रोमी 9
9
पावलगी इस्राएली लाईदु पीर खाबाते
1थेमे येशू ख्रीष्टताङ जीउज्यीकराङ ओङाते मि ईन्देकी ङा ईन्दाते बातकामा खिओ। ङे खिन ओताते दि बात ढाँर खाबाते मेन सिन ङाराङ सेमगी नाङ ओताते परमेश्वर आत्मेकीङ ङाला छ्या स्ये च्युता ओत। 2-3दि बात च्यि ईन्दे सासीन ङेराङ जातकी आज्यो न्वाओन लाईदु पीर खिताई खिताई थानी ङेते सेमोङ छोकीन सिन्सुङ। ङा थेबे लाईदु आउदी खाला पीर खिनराङ देत्क्यो। थेबे साटोला थेबा च्योक खाईन ङा ङाराङ ख्रीष्टकी छ्य्वापेई ठाल्गीन देता थुप्सीन थेमे परमेश्वरगी थेबाला तेरच्येते सजाय ङाराङगी भोगे खिता फाप्सीन थोगोङ खित्च्या ओतान। 4थेबानी परमेश्वरगी थे खोरोङ मि सिन साबाते इस्राएलीओनराङ ईन। थेबाचेन परमेश्वरगी थे खोरोङ धर्म-पुत्र जोबाते मि ईन। थेबेकी परमेश्वरला मिगी ताराङ मुथुप्च्या झिलिमिली नाम्दाकला देता ओता थोङा ओतान। थे खोरोङगी च्यि च्यि खिते सिन परमेश्वरगी थेबाताङ पालोताङ पालो जमान खाबा ओतान। थेमे थेबेकी चुक चुक खिता फाप्कीते सिन नियमओनोङ बिन्दा ओतान। थे खोरोङला चुक खाला माने खिता फाप्कीते सिन लाप्कीन बिन्गीन थेकी थेबाला आशी बिन्ला लेमु खिओ सिनोङ याङ याङराङ साबा ओतान। 5दोस्यिककामा मेन, थेबाचेन अब्राहाम, इसहाक थेमे याकूब सन्तानराङ ईन। थेमे परमेश्वरगी तोङगो साबाते ख्रीष्टोङ मि जुनी लाला दुरू ओङजीन थेबे जातकी नाङराङ केबा ओतान। थेचेन सा नाम खाङ गाङेपा गाङेला राज्य खित्कान्ते परमेश्वर ईन। थेते सधैँभरि जय जय ओङस्यीत। आमेन।
सु सु परमेश्वरगी छाने खाबाते मि ईन्दे
6तर इस्राएलीओन बात विचार खाला ताजीन परमेश्वरगी थेबाताङ खिओ साबाच्योक माक्याबा च्योकका थोङगीदुक मेन? बात दोक मेन, थेकी साबाते बात नोमुङ फरक परे मिक्किओ। बरू बात चुक ईन्दे सासीन इस्राएली गाङेराङ परमेश्वरगी छाने खाबाते मि मेन। 7थोकराङ खाला अब्राहाम छ्य्वापेई केबाते ईन सिरजीनमेईराङ थे फिजा गाङेला अब्राहामते पक्काते सन्तान ईन सिन सिरा मुथुबो। च्यिला सासीन परमेश्वरगी अब्राहामला “खुई फुज्युङ इसहाक सन्तानलाकामा ङा खुई सन्तान सिन सिओ,” सिन साबा ओतान।#उत्पत्ति २१:१२ 8थोगी बात च्यिन्दे सासीन अब्राहाम फुज्युङ फुमु ओङला केजीनमेईराङ गाङेला परमेश्वर फुज्युङ फुमु ईन सिन सिरा मुथुबो। इसहाक केइओ सिन साबाच्योक खाईन परमेश्वर थे खोरोङगीराङ अब्राहाम सन्तान ओङ च्युताते मिओनकामा परमेश्वर सन्तान ईन। 9इसहाक केच्येते बात खिन परमेश्वरगी अब्राहामला “ङे खोल्ला ओङगो साबे बेलाला ङा दुरू ग्युरला ओङजीन खुई फेम्मे सारेकी फुज्युङज्यीक केबा ओङगो,” सिन साबा ओतान।
10याङराङ रिबेकेकी केबाते जौंलेबा एसावताङ याकूब बातराङ विचार खाला तो। थेबा ङिकाराङ ङुरूङ पुर्खा इसहाक फुज्युङराङ ओतान। 11-12थेबा ङिबोकी लेमुताङ मेलेबा छ्याःङ काम माक्याबाला थेबा क्या भन्दा गोमाराङ परमेश्वरगी रिबेकाला “आज्योतेकीका न्वातेला मान खिता फाप्क्यो,” सिन साबा ओतान।#उत्पत्ति २५:२३ परमेश्वरगी सुइँदाला थे खोरोङ दोन्दु स्योक सिन छाने खित्जीन मिकी खाबाते लेमुताङ मेलेबा काम ताला मेन, थे खोरोङला छाने खिता सेम लाबातेला छाने खिओ सिन तेन्दालाराङ थेकी थेबा ङिबो नाङ न्वातेला थोक खाईन छाने खाबा ओतान। 13थेकी मिओनला होदोक खाला छाने खिओ सिन परमेश्वरगी थे खोरोङ बातला “याकूबला ङे ङिङज्ये खाबाप, एसावलाचेन ङिङज्ये माक्या,” सिन साबा ओत।#मलाकी १:२-३
परमेश्वरला थे खोरोङ खुशीकी काम खित्च्येते
अधिकार ओत
14बात दोक ईन्सीन च्यि परमेश्वरगीराङ कोईला काका कोईला पाका खित्च्याक्वा सिन सिरच्या ओना? मेन मेन, परमेश्वरगी दोक खितराङ मिक्किओ। 15थे खोरोङगी चुक खाला काम खिते सिन मोशाताङ बात खिन थेकी “ङाराङला ङिङज्ये खिता सेम लाबाते मिला ङा ङिङज्ये खिओ। थोकराङ खाला ङाराङला लेमु खिता सेम लाबातेला लेमुराङ खिओ,” सिन साबा ओतान।#प्रस्थान ३३:१९ 16थोगी परमेश्वरगी मिला ङिङज्ये खित्च्येतेचेन सुइँदा मिकी परमेश्वरगी ङाला ङिङज्ये खिता फाप्क्यो सिराच्योक खाबेकी खित्सादुङ मेन, स्याप स्याप खाईन धर्म कर्म खाबेकीङ मेन। थे खोरोङगी ङिङज्ये खिता सेम खाबेकीकामा थेकी मिओनला थोक खित्च्येते ईन। 17थे खोरोङला जस्तो खिता सेम लाङगीदुक थोकराङ खिओ सिन परमेश्वरगी मिश्रे गेल्बो फारोला साबाते बात परमेश्वर बातला दोक सिन टिला दुक। चुक सासीन “ङे खुई लुङबादु खाबाते काम थोङला सा लुङबा खाङगी मि गाङेकी ङात्ताङ चुक छ्येज्यीक शक्ति ओता ईन्दाका थेमे ङा चुक्ते परमेश्वर ईन्दाका सिन छ्या स्येस्यीत सिनराङ ङे खोल्ला दि लुङबे गेल्बो जोबाते ईन,” सिन साला दुक।#प्रस्थान ९:१६ 18थोगी परमेश्वरगी सु सुला ङिङज्ये खिता सेम लाङगीका थेबाला थोकराङ खिओ। थेमे फारोला खाबा च्योकराङ सुइँदा मि सेम थे खोरोङगी साबाते मेङेन्च्या ज्वा सेम लासीन थेकी थोगोङ खिओ।
19दि बाततेबा थोजीन था ख्योकोन सुइँदेकी परमेश्वर थे खोरोङगीराङ मिओनला चुक खिता सेम लाङगीका थोकराङ खित्च्येते ईनलाङ थोरूम थेकीराङ चुक खाला मिओन दोषी ईन सिरा ङेत्कीते? च्यि सुइँदेकी थेला थेकी खिता चालाच्योक माकेत साला थेकी ङेन्ग्यो? सिन सारोङ। 20ख्योकोन दोक सिरकान्तेबाला ङा च्यि सिते सासीन परमेश्वरगी ठीक काम माक्यासुङ सिन थेला खा खित्कान्ते खोका सु ईन्देरो? च्यि सबी स्यीकी कुमालेला खुई ङाला च्यिला दोकस्यिक खाईन जोबे सिन सिओतरो? 21बाजिईला ङेबाते सबी ईन्सीनोङ कुमालेकी थे खोरोङ खुशीकी स्यीज्यीकचेन लेमुते कामला कहिले कहिलेकामा चले खित्च्येते थेमे ज्येनतेचेन जहिलेङ चले खिताला सिन ज्वा थुप्क्यो मेनरो?
22होथोकराङ खाला परमेश्वरलाङ थे खोरोङला जस्तो खिता सेम लाङगीदुक उस्तोराङ खित्च्येते अधिकार ओतेकी थेकी कोई कोई मिला स्येदाङगी चूर गाल्ला थे खोरोङगी तेरच्येते सजाय चुक मेलेबाज्यीक ओङगीते थेमे थे खोरोङताङ चुक छ्येज्यीक शक्ति ओते सिन तेन्गीन बिन्दा ओत। थेबा परमेश्वरगी स्येदाङगी चूर गाल्ला नरककुण्डमा लुबा फाप्च्येते मि ओता ईन्सीनोङ थे थेबाताङ होत्ता स्येदाङ मिक्किता खाईन काल्बासाक खपे खाईन देता ओतान। 23थोकराङ खाईन थे खोरोङगी ङिङज्ये खाबाते ज्येन मिओनलाचेन थेकी थे खोरोङ चुक छ्ये ईन्दे थेमे चुक आशी तेरकान्ते ईन्दे सिनोङ तेन्गीन बिन्दा ओत। थेबालाचेन मान बिन्ला थे खोरोङगी ज्वा चाला च्योकराङ लेमु जोइओ सिन थेकी गोमामेकीराङ टुङ्गो खाबा ओतान। 24थेकी थोक खिओ सिन टुङ्गो खाबाते मिओनचेन ङुरूङराङ ईन। थेकी ङुरूङला यहूदी नाङदुकीकामा मेन्देकी ज्येन ज्येन जातकी नाङदुकीङ थे खोरोङ दोन्दु स्योक सिन काताङा ओत।
25थे खोरोङगी मिओनला दोक खिओ सिन परमेश्वरगी साबाते बात होशेकी टिबाते बातला दोक सिन साबा ओत। चुक सासीन
“थाचेन ङा गोमा ङे मि मेन्दाते मिओनलाङ ङाराङ मि ईन सिओ थेमे गोमा ङाराङगी ङिङज्ये माक्याबाते मिओनलाङ ङिङज्ये खिओ।
26थेमे गोमा ङाराङगी ख्योकोन ङे मि मेन साबाते मिओनलाराङ थाचेन दिबा सोम्बोते परमेश्वर फुज्युङ फुमु ईन सिन सिओ,” सिन साबा ओत।#होशे २:२३; १:१०
27थोकराङ खाईन इस्राएलीओनला चुक ओङगीते सिन यशैयेकी
“ख्योकोन इस्राएली ङोला ङ्वा मुथुप्च्या समुन्द्रे बालुवा छेतराङ ओत्सीनोङ ख्योकोन नाङ टिक्पीस्यिककामा परमेश्वर सजायदुकी थारग्यो।
28प्रभु परमेश्वरगी गाङेपा गाङेला न्याय खाला गोमाका थे खोरोङगी खिओ साबाते बाततेबा था होत्ताराङ गाङे साबा च्योकराङ खिओ,” सिन साबा ओत।#यशैया १०:२२-२३
29लोक्ला यशैयेकीराङ गोमाका
“गाङे भन्दा छ्येज्यीक शक्ति ओताते प्रभु परमेश्वरगी ङुरूङ सन्तान नाङ कोई कोईला थार माच्युता ईन्सीन
थाङबो सदोमताङ गमोरा सारगी मिओन च्योकराङ खाला सजाय ङेत्ला ङुरूङोङ खराप खुरूप स्यिच्या ओतान,” सिनोङ साबा ओतान।#यशैया १:९
इस्राएलीओनगी येशू ख्रीष्टला विश्वास माक्याबाते
30थोगी बातचेन दोकराङ ईन। च्यि सासीन ज्येन ज्येन जातकी मिकी परमेश्वरगी खोपरोङला दोषी मेन सिरस्यीत सिन छ्याःङ माक्यासीनोङ परमेश्वरगीराङ थेबाला दोषी मेन सिदुक। परमेश्वरगी खोपरोङला दोषी मेन सिओ सिन थेबेकी थेला विश्वास खाबेकी खित्सादुराङ थेकी थेबाला थोक्ते मि ईन सिन साबाते ईन। 31लोक्ला इस्राएलीओनगीचेन परमेश्वरगी खोपरोङला दोषी मेन सिरस्यीत सिन स्याप स्याप खाईन परमेश्वर नियमला खि साबा साबा खिता चाल्सीनोङ परमेश्वरगी थेबाला नोमुङ दोषी मेन सिन मासासुङ। 32च्यिला सासीन थेबेकी खोपरोङला दोषी मेन सिरच्येते परमेश्वर काम ईन सिन थेला विश्वास माक्यासुङ। थोक खिता साटोला बरू थेबेकीचेन परमेश्वर नियम ङेन्ला धर्म कर्म खालाराङ थे दोन्दु थोक्ते मि ओङा चाल्सुङ। थेबेकी थोक खाबेकी खित्सादु येशू ख्रीष्टचेन थेबे लाईदु नार्दोक ग्याप्ला रिल्च्येते दो च्योकराङ ओङसुङ। 33होथे दोई बात खिन परमेश्वरगी थे खोरोङ बातला दोक सिन साबा ओतान। चुक सासीन
“लो दि बात लेमु खाला ङेन। ङा सियोन सारदु दोज्यीक ज्य्वाक्यो। थे दोला मिओन नार्दोक देइओ।
ङे थेरू ज्याक्पाते दोला मिओन ठोके खाला रिल्ग्यो। परमेश्वरगी सियोन सारदु ज्याक्पाते दो साबाते मिकीकामा ङुरूङला लेमु खिता थुप्क्यो सिन
थेला विश्वास खित्कान्ते मिओनला थेकी नोमुङ ङोचा मोलोङो,” सिन साबा ओतान।#यशैया ८:१४; २८:१६
Currently Selected:
रोमी 9: JUL
Highlight
Share
Compare
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
