रोमी 7
7
था ङुरूङ परमेश्वर नियम अधीनला मेत
1थेमे आज्यो न्वावे, ख्योकोनगी परमेश्वर नियम छ्या स्येबा ओतेकी ङे सिन ओताते बात ख्योकोनला लेमु खाला छ्याराङ ओत। च्यि सासीन मास्यिथुपचेन मिकी थे नियमला खि साबाते ङेन्दाराङ फाप्क्यो। स्यिनामेईकामा मि थे नियम अधीनला मेङगो। 2फाङमे बातराङ विचार खि। परमेश्वर नियमला फाङमे बात चुक ओते सासीन फाङमा खाबाते फेम्मे मि ख्योबो मास्यिथुप ज्येनताङ ड्वा मेङगो। ख्योबोते स्यिसीनकामा थे ज्येनताङ गाल्सीन ओङगो सिन साबा ओत। 3थोगी ख्योबो ओत्केलाराङ ज्येनताङ गाल्सुङ सासीन थोक्ते फेम्मे मिला रन्डी सिओ। ख्योबो स्यिनामेकी थे ज्येनताङ गाल्सीनचेन थेला रन्डी मिसिरो। ख्योबो स्यिइन सिन्देकी थेकी थोक खासीनोङ परमेश्वर नियमला साबाते फाङमे बात माङेन्दाते मेन।
4आज्यो न्वावे, ख्योकोन बादोङ होदोकराङ ईन। च्यि सासीन ख्रीष्ट स्यिजीन ख्योकोनोङ थेत्ताङराङ स्याप्ते ईन्देकी परमेश्वर नियम लाईदु ख्योकोन स्याप्ते छेतराङ ओङसुङ। थोक ओङनामेईचेन ख्योकोन स्यिसादुकी सोम्बो लोक्पाते ख्रीष्टकीतेराङ ओङा ओत। दोक ओङा ओतेकी ङुरूङ परमेश्वरगी खि साबाते लेमु काम खिता थुप्च्या गाला ओत। 5गोमाबा ङुरूङ दाक्पोन खुशीला ख्याम्गीन ओतान। थोगी थेजीन दाक्पोन सेम मेलेबा ओतेकी झन परमेश्वर नियमला माकेत साबा साबाकामा खिता सेम लाकीन ङुरूङ मेलेबाते कामताङ बात खिन ओतान। थोक खाबेकी ङुरूङ सजाय ङेत्ला स्या फाप्च्या ओङा ओतान। 6तर थाचेन दोक खि, थोक माकेत, दोक माक्यासीन सजाय ङेत्ला स्यिइओ सिरच्येते परमेश्वर नियम लाईदु ङुरूङ स्याप छेतराङ ओङा ओतेकी था ङुरूङ थे नियम अधीनला मेत। परमेश्वरला माने खित्च्या सिन गोमाबा ङुरूङगी थे नियमला खि सिन टिबा च्योकराङ खिता चालाप। परमेश्वर आत्मा ङेता ओतेकी थानी ङुरूङगी परमेश्वरला चुक खाला माने खिता फाप्कीते होथोकराङ खाला माने खिता थुप्क्यो।
मिकी च्यिला परमेश्वर नियम ङेन्दा मुथुप्ते
7ङे दि बात सिरजीन थोक ईन्सीनका परमेश्वर नियमराङ मेलेबा दुका ओना सिरच्येते बात थेन्ग्यो। तर थे नियमनी मेलेबा ईनराङ मेन। परमेश्वरगी थे खोरोङ नियम माबिन्दा ईन्सीन पाप सिराते च्यि ईन्दे सिन ङे छ्याःङ छ्या स्येच्या मेतान। चुक खाला सासीन परमेश्वर नियमला “ज्येनगीते सिराते छ्याःङगीतेङ लोभ माकेत,” साबा मेता ईन्सीन ङाराङगी लोभ खिन ओत सिन ङे छ्याराङ स्येच्या मेतान। 8परमेश्वर नियमला “लोभ माकेत,” साबाते बात छ्या स्येनामेई ङे सेमला पाप ओतेकी ङाला झन झन डारताङ लोभ लाङाला स्यूसुङ। दोक माकेत, थोक माकेत सिरच्येते थे नियम मेता ईन्सीनचेन पाप खित्च्या सिराते ओङच्या मेतान। 9थे नियम छ्या मेत्जीन गोमा ङा ङाराङगी छ्याःङ पाप खाबा मेत सिन ढुक्क खाईन देता ओतान। तिरी परमेश्वर नियम छ्या स्येनामेई थेरू दोक माकेत, थोक माकेत साबा साबाराङ खिता सेम लाकीन थेरू माकेत साबातेराङ खाईन ङे दाक पाप खाबाप। थोक खानामेई ङा सजाय ङेत्कीन स्या फाप्च्या ओङा ओतान। 10परमेश्वर नियमला खि साबा च्योकराङ खित्कान्ते मिओनगी नोमुङ मिसिन्च्येते जुनी ङेत्च्येते ईन्सीनोङ थेरू खि साबाच्योक खिता माथुपेकी ङानी थे नियमगी तोके खाबाते सजाय ङेत्ला स्या फाप्च्या ओङा ओतान। 11ङाराङ सेमला पाप ओतेकी खित्सादु परमेश्वर नियमला माकेत साबा साबा खासीन ओङगो सिन ङा छक्के खाईन ङे थेरू माकेत साबा साबाते कामराङ खाबाप। थोक खाईन पाप खानामेई ङा थे नियमगी तोके खाबाते पापकी सजाय भोगे खाला स्या फाप्च्या ओङाते ईन।
12थोगी परमेश्वर नियमचेन परमेश्वरगीराङ बिन्दाते ईन्देकी मेलेबा मेन। थेरू खि साबाते बात गाङे थेकीराङ खि साबाते ईन। थेरू खि साबातेताङ माकेत साबाते गाङे लेमु ईन। मेलेबाते सिरातेचेन थेरू छ्याःङ खि साबा मेत। 13परमेश्वर नियम दोक लेमु ईन्गीन ईन्गीनोङ ङा थेरू तोके खाबाते सजाय भोगे खिन स्या फाप्च्या ओङाते थे नियमगी खित्सादु मेन। दोक माकेत, थोक माकेत सिरच्येते नियम लेमु ईन्सीनोङ ङे थेरू माकेत साबाते खाईन पाप खाबेकीका ङा थोक खाईन थे नियमला तोके खाबाते सजाय ङेत्ला स्या फाप्च्या ओङाते ईन। पापकी खित्सादु दोक ओङेकी दि पाप सिराते चुक मेलेबा ईन्दे थेमे दिकी खित्सादु मिला चुक मेलेबा ओङच्या ईन्दाका सिन ङुरूङगी लेमु खाला छ्या स्येकीदुक।
14परमेश्वर नियमचेन परमेश्वरगीराङ बिन्दाते ईन सिन ङुरूङला छ्या ओत। ङाचेन परमेश्वरगी खि साबाच्योक खिता मुथुप्कान्ते मिकामा ईन। थेमे पापकी योक्पो च्योकराङ ओङा ओतेकी ङे खालि मेलेबाते कामताङ बात खिता फाप्कीदुक। 15ङे च्यिला दोक खिता फाप्कीका सिन ङे खोराङ मोखोदुक। च्यिला सासीन ङा लेमु खिता छोल्ग्यो। तर ङाराङगी खिता चालाते लेमुते काम मिक्किता खाला दोक खिता मेङगो सिन छ्या स्येकीन स्येकीनोङ दाक थे खिता मेङगो साबाते कामराङ खिओ। 16दोक खाला ङाराङगी मिक्किओ साबाते काम खानामेई ङाला हत्तेरिका ङे च्यिला थोक खाताका सिराच्योक लाङगीदुक। थोगी परमेश्वर नियमला माकेत साबाते काम खिता लेमु मेन सिन ङाङ सिओ। दोक ईन्देकी परमेश्वर नियमचेन लेमु ईन। 17ङाराङगी मिक्किओ साबाते काम ङे ङाराङ खुशीकी खाबाते मेन। ङाराङ सेमला पाप ओतेकी खित्सादुका ङे थोक खिता फाप्च्येते ईन। 18ङा परमेश्वरगी खि साबाच्योक खिता मुथुप्कान्ते मिकामा ईन्देकी ङे लेमु सिराते छ्याःङ खिता मुथुप्च्येते ईन सिन ङाला छ्या ओत। चुक खाला सासीन लेमु खिताप सिन जतिराङ खासीनोङ ङाराङगी खिता चालाच्योक ङे पटक्क खिता मुथुप्तुक। 19लेमु खिता चाल्सीनोङ थोक मिक्किता खाला ङा ङाराङगी मिक्किओ साबाते कामराङ खिन देत्क्यो। 20दोक खाला ङे ङाराङगी मिक्किओ साबाते कामराङ खिन देत्च्येतेचेन ङाराङ सेमला पाप ओतेकी खित्सादु ईन, ङाराङ खुशीकी खाबाते मेन।
21थोगी ङे जति लेमु खिता चाल्सीनोङ थोक खिता माथुप्ला खालि ङे दोक माक्याबाला मेङच्येते च्योकराङ खाला मेलेबाते कामकामा खिता फाप्कीदुक। 22ईन्दालाचेन परमेश्वर नियम लेमु ईन सिन ङाला थेरू खि साबा च्योकराङ खिता आउदी सेम लाङगीदुक। 23ईन्सीनोङ ङाराङ बोली, कामताङ बानी ताजीनचेन ङाराङगी लेमु खिता चालाते बातताङ बान्दा मिडिक्तुक। ङाराङ पापकी योक्पो च्योकराङ गाल्गीन सिन्दा ओतेकी बात खित्जीन ईन्स्यीत, काम खित्जीन ईन्स्यीत ङे ङाराङगी खिता सेम माक्याबाते कामराङ खिता फाप्कीदुक। 24ङाराङगी चुक खिन ओते सिन तासीन ङानी पक्काराङ अभागीते मि ईन। था ङाला दोक खित्से छ्य्वापेई टाल्ला स्या फाप्च्येते सजायदुकी सुई जोए खाला बिनोङा? 25ङाला थोक खाला तेरकान्ते परमेश्वरराङ ईन। ङुरूङ प्रभु येशू छ्य्वापेई ङा थेला जय जय साला धन्यवाद सिओ। ङे ङाराङगी खिता थुप्च्येते कामकामा तासीन ङेते छ्याःङ आश मेत। ङे खिता थुप्च्येते कामनी खालि परमेश्वर नियमला साबा च्योकराङ खिता सेम खाला थोक खिता छोल्च्येतेकामा ईन। ङाराङ परमेश्वरगी खि साबाच्योक खिता मुथुप्कान्ते मिकामा ईन्देकी ङे पापकामा खिता फाप्कीदुक।
Currently Selected:
रोमी 7: JUL
Highlight
Share
Compare
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
