खुशीला ख्याम्कान्ते मिओनगीचेन खोपरोङला चुक खिता सेम लाङगीका थे छ्य्वापाकामा स्येत खाला थोकराङ खिओ। परमेश्वर आत्मेकी खित ज्युता चालाच्योक खित्कान्ते मिओनगीचेन थेकी खि साबाते खित्च्ये छ्य्वापाकामा स्येत खाला थोकराङ खिओ। 6दाक्पोन खुशीला ख्याम्कान्ते मिचेन थोक खाबेकी खित्सादु सजाय ङेत्ला स्यिइओ। परमेश्वर आत्मेकी खित ज्युता चालाच्योक खित्कान्ते मिओनलाचेन थेकी नोमुङ मिसिन्च्येते जुनी तेरग्यो। थेमे सेमला ढुक्क लोङगो। 7दाक्पोन खुशीला ख्याम्कान्ते मिचेन परमेश्वर विरोध खित्कान्ते ईन। थोक्तेबेकी परमेश्वर नियम मेङेनो। थेबेकी थेरू खि साबाच्योक खिताराङ मुथुबो। 8होदोक्ते मि परमेश्वरला गाराङ मालाङो।
9ख्योकोनचेन गोमा च्योकराङ दाक्पोन खुशीला ख्याम्कान्ते मि मेन। परमेश्वर आत्मेकी खि साबाच्योक खित्कान्ते मिओन ईन। दोक मेन्दा ईन्सीन ख्योकोनगी परमेश्वर आत्मा ङेत्च्या मेतान। च्यिला सासीन ख्रीष्टकी आत्मा ङेता मेत्सीन थोक्ते मि ख्रीष्टकी मि ईनराङ मेन। 10ख्रीष्ट ख्योकोन सेमदु ओत्सीनोङ पाप खाबेकी खित्सादु स्यिला ख्योकोन जीउचेन रूल्ला डुइओ। ईन्सीनोङ परमेश्वरगी ख्योकोनला दोषी मेन साबा ओतेकी ख्योकोन आत्माचेन नोमुङ मिस्यिओ। 11परमेश्वर थे खोरोङ आत्मा ख्योकोन सेमदु ओतेकी येशू ख्रीष्टला स्यिसादुकी सोम्बो लोक्कान्ते परमेश्वरगीराङ था स्यिनामेई रूल्ला डोच्येते ख्योकोन जीउ खुदुक जोला सोम्बो लोइओ। दोकचेन थेकी ख्योकोन सेमदु ओताते थे खोरोङ आत्मे छ्य्वापेई खिओ।
12बात दोक ईन्देकी आज्यो न्वावे, ङुरूङगी परमेश्वर आत्मेकी खित ज्युता चाला च्योकराङ खिता फाप्क्यो, गोमाबा च्योक दाक्पोनला जे खिता सेम लाङगीदुक थेराङ खिन देता मेङगो। 13च्यिला सासीन काम बात जे खित्जीनोङ दाक्पोन खुशीराङ खिन देत्सीनचेन ख्योकोन स्या फाप्क्यो। परमेश्वर आत्मे छ्य्वापेई दाक्पोन खुशी खिता ताङला होथोक्ते कामताङ बात खिता ताङसीनकामा ख्योकोनगी नोमुङ मिसिन्च्येते जुनी ङेत्क्यो।
14दोक खाला परमेश्वर आत्मेकी खित ज्युता चाला च्योकराङ खित्कान्ते मिचेन गाङेराङ परमेश्वर फुज्युङओन ईन। 15योक्पो योङमुकी मालिकतेकी दुङगीता सिन ज्यीबा खुराच्योक खाला था लोक्ला ख्योकोनगीचेन परमेश्वरगी सजाय तेरगीता सिन थेत्ताङ छ्याःङ ज्यीबा खिता माफाबो। च्यिला सासीन परमेश्वरगी थे खोरोङ आत्मा बिन्गीन ख्योकोनला थे खोरोङ धर्म-पुत्र जोबा ओत। थेमे परमेश्वर आत्मे छ्य्वापेकीराङ परमेश्वरला ङुरूङ दाक आबा सिन सिओ। 16थेमे दाक्पोन परमेश्वर फुज्युङ फुमु ओङगीन सिन्दा ओत सिन ङुरूङला छ्या ओत। दि बात पक्काराङ ईन सिन ङुरूङला परमेश्वर आत्मेकीङ साबा ओत। 17थे फुज्युङ फुमु ओङनामेई थे खोरोङ फुज्युङ फुमुला तेरग्यो साबाते जेसुकै परमेश्वरगी ङुरूङला तेरग्यो। थोक खाला येशू ख्रीष्टकी ङेत्च्येते ङुरूङगीङ ङेत्क्यो। ईन्दालाचेन येशू ख्रीष्टकी खाबा च्योकराङ ङुरूङगीङ थरिङोला दुक्पा भोगे खिता फाप्क्यो। थेमे थेला छ्येज्यीक मान बिन्दा च्योकराङ परमेश्वरगी ङुरूङलाङ मान बिन्ला थे खोरोङगी ज्वा चाला च्योकराङ लेमु जोइओ।
ङुरूङ च्यि बातला आश खाईन देता ओते
18था तिरी परमेश्वरगी ङुरूङला थोक खाला मान बिन्ला थे खोरोङगी ज्वा चाला च्योकराङ लेमु जोच्येते बात सम्झे खासीन थरिङोला ङुरूङगी भोगे खिता फाप्च्येते पीरताङ दुक्पाका च्यि ईन्देरो, ङालानी दिनी छ्याःङ मेन सिराच्योक लाङगीदुक। 19दोक खाला था ङीमाई परमेश्वरगी गाङेकी थोङच्या खाला थे खोरोङ फुज्युङ फुमुला थे खोरोङगी ज्वा चाला च्योकराङ लेमु जोच्येते दिन ओङगो। मि ईन्स्यीत, जीव जन्तु ईन्स्यीत परमेश्वरगी जोबातेबरी जेसुकै थे दिन नाम लेबोङा सिन गुकीनराङ देता ओत। 20च्यिला सासीन सा नाम ईन्स्यीत, मि ईन्स्यीत, जीव जन्तु ईन्स्यीत परमेश्वरगी जोबाते जति गाङेला थे खोरोङगीराङ सजाय बिन्गीन काम लै मिक्किच्या जोबा ओत। ईन्सीनोङ थेकी था ङीमा लेनज्यीक थे खोरोङगी जोबाते जति गाङेला दि सजायदुकी डेल्ग्यो साबा ओत। 21चुक सासीन थे छोमु परमेश्वरगी थे खोरोङ फुज्युङ फुमुला पीरताङ दुक्पा थेमे स्यिच्येते कालदुकी टाल्ला थे खोरोङगी ज्वा चाला च्योकराङ लेमु जोइओ। दोक खाला थे खोरोङगी जोबाते जति गाङेला थेकी सजायदुकी डेल्ग्यो। थेमे थेरू स्यिच्येते, नाश डोच्येते सिराते छ्याःङ मेङगो।
22तर थोरूमसाक थे दिन लेपा मेतेकी फिजे सुक ग्यापाते फेम्मे मि सुगी खुम्बु खिन बेटेक बेटेक खाबा च्योकराङ परमेश्वरगी जोबातेबरीङ जेसुकै स्यिच्येतेताङ नाश डोच्येते छ्य्वापेकी डेल्च्येते दिन नामराङ लेबोङा सिराच्योक खाईन देता ओत सिरच्येते बात ङुरूङला छ्याराङ ओत। 23ईन्दाका ङुरूङोङ थोरूमसाक दुक्पालाराङ देता फापा ओतेकी ङुरूङ सेमलाङ ढुक्क मेत। परमेश्वरगी ङुरूङला थे खोरोङ आत्मा बिन्दा ओतेकी थेकी खिओ साबाते ज्येनोङ था गाङे साबा च्योकराङ खिओ। परमेश्वर आत्मा ङेता ओत्सीनोङ परमेश्वरगी ङुरूङला स्या फाप्सादुकी टाल्ला दि जीउ खुदुक जोला थे खोरोङ धर्म-पुत्र सिन थे खोरोङताङ ज्य्वाच्येते दिन नामराङ लेबोङा सिन ङुरूङ गुकीन देता ओत। 24ङीमाई थोक ओङगो सिन ङुरूङगी आश खाईन देताच्योक परमेश्वरगी थोरूमसाक खाबा मेत्सीनोङ थेकी ङुरूङला पापकी सजायदुकी टाल्गीन सिन्दा ओत। थेकी खिओ साबाच्योक खाईन सिन्दा ईन्सीन ङुरूङ आश खिन गुला देताराङ फाप्च्या मेतान। दाक्पोनगी ङेत्क्यो सिन आश खाबाते जेसुकै ङेत्कीन सिन्नामेईका याङराङ सु गुला देत्कीतेरो? 25थोगी परमेश्वरगी ङुरूङ लाईदु खिओ साबाते थेकी ङीमाई गाङे साबा च्योकराङ खिओ सिन ङुरूङ सेम मेसेता खाईन गुकीनराङ देता ओत।
26लोक्ला ङुरूङ दाक्पोन स्येतकी थोक खिता मुथुप्च्येते ईन्देकी परमेश्वर आत्मेकी ङुरूङला मद्धत तेरग्यो। थेमे परमेश्वरताङ चुक खाला प्रार्थना खिता फाप्कीते सिन छ्या मेतेकी परमेश्वर आत्मा थे खोरोङगीराङ मिकी साला सिराराङ मुथुप्च्येते बात खाला ङुरूङ लाईदु परमेश्वरताङ प्रार्थना खाला तेरग्यो। 27थेमे परमेश्वरला मि सेमगी बात गाङे छ्या ओतेकी थे खोरोङ आत्मेकी ङुरूङ लाईदु प्रार्थना खित्जीन च्यि सिरा चालाते ईन्दे सिन लेमु खाला छ्या स्येक्यो। च्यिला सासीन परमेश्वर आत्मेकीचेन परमेश्वर सन्तान लाईदु परमेश्वरताङ चुक खाला प्रार्थना खिता फाप्च्येते ईन्दे थोकराङ खाला खिओ।
28थेमे दि बादोङ ङुरूङला लेमुराङ खाला छ्या ओत। च्यि सासीन परमेश्वरला ङिङज्ये खित्कान्ते मिओनलाचेन दुक्पा किम्मु जेराङ ओङसीनोङ परमेश्वरगी लेमुराङ ओङ ज्युत्क्यो। थेबे लाईदु थे खोरोङगी खिओ साबाते काम खिताप सिन परमेश्वरगी थेबाला थे खोरोङ दोन्दु स्योक सिन काताङाते ईन। 29च्यि सासीन थेकी थेबाला थे खोरोङ फुज्युङ च्योकराङ लेमु ज्वाप सिन गोमामेई छाने खाबा ओतान। थे खोरोङ फुज्युङचेन छ्येते फुज्युङ च्योकराङ ओङला थेते न्वातेबा काल्बेई ओङस्यीत सिन परमेश्वरगी होथेबाला थोक खाईन छाने खाबा ओतान। 30थेमे परमेश्वरगी गोमामेई थे खोरोङ फुज्युङ च्योकराङ ज्वा चालाते मिओनला थे खोरोङ दोन्दु स्योक सिन काताङगीन च्याकीन दोषी मेन सासुङ। थोक खानामेई थेकी थेबाला मान बिन्गीन थे खोरोङगी ज्वा चाला च्योकराङ लेमु जोसुङ।
परमेश्वरगी ङिङज्ये खिता मोतोङच्येते बात
31बात दोक दोक ईन्देकी था ङुरूङला दि बात लेमु खाला छ्या ओत। च्यि सासीन परमेश्वर ङुरूङ छ्य्वापा ओतेकी खित्सादु ङुरूङला मेलेबा खिता छोल्कान्तेबा सुङगीङ छ्याःङ खिता मुथुबो। 32परमेश्वरगी थे खोरोङ फुज्युङला चुक दुक्पा ओङगीते सिन छ्या स्येकीन स्येकीनोङ ङुरूङ गाङे पापकी सजाय भोगे खाला स्याप्ला थेला देमा ताङा ओतान। थेकी थोक खाईन थे खोरोङ फुज्युङ समेतनी ताङा ओतान सासीन च्यि ङुरूङला ज्येनतोकोङ जेसुकै मेतेरोतरो? 33थेमे परमेश्वरगी छाने खाबाते मिओनला था च्यि सुइँदेकी दोषी ईन सिरा ङेत्क्यो? सुङगीङ थेबाला दोषी ईन सिराराङ मेङेदो। च्यिला सासीन परमेश्वरगीराङ थेबाला दोषी मेन साबा ओत। 34थोकराङ खाला था सुङगीङ थेबाला सजाय मेतेरो। च्यिला सासीन येशू ख्रीष्ट थेबे लाईदु स्यिइन सिन्दा ओत। थे थोक खाईन स्याप्तेकामा मेन, स्यिसादुकी समेदोङ सोम्बो लोगीन थानी परमेश्वर सामे छ्य्वापा देता ओत। थेमे थेरू देत्ला थेकी ङुरूङ लाईदु थेत्ताङ बात खाला तेरग्यो।
35थोगी च्यि था सुइँदेकी थेमे खइँदेकी ङुरूङला ङिङज्ये खित्कान्ते येशू ख्रीष्ट छ्य्वापेकी डेला थुप्क्योतरो? च्यि सासीन ङुरूङला दुक्पा ओङसीनोङ, पीर फाप्सीनोङ, ज्येनगी खेदा खाईन दुक्पा बिन्सीनोङ, त्वाबा तुक्पाताङ पेर्दुङबाराङ देता फाप्सीनोङ, खइँसाला दाक खइँदा ओङगीता सिन ज्यीबा खिता फाप्सीनोङ थेमे सेत्सुङराङ सासीनोङ येशू ख्रीष्टकी ङुरूङला ङिङज्ये खिता ताङाक्वा सिन नोमुङ सिरा माफाबो। 36ङुरूङला दुक्पा ओङगो सिनका परमेश्वर बातलाङ दोक सिन टिबा ओत। चुक सासीन “ए परमेश्वर, खुई मि ईन्देकी ङ्योकोनला सधैँ ज्येनगी दुक्पा बिन्ला सेता छोल्गीदुक। थेबेकीनी ङ्योकोनला सेताला टीकीन खेराते लुकला च्योकराङ खिदुक,” सिन साबा ओत।#भजन ४४:२२ 37तर दाक्पोनला जे ओङसीनोङ येशू ख्रीष्टकी ङुरूङला ङिङज्ये खाबा ओतेकी सुङगीङ थेमे दोक्ते दुक्पा छ्याःङगीङ ङुरूङला ग्याला मुथुबो सिन ङुरूङ सेम मेसेता खाला ढुक्कराङ खाला देत्क्यो। 38-39थोगी ङे दि बात लेमु खाईन छ्या स्येबा ओत। च्यि सासीन दुरू सोन्ला देत देतसाक जे ओङसीनोङ थेमे स्यिनामेकीङ परमेश्वरगी ङुरूङला ङिङज्ये खिता मोतोङो। परमेश्वर दूतओनगी ईन्स्यीत, ल्हा लुओनगी ईन्स्यीत, थरिङोला ङेत्च्येते दुक्पा किम्मु बातकी ईन्स्यीत, था तिरी आइ परे खित्च्येते बातकी ईन्स्यीत, ल्हन्डीक स्यिन्डीपकी ईन्स्यीत थेमे खेनला स्वर्गने ओतातेबेकी ईन्स्यीत, थुल्ला नरककुण्डमा ओतातेबेकी ईन्स्यीत परमेश्वरगी जोबातेबरी जो ईन्सीनोङ जे ईन्सीनोङ सुङगीङ थेमे छ्याःङगीङ ङुरूङला ङिङज्ये खित्कान्ते परमेश्वर छ्य्वापेकी डेला मुथुबो। ङुरूङ प्रभु येशू ख्रीष्टकी खित्सादु थेकी ङुरूङला ङिङज्ये खिता नोमुङ तोङराङ मोतोङो।
Currently Selected:
रोमी 8: JUL
Highlight
Share
Compare
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
