रोमी 3
3
परमेश्वर थे खोरोङगी साबा च्योकराङ खित्कान्ते ईन
1थेमे सुइँदेकी यहूदीओन बात दोकराङ ईन्सीनका यहूदी ओङाताङ ज्येन जातकी मि ओङाला च्यि फरक ओङसुङा? थेमे खतकी चिनु जोबातेङ च्यि फाइदा ओङसुङारो सिन सारोङ। 2थोक सिरकानला ङा च्यि सिते सासीन यहूदी ओङाला काल्बेई फाइदा ओत। गाङे भन्दा गोमानी परमेश्वरगी थेबाताङ बात खाईन थेबाला थे खोरोङ बात बिन्दा ओत।
3परमेश्वरगी थेबाला थे खोरोङ बात बिन्दा ओता ईन्सीनोङ कोई कोईकीचेन खोपरोङगी खिओ साबा च्योकराङ खाईन परमेश्वरला माने माक्यासुङ। थेबेकी थोक खासुङ सिरजीनमेईराङ च्यि था परमेश्वरगीङ थे खोरोङगी खिओ साबाच्योक खिता तोङगोतरो? 4थोकनी थेकी खितराङ मिक्किओ। ओताते मिबरी गाङेकी खोपरोङगी खिओ साबाच्योक मिक्किता खाईन ढाँर खासीनोङ परमेश्वरगीचेन नोमुङ दोक मिक्किओ। थेकी जहिलेङ थे खोरोङगी साबा च्योकराङ खिओ। थे खिओ साबा च्योकराङ खित्कान्ते ईन सिन परमेश्वर बातलाङ दोक सिन टिबा ओत। चुक सासीन “परमेश्वर खोरोङगी खिओ साबाच्योक पक्काराङ खित्कान्ते ईन सिन मि गाङेकी लेमु खाला छ्या स्येक्यो। खुई साबा च्योकराङ माक्यासुङ सिन सुङगीङ खोल्ला दोष लै खिता मुथुबो,” सिन साबा ओत।#भजन ५१:४
5थोगी था ङुरूङगी परमेश्वरगी साबाते माङेन्गीन मेलेबा काम खासीनोङ थेकीचेन नोमुङ मेलेबा काम मिक्किच्याक्वा सिन झन लेमु खाला छ्या स्येकीदुक सासीन ङुरूङगी च्यि मेलेबा खाबाते ईन्देरो? ङुरूङगी मेलेबा काम खासुङ सिन थेकी ङुरूङला स्येदाङगी चूर गाल्गीन सजाय बिन्सीन दिनी दाक अन्याय खाबाते ओङसुङ याङ सिरच्येते बादोङ थेन्ग्यो। दिनी कोई कोई मिकी खित्च्येते बातकामा ईन। 6सजाय तेरजीन परमेश्वरगी अन्याय सिराते खितराङ मिक्किओ। अन्याय खासुङ सासीन थेकी दि सा लुङबे मिओनला ठीक खाला न्याय खिताराङ मुथुबो। 7लोक्ला कोईकीचेन ङे खिओ साबाच्योक माक्यानामेई परमेश्वरचेन थे खोरोङगी साबा च्योकराङ खित्कान्ते दुका सिन छ्या स्येला मिओनगी थे चुक छ्ये ईन्दाका सिन थेला झन मान खिदुक सासीन ङे च्यि पाप खाबाते ईन्देरो? परमेश्वरगी ङाला पापी ईन सिन सजाय तेरा डिकराङ मिडिगो सिनोङ सारोङ। 8दोक सिरकान्ते मिओनगीचेन मेलेबा काम खासीन लेमुका ओङच्याक्वा थोगी लो था झन मेलेबा मेलेबा काम खिइ सिनका सिओ। ङात्ताङ ङे र्वाओनगीङ होदोक्ते बातका लोप्कीदुक सिन कोई कोई मिकी ङ्योकोनला दोष समेदोङ लै खाबा ओत। होथोक्ते मिलानी परमेश्वरगी सजाय तेरा फाप्च्येतेराङ ईन।
परमेश्वर दोन्दु मि गाङे दोषी ईन
9थेमे था ङुरूङ चुक सिरच्ये ओना? च्यि ङुरूङ यहूदीओन ज्येन ज्येन जातकी मि भन्दा लेमु मि ईन सिरच्या? चुक खाला दोक सिरच्येरो? च्यिला सासीन यहूदी ईन्स्यीत, ज्येन ज्येन जातकी मि ईन्स्यीत गाङेराङ मेलेबा कामताङ पाप खित्कान्ते ईन सिन ङुरूङगी लेमु खाईन छ्या स्येसुङ मेन? 10मि गाङे पापी ईन सिन परमेश्वर बातलाङ दोक सिन टिबा ओत। चुक सासीन
“गल्ती मिक्किकान्ते सिराते सुङ मेत। मि गाङे दोषी ईन।
11गाङे मि लेम्बा गाल्गीन सिन्ला दुक। परमेश्वर छ्य्वापा लै खित्च्येते सेम सिराते सुङगीतेङ मिन्दुक।
12परमेश्वरला माने खिता ताङगीन दाक्पोन लामला ख्याम्बाला स्यूबेकी थेबा ङ्येकीन गाल्सुङ। लेमु काम खित्कान्ते सिराते सुङ मिन्दुक।
13थेबे खानामेई खालि मेलेबाते बोलीकामा थेन्ग्यो। थेबेकी ज्येनला छक्के खिताला ढाँरकामा खिओ।
थेबेकी मिला खालि मेलेबाकामा सिओ। थोक खाबाते विष ओताते रूलगी त्वाबा च्योकराङ ईन।
14थेबेकी ज्येनला मोता सरापकामा खिओ। थेबा थुई थुम्पु ईन।
15मि सेताला थेबाला छ्याःङ च्योगोङ मालाङो।
16थेबा जहाँ डुइदुक थेरू जेसुकै नाश ताङला ज्येनला दुक्पा तेरच्येते कामकामा खिदुक।
17थेबा ज्येनताङ डिक्ला थुन्ला देत्च्येते सेमराङ मिक्किदुक।
18थेमे थेबा परमेश्वरताङोङ बान्दा ज्यीबा मिक्किदुक,” सिन साबा ओत।#भजन ५:९; १४:१-३; ३६:१; यशैया ५९:७-८
19थेमे परमेश्वर नियमला खि साबाते बातबरी थे नियम ङेताते मिओनला खि साबाते ईन सिन ङुरूङला छ्याराङ ओत। थोक ईन्देकी ङे छ्याःङ गल्ती खाबा मेत सिन सुङगीङ सिरा मेङेदो। दि सा लुङबे मि गाङे दोषीराङ ईन्देकी गाङेकी परमेश्वर सजाय ङेत्क्यो। 20च्यिला सासीन परमेश्वर नियमला खि साबाते ङेन्लानी सुङलाङ परमेश्वरगी दोषी मेन सिरराङ मिसिरो। परमेश्वर नियम तालाचेन खालि थे नियम माङेन्गीन दाक्पोनगी पाप खाबा ओताक्वा सिनकामा छ्या स्येक्यो।
परमेश्वरगी चुक्ते मिला दोषी मेन सिते
21बात दोक ईन्सीनोङ थाचेन परमेश्वर नियम बात मिक्किता खालाराङ परमेश्वरगी चुक खाला मिओनला दोषी मेन सिते सिरच्येते बात छ्या स्ये च्युत्कीन बिन्दा ओत। थेकी मिओनला चुक खाला थोक्ते मि ईन सिते सिरच्येते बातचेन परमेश्वर नियमला थेमे परमेश्वर बात खित्कान्ते मिओनगी टिबाते बातलाङ साबा ओतान। 22थाचेन जोराङ ईन्सीनोङ येशू ख्रीष्टला विश्वास खित्कान्ते मि गाङेला परमेश्वरगी दोषी मेन सिओ। यहूदी ईन्स्यीत, ज्येन ज्येन जातकी मि ईन्स्यीत परमेश्वर दोन्दु गाङे थोजोराङ ईन। 23च्यिला सासीन मि गाङेकी पाप खाबेकी खित्सादु सुङ परमेश्वर दोन्दु जस्तो लेमु ओङा फाप्च्या ओतान उस्तोराङ मायाङसुङ। 24ज्येन छ्याःङ मेन्देकी थे खोरोङ दयेकीकामा परमेश्वरगी मिओनला दोषी मेन सिओ। येशू ख्रीष्टकी खाबाते कामगी खित्सादु थेकी मिओनला पापदुकी टाल्ला दोक खाला दोषी मेन सिओ। 25मिओन पाप माफ ओङस्यीत सिन स्याप्ला परमेश्वरगी येशू ख्रीष्टला देमा ताङाते ईन। थेमे येशू ख्रीष्ट स्यिजीन थे जीउदुकी थेन्दाते ठागी खित्सादु खोपरोङ पाप माफ ओङगो सिन थेला विश्वास खित्कान्ते मिओन पाप परमेश्वरगी माफ तेरग्यो। परमेश्वरचेन मिओनगी गोमामेकी खाबाते पापकी सजाय मेतेरा खाईन देता ओतान। येशू ख्रीष्टकी खाबाते कामगी खित्सादु थेबे पाप माफ तेराप सिन थे थोक खाईन देत्कीन थेकी थे खोरोङ जे खित्जीनोङ ठीक खाला खित्कान्ते ईन सिन मिओनला छ्या स्ये च्युत्सुङ। 26थोकराङ खाईन थरिङोला येशूला विश्वास खित्कान्ते मिओन पाप माफ बिन्ला थेबा दोषी मेन सिरजीनोङ थेकी थे खोरोङ जे खित्जीनोङ ठीक खाला खित्कान्ते ईन सिन छ्या स्ये च्युत्कीन बिन्सुङ।
27बात दोक ईन्देकी परमेश्वर नियम ङेन्गीनका थेकी ङुरूङला दोषी मेन साबाते ईन सिन ङुरूङ सुङगीङ छ्ये खिता मेङेदो। च्यिला छ्ये खिता मेङेत्ते सासीन परमेश्वर नियम ङेन्गीन धर्मती ओङेकी खित्सादु मेन, येशूला विश्वास खाबेकी खित्सादुकामा परमेश्वरगी ङुरूङला दोषी मेन साबाते ईन। 28परमेश्वर नियम ङेन्ला मि सुङलाङ परमेश्वरगी दोषी मेन मिसिरो। येशू ख्रीष्टकी खाबाते कामगी खित्सादु खोपरोङला दोषी मेन सिओ सिन थेला विश्वास खित्कान्ते मिओनलाकामा थेकी दोषी मेन सिओ। दि बात ङुरूङगी लेमु खाईन छ्या स्येबा ओत। 29च्यिला सासीन परमेश्वर यहूदीतेकामा मेन्देकी ज्येन ज्येन जातकी मितेङ ईन। 30मि गाङेते परमेश्वर दोक्पोईकामा ओत। यहूदी ईन्स्यीत, ज्येन ज्येन जातकी मि ईन्स्यीत येशू ख्रीष्टला विश्वास खित्कान गाङेला परमेश्वरगी दोषी मेन सिओ। 31येशू ख्रीष्टला विश्वास खित्कान्तेलाकामा परमेश्वरगी दोषी मेन सिओ सिरजीन ङुरूङगी परमेश्वर नियम था छ्याःङ काम लै मिक्किओ सिन साबाते मेन। ङुरूङनी परमेश्वर नियमला साबाते बात साबा च्योकराङ ओङा ओत सिनका सिओ।
Currently Selected:
रोमी 3: JUL
Highlight
Share
Compare
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
