रोमी 2
2
परमेश्वरगी चुक खाला न्याय खिते
1दि बात थोजीन छ्यि थेबा मेलेबा मि ईन सिरकान्तेबा ख्योकोन जोराङ ईन्सीनोङ ङेनी छ्याःङ मेलेबा खाबा मेत सिन सुङगीङ सिरा मेङेदो। थेबेकी मेलेबा काम खाबेकी सजाय ङेताराङ फाप्क्यो सिन साबेकी ख्योकोनोङ दोषी ईन। च्यि ख्योकोनोङ होथेबेकी खित्च्येते च्योक्ते कामराङ खित्कान मेनरो? 2परमेश्वरगी होथोक्ते मेलेबाते काम खित्कान्ते मिओनला सजाय तेरा डिक्च्येतेराङ ईन सिरच्येते बात ङुरूङ सुङ मेन मिसिरो। 3दि बात छ्या ओत्लाङ ज्येनलाचेन पापी ईन सिन साला थेबेकी च्योक्ते मेलेबाते कामराङ खित्कान्ते ख्योकोन खेराङगीचेन सजाय मेङेदो सिन चुक खाला विचार खिते? परमेश्वर सजायदुकी ख्योकोनोङ उम्केराङ मिक्किओ। 4ख्योकोनलाचेन खेराङ लेमु मि ईन्गीनका परमेश्वरगी आउदी दया खाला लेमु खिन ओताते ईन सिराच्योक लाङगीतासीन। तर बात दोक मेन। ख्योकोनगी खेराङ पापी दुका सिन छ्या स्येला थे खोरोङ छ्य्वापा लै खित्स्यीत सिनका परमेश्वरगी थरिङसाक छ्याःङ मिक्किता खाईन देताते ईन सिन ख्योकोनगी छ्या स्येबा खि। 5परमेश्वरगी दोक दया खासीनोङ थेकी साबाते मेङेन्दा खाईन ख्योकोन डेब्रो खाईन देत्ला दुक। थेमे मेलेबाते काम खिताङ ताङा मिन्दुक। दोक खिन देता ओतेकी था तिरी परमेश्वरगी स्येदाङगी चूर गाल्ला सुङलाङ काका पाका मिक्किता खाला न्याय खिता छोमु ख्योकोनगी झन छ्येज्यीक सजाय ङेत्क्यो।
6थे छोमु परमेश्वरगी सु सुकी च्यि खाला दुका ताला लेमु काम खित्कान्तेबाला इनाम थेमे मेलेबा काम खित्कान्तेबालाचेन सजाय तेरग्यो। 7था तिरी परमेश्वरगी खोपरोङला थेकी ज्वा चाला च्योकराङ लेमु जोइओ थेमे मान बिन्ला नोमुङ मिस्यिच्येते जुनी तेरग्यो सिन थेकी साबाते ङेन्ला लेमु कामकामा खिन देत्कान्ते मिओनलाचेन थेकी नोमुङ मिसिन्च्येते जुनी तेरग्यो। 8परमेश्वरगी छ्या स्ये च्युताते सत्यते बात मेङेन्दा खाला खोपरोङ खुशी खिन मेलेबा काम खित्कान्ते मिओनलाचेन थेकी स्येदाङगी चूर गाल्ला सजाय तेरग्यो। 9थोक खाला मेलेबा काम खित्कान गाङेकी तिरी ज्यीबा लाङच्या दुक्पा ङेत्क्यो। दोक्ते दुक्पा गोमा यहूदीओनला थेरूई ज्येन ज्येन जातकी मिला ओङगो। 10लोक्ला लेमु काम खित्कान्तेबालाचेन यहूदी ईन्स्यीत, ज्येन ज्येन जातकी मि ईन्स्यीत परमेश्वरगी गाङेला थे खोरोङगी ज्वा चाला च्योकराङ लेमु जोइओ। थेकी थेबाला मान बिन्ला ढुक्क खाला देत ज्युत्क्यो। 11च्यिला सासीन न्याय खित्जीन परमेश्वरगी कोईला काका कोईला पाका मिक्किओ।
12परमेश्वर नियम छ्या मेताते ज्येन ज्येन जातकी मि न्याय खित्जीन परमेश्वरगी थे नियम ङेन्सुङाना माङेन्सुङा सिन माताओ। थेबेकी पाप खाबा ओत्सीन थेबा सजाय ङेत्ला नरककुण्डमा डुइओ। थे नियम छ्या ओताते यहूदीओन न्याय खित्जीनचेन परमेश्वरगी थे नियमराङ लै खाला न्याय खिओ। थे नियम मेङेन्दा खाईन पाप खाबा ओत्सीन थेबेकीङ सजाय ङेत्क्यो। 13च्यिला सासीन परमेश्वर नियम छ्या ओत्जीनमेईराङ सुङलाङ परमेश्वरगी दोषी मेन मिसिरो। जसकी परमेश्वर नियमला साबा च्योकराङ खाईन काम खाला दुक होथोक्ते मिओनलाराङ थेकी दोषी मेन सिओ। 14ज्येन ज्येन जातकी मिला परमेश्वर नियम बिन्दा मेतेकी थेबाला थे नियम छ्या मेत। दोक ईन्सीनोङ थेबेकी थे नियमला खि सिन साबाते बातताङ डिक्च्येते कामओन खिदुक। थेबेकी थोक खाबा थोङजीन खाङ काम लेमु ईन्दे, खाङ मेलेबा ईन्दे सिन थेबा खोपरोङगीराङ डेला थुपाते बात दाक छ्या स्येकीदुक। 15दि बात ताजीन परमेश्वर नियमचेन थेबा खोपरोङ सेमगी नाङदुराङ ओताच्योक थोङगीदुक। चुक खाला सासीन खइँदा लेमुते काम खित्जीन थेबा ङे दोक खाबाते ठीक ईन सिन गा खिदुक, खइँदा मेलेबा काम खासीनचेन ङे थोक खिता ओङच्या मेतान सिराच्योक खिदुक। 16ङे साबाते बातओन दोकराङ ईन सिन था तिरी न्याय खिते छोमु छ्या स्येक्यो। थे छोमु परमेश्वरगी मि गाङे सेमगी बात खाङ लेमु ईन्दे, खाङ मेलेबा ईन्दे सिन येशू ख्रीष्टला डेल च्युत्ला न्याय खित ज्युत्क्यो। था ङीमाई दोक ओङगो सिनचेन ङे लोप्कीन ओताते गा लाङच्येते बातला साबा ओत।
यहूदीओन गल्ती च्यि ईन्दे
17थेमे था ङा ख्योकोन नाङ यहूदीओन बात खितामीन। ख्योकोनचेन ङेतनी यहूदी ईन, ङेल्ला परमेश्वरगी थे खोरोङ नियम बिन्दा ओत थेमे थेकी ङ्योकोनला थे खोरोङ मि सिन छाने खाबाते ईन सिन छ्ये खिदुक। 18परमेश्वरगी च्यि च्यि खि साबा ओते सिन ख्योकोनला छ्या ओत थेमे परमेश्वर नियम छ्या ओतेकी ख्योकोन खाङ काम मेलेबा ईन्दे, च्यि लेमु ईन्दे सिन डेला थुप्कान्ते मिङ ईन। 19ख्योकोनचेन खेराङला परमेश्वर नियम छ्या मेस्येकान अन्ध च्योक्ते मिओनला थे नियम लोप्कान्ते थेमे पापताङ लोभकी खाङाते मिओनला परमेश्वर नाम्दाक तेन्ला तेरकान्ते मि ईन खिदुक। 20थेमे लेमु मेलेबा च्यि ईन्दे सिन छ्याःङ डेला मुथुप्कान्ते मिओनला चुक चुक खिता फाप्कीते सिन लाप्ला तेरकान्ते थेमे परमेश्वर बात लेमु खाला छ्या मेताते मिओनला थे बात लोप्कान्तेङ खेराङराङ ईन खिदुक। च्यिला सासीन परमेश्वर नियम ङेता ओतेकी खेराङगी परमेश्वर सु ईन्दे, चुक्ते ईन्दे थेमे थेकी मिओनला च्यि च्यि खि साबा ओते सिरच्येते सत्यते बात लेमु खाईन छ्या स्येबा ओत खिदुक। 21तर ज्येनला परमेश्वर नियम लोप्कान ख्योकोन खेराङचेन होथे नियमला साबा च्योकराङ च्यिला मिक्किते? ज्येनला क्वा मेङगो सिन लोप्कान ख्योकोन खेराङराङ च्यिला कुइते? 22थेमे रन्डीबाजी खिता मेङगो सिन लोप्कानगीराङ थोक खित्च्येते ईन? लोक्ला ल्हा लुला माने खिता मेङगो सिन सिरकान खेराङराङ च्यिला ज्येन मि ल्हे मन्दिर पैसा सा छोल्गीते? 23ख्योकोन चुक्तेन्दे ईन्दाका। परमेश्वरगी ङ्योकोनला थे खोरोङ नियम बिन्दा ओत सिन छ्ये खित्कान्तेबा ख्योकोनगीराङ थे नियम माङेन्ला परमेश्वरला छ्याःङ च्योक गने मिक्किदुक। 24“यहूदीओनगी खाबाते काम थोङला ज्येन ज्येन जातकी मिकी थेबे परमेश्वर चुकस्यिक ईन्दाका सिन परमेश्वर विरोध खिओ,” सिन परमेश्वर बातला टिबा ओता च्योकराङ ख्योकोनगी खिदुक।#इजकिएल ३६:२२
25थेमे जीउला खतकी चिनु जोच्येते बात लोक्ला चुक सासीन ख्योकोनगी परमेश्वर नियम ङेन्दा ईन्सीन परमेश्वरगी छाने खाबाते मि ईन सिन ख्योकोनगी थे चिनु जोबाते काम लै खित्च्या ओतान। परमेश्वर नियम माङेन्नामेकी परमेश्वर दोन्दु ख्योकोननी थे चिनु माजोबाते ज्येन ज्येन जातकी मि छेतराङ ईन। 26बरू यहूदी मेन्गीन खतकी चिनु जोबा मेत्सीनोङ परमेश्वर नियम ङेन्कान्तेबाचेन परमेश्वर दोन्दु खतकी चिनु जोबाते मि च्योकराङ ईन। 27थोगी होथोक्ते ज्येन ज्येन जातकी मिकी ख्योकोनला दोषी ईन सिओ। च्यिला सासीन थेबेकी परमेश्वर नियम ङेता मेत्सीनोङ थेमे खतकी चिनु जोबा मेत्सीनोङ परमेश्वर नियमला खि साबा च्योकराङ खिदुक। तर दोक दोक खि सिन टिबाते परमेश्वर नियम ङेता ओत्सीनोङ थेमे खतकी चिनु जोकान ईन्सीनोङ ख्योकोनचेन थे नियमला खि साबाच्योक खितराङ मिक्किदुक। 28बात दोक ईन्देकी यहूदी ओङला केजीनमेईराङ थेमे जीउला खतकी चिनु जोजीनमेईराङ सुङगीङ ङ्योकोन परमेश्वरगी छाने खाबाते मि ईन सिन सिरा मुथुबो। 29परमेश्वरगी छाने खाबाते मि ओङालानी जीउला थे खतकी चिनु जोला मेन, दाक्पोन सेमका लेमु ओङा फाप्क्यो। परमेश्वर नियमला खतकी चिनु जो सिन टिबाते बात ङेन्ला मि सेम लेमु ओङच्येते मेन। परमेश्वर आत्मेकीकामा मि सेम लेमु जोइओ। होदोक्ते मिलाचेन ज्येनगी मान माक्यासीनोङ परमेश्वर थेबाताङ खुशी ओङला थेबाला मान तेरग्यो।
Currently Selected:
रोमी 2: JUL
Highlight
Share
Compare
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
